Titus 1 - Ohiatonhseratokénti

¹ Kór nón nitiawénon, Rawenni꞉io rihiótense tánon rihiateriwanotánis ne Ié꞉sos Kerístos. Iontiatarákwen ó꞉ni iehionkateniéhton nahkesniénon ne thoʼnethákwen ne Rawenni꞉io sakohiatarákwen tánon nakhehéntense ne kariwahkwarishiontserákon tsi nihionkwaweientetáʼon nonkwariwiʼiostóntshera,

² Tsi ne kakenserákwen ne karahrátshera ne ionnheʼónwe. Rawenni꞉io raónha ne iáh nonhwenton tahanowénthe, sonkwarahratsʼténni kíʼ tsi tsiónnhe nohénton nakwékon sonthontásawen,

³ tánon kwá tahiothokéntaʼne rahotheriwahnothatserákon nónwe narohtáshion. Ne kí꞉ken ionkeniahesáʼon, tánon katʼroris tsi nitaká꞉wi ne Rawenni꞉io ó꞉ni ne Sonkwaiatákwen.

⁴ Í꞉seh Titus iakonhiátonshe, rohriwahtóken riʼiénha tsi nókwa ne tewetákwen né sateionkeníriwahke. Aiáwens ne Rawenni꞉io ne Kanísera ó꞉ni ne Kerístos Ié꞉sos Sonkwaiatákwas nahontáhion kenténrat ó꞉ni skénnon.

Titus Rahohioténseras Ne Crete Nónwe

⁵ Tkonʼhiatkáwen ne Crete nónwe, ne nahónton ahseriwahkwatáko tsi nahoténsons shé꞉kon tehiothonwentióʼon kén niakaiéren tánon sehrihónten ne rathiretiárons nononsatokentíke né kwáh tsi niatekanátakes. Sehiárak tsi nikonróhris:

⁶ Ne raretiárons tóhsa thènen ahonhíkon; énskat khók ahoniákonke, tánon neh sakohiohokónhas ónenk tsi ahontahonetákwen tánon tóhsa thóh nahatiweienoténhake nahothinonwarórike tóhka ó꞉ni iáh tahontewénnarakwake.

⁷ Asèhken ne sakohéntense nononsatokentíke raónha roteriwatsʼteríston ne Rawenni꞉io rahohioténsera, kwá kíʼ tóhsa thènen ahonhíkonke. Iáh tehiówenk naronkwetatsénhake tóhka ó꞉ni ahanakwastó꞉reke, tóhka ó꞉ni ahanekahkátsthake tóhka ó꞉ni ronkwetátsen tóka ó꞉ni rotwistatékʼtien.

⁸ Ónenk tsi enhateroseriʼióhake tánon enhanorónkwake nahóten ne ioiánereh. Ónenk tsi enthotateniarotáronke, enhothonkwetakwaríshion, enhorihwiʼiosthónhake, tánon ahatatkweniénstake.

⁹ Ahoriwahníronke ahotienawasthónhake naterihwahnothátsera nahónton ahontaiakétakwe ó꞉ni nahontakonwahriwáhwase ne karihonnienníhtshera.

¹⁰ Asèