Zechariah 1 - Ohiatonhseratokénti

Ne Roiá꞉ner Shakohonkará꞉wis Ne Rahonkweʼtahshón꞉a Ne Rahonhà꞉ke Niahonshá꞉ien

¹ Ne satekonháton sihwenhnì꞉tahre ne tekeníhaton shihioserahtáhtshe, né꞉tho Darius shihakó꞉ra ne Persia, ne Roiá꞉ner taháwenh ne raotheriwahnhothátshera ne rotokenshéhakwe Zechariah (b), né꞉ne roʼní꞉ha Berechiah né꞉ne roʼní꞉ha ne Iddo:

² Ne Roiá꞉ner Roshatstenhserowá꞉nen wahoró꞉ri ne Zechariah nahshakohró꞉ri nonhkweshón꞉a, “Í꞉i, ne Watiá꞉ner, kwáh í꞉ken tsi khenhakwásehne ne ietsisoʼthonkonhkén꞉en,

³ ók ki ó꞉nen í꞉se sheró꞉ri, ‘Íhʼne nokwáh nahthontáhsehwe, tánon tionháhke niénske.

⁴ Tó꞉sa shaieʼtsiiénrenk ne ietsisoʼthonkonhkén꞉en. Wahón꞉nise tsi náhe ne rothitokenséhakwe teshakoná꞉wi nahkateriwahnhothátshera, shakothiró꞉riskwe ne tó꞉sa kariwáksen tsi ní꞉ioht tsi ahonónhnheke, tó꞉sa ne kariwanerahaktsherá꞉kon akénhake tsi ahonnónhnheke. Ók iáh ki tehionkathahonshá꞉tahton khés nahionkewenhnaráhkwen.

⁵ Ne ietsisoʼthonkonhkén꞉en tánon ne rothitokenséhakwe iáh ne ó꞉nenh teshò꞉nonhʼne.

⁶ Nakenhatsherahó꞉kons ne rothitokenséhakwe nón꞉we nitsawè꞉nonh tsi tekhehiá꞉wi ne ietsisoʼthonkonhkén꞉en tsi kheró꞉ri tánon kheronkahtén꞉ni, ók iáh othé꞉nen karì꞉wa tehononhʼni tánon wahathironhiáken tsi niahá꞉wenhne. Ethò꞉ne shahontatré꞉wahte tánon wahathiriwahní꞉rahte tsi Í꞉i, ne Watiá꞉ner Wakeshatstenhserowá꞉nen, kherewáhthon tsi natehonhaténtʼtion tánon tsi niwahkatenikonrón꞉niʼne tsi niénhtiere.’”

Ne Rotokenséhakwe Wahshakohtétʼtsen Ne Koshá꞉tens

⁷ Ne tekeníhaton shihioseratháse né꞉tho Darius shihakó꞉ra, né꞉ne tewáhsen-kaieríhaton shisískare né꞉ne énska iawenhreháton shiwenhnì꞉tahre (né꞉ne Shebat), ne Roiá꞉ner tahákon naterihwanhothátshera ne kasehrentáhkon tsi niwahsóntes.

⁸ Wakhéken ónhkak iakoshaténtie onekwénhtara nihashokó꞉ten ne koshá꞉tens. É꞉tho nón꞉we nahthatáhne tsi karontaienthóhseron ne myrtle norónhwakon, tánon ne rahshón꞉ne thikanaskwaténions kón꞉nes—onekwénhtara, iothirahkwahrón꞉nions, tánon konthiráhken.

⁹ Wahirihwanón꞉tonhse, “Sienshón, ki koshá꞉tens nahò꞉ten konthítons?” Wahtharihwaʼsehrá꞉ko, “Enkonnhatónhase nahò꞉ten konthí꞉tons.

¹⁰ Ne Roiá꞉ner iashakotó꞉ri nahkonthonwenhtsiatʼkensérah.”

