Titus 2 - Ohiatonhseratokénti

Norihwí꞉io Karihonniennítshera

¹ Nók níse ónenk tsi ne enserihónnien tsi nahóten tkiaténros ne orihwí꞉io karihonniennítshera.

² Serihónʼnien ne thoʼtèions ne tóhsa ahatinekakátsʼtahke, ahontatkweniénstahke, tánon thoʼnatateniarótaron; nahioriwíʼioke tsi thoʼnetákwen, ne rahotinonronkwatsherákon, ó꞉ni tahathiwisátsʼtheke.

³ Kwá nòn꞉ne ne sáka ietʼtsirihónnien ne tiotíʼions konnónhkwe, nahkonterihwahténtiate tsi nahtehiothonwentióʼon ónhka ne iakoriwiʼióston tsi ahiakónnheke. Iáh teiówenk nónhka ahiakotisennákshate tóhkaʼ ó꞉ni tahiotirenkénnion nakontinikírake notsítsia. Ónenk tsi enhiakotirihónnien nahóten ne ioiánereh.

⁴ Tsi naiáwenʼne tsi ahkonwatirihónnien ne kén nitiotihiónsa nahonwatinorónkwake ne iotiniákʼkons ó꞉ni ne akotiʼiohokónha,

⁵ né꞉ne ahontakontatheniarótaroke, tánon ahiotiriwahtokénhake tsi iotiniákon nakotiʼiotensheriʼióhake nahotinonskónshon, nahonwahtiwénnarahkwe ne iotiniákʼkons, nená꞉a ne tóhsa ónhka wahétken tsi ní꞉ioht tsi ahiontáti tsi nòkwa ne ateriwanotátshera tsi nitewétha ne Rawenní꞉ioke.

⁶ Né nòn꞉ne sáka ietʼtsiretsáron ne kén nithotihiónsa nahontahontateniarótaroke.

⁷ Noriwahkwékon ónenk tsi í꞉se tentiesatenienthénsthe tsi nisewehʼienní꞉io Sariwatokénhak tánon tasanikonrahsahatónhak ne sarihonniennítshera.

⁸ Ne íh꞉sas ne tkawennaiéris né꞉ne tóhsa ahónton naieriwahkátathe, ne nahónton nahonwanatéhate ne iesáshions ne tsi iáh tahatikwéni ne thénen wahétken ahionkhiʼiénhase.

⁹ Ne ratináskwas ónenk tsi enhonwahtiwénnarakwe ne ratihiatakwení꞉ios ó꞉ni ahontahonwatinikonraiérite tsi nahorihoténsons. Iáh tehioteriwíson nahontahonwatiwennóko

¹⁰ Tó꞉sa ó꞉ni ne thènen ahonwahtinénsko. Kék, teiotonwentióʼon nahonnéhneste tsi tiókonte tionkwetaiéris ó꞉ni rohtirihwahtó꞉ken, ne nahontakáhawe nahioiénawahse ne karihonniennítshera tsi nòkwa ne Rawenni꞉io Sonkwahiatákwas kwá tsi nahóten thènen nahʼhóntiere.

¹¹ Asèhken ne Rawenni꞉io rahwenéston ne rahoténrat né꞉ne aʼkoiatakehnhátshera nonkwetakwékon.

¹² Nètho kenténrat ionkwahrihonniénnis nahitewatiakwarísi nahóten ne iáh tehioriwi꞉iostontseraien tsi ionkwatenniseratenion ó꞉ni ne tsi ionwentsiates ahoskanektseras, tánon tsi nihionkwatenniserathenions titewahniarotarok, ionkwatonkwetakwarishiónhak, tánon aionkwahrihwiʼióstonhke tsi tiónnhek ne kén꞉en ionwentsiáte

¹³ tsi nihionkwárahre nètho iawenniserahnerákwak ionkwarahratsʼténni, nónen ne rahohiatanerahkwátshera ne rosastenserowáhnen Ní꞉io ó꞉ni ne Sonkwaiatákwen Ié꞉sos Kerístos entathathénesthe.

¹⁴ Iehotatatʼkáwen ní꞉i onhkwariwáhke, nahonsahshonkwaniákente ne kwák tsi nahiotónhake ne kariwáksenke tánon nashontiónnien kwáh orihwí꞉io rahónha khók rahonkwetaʼsónha ahitewáhton ó꞉ni kwáh tahionkwasterihénseke ioiánere tsi naitewáhtiere.

¹⁵ Ietsirihónnien kí꞉ken nahorihoténsons tánon kwáh sewahsatsʼtenserakwékon ísewats tsi nenietʼtsinikonrahreke tánon ietʼtsihiatʼthéten ne ietʼtsihiatahónsate. Kwáh tóhsa ónhka ietʼtsiríhon naiesakénron.