¹¹ Ionshahonwahró꞉ri ne raronhiakeró꞉non: “Onhwentsiakwé꞉kon nonhtahiakwéthe tánon wahakwaʼtshén꞉ri akwé꞉kon sakʼthí꞉ken.”

¹² Ethò꞉ne shahèn꞉ron ne raronhiakeró꞉non, “Shatstenhserowá꞉nen Saiá꞉ner, sehnhakwáhsehne ne Jerusalem ó꞉ni ne kanhatowá꞉nens ne Judah ne꞉ne ó꞉nen tsá꞉ta-niwáhsen nihioseráhke. Tóh꞉shekon nenhkarihwéson nohénton nahshenatónhase nahthaniténron?”

¹³ Ne Roiá꞉ner wahthorihwaʼsehrá꞉kwase ne raronhiakeró꞉non ne wáhratsthe ne kaʼnikonrahnirakʼtshera owén꞉nas,

¹⁴ tánon ne raronhiakeró꞉nonh wahakró꞉ri nakerihowahnáhte tsi nahó꞉ten ne Roiá꞉ner Roshatstenhserowá꞉nen ráhwenh: “shaiéntak ne tehionhó꞉tens kanoronkwátshera tánon teshehiateriéntaren ne Jerusalem, nakenathatokénti,

¹⁵ tánon kwáh í꞉ken tsi keʼnhákwahse nonhkweshón꞉a ne ronaʼtsenhnón꞉ni sakʼthí꞉ken ó꞉ni skén꞉nenk í꞉ken. Asè꞉ken tsi nikarì꞉wes watienhawáhkonne nahkenhakwáhtshera tsi nokwáh nakonkweʼtahshón꞉a, né꞉tho onhkweshón꞉a sénha hiahonnhóhetste tsi wahonwahthironhiákente nakonkweʼtahshón꞉a.

¹⁶ Káti Jerusalem nahthontáhke nakenésten né꞉tho kanatowá꞉nen nathaniténron. Nakenonhsatokénhti enskasehrón꞉nihke, tánon ne kanatowá꞉nen enskakwahtahkwénhke.”

¹⁷ Tánon kwáh ó꞉ni wahakró꞉ri ne raronhiakeró꞉nonh: “Ne Roiá꞉ner Roshatstenhserowá꞉nen ráton ne raonahtowá꞉nens shé꞉kon entiothihianerásten tánon shé꞉kon énska iensehwaterásthe enshasniéhnonh ne Jerusalem tánon enharó꞉ri ne kanatowá꞉nen tsi rahonhatsí꞉wa rahonáhta.”

Nateʼtsénsehra Ne Oʼnhakares

¹⁸ Ne ó꞉ia atettsénsehra wakatʼkátho kaié꞉ri nikaʼnhakárahke né꞉ne tionónhskwarons tehiothinhákares ahothinhákare.

¹⁹ Wahiriwahnónhthonse ne tehionkinithárahkwe raronhiakeró꞉non, “Ki onhákaras nahó꞉ten konthítons?” Wahtharihwaʼsehrá꞉ko, “Ne konthirahthákwen ne tsi ionwenhtsá꞉te ahoshatsténhseras né꞉ne tehiakorehniáton ne Judah ahonkweʼtahshón꞉ʼa, Israel, tánon ne Jerusalem.”

²⁰ Ethò꞉ne ne Roiá꞉ner wahakenahtónhase kaié꞉ri nihá꞉ti rathinhátsheras iehnekonréstha rathíhawe.

²¹ Wahkeriwanónhton, “Nahó꞉ten tsi kén꞉en rón꞉nes nahothihiò꞉ten” Wathariwaʼsehrá꞉ko, “Tahón꞉ne nashakothì꞉teronkwe tánon nahshakothishatstenhseráhkwa nonhkweshón꞉a né꞉ne kwáh teshakonaskwáhseron tsi iowenhtsá꞉ien ne Judah tánon tehiakokthokwáhton nahonkweʼtashón꞉a.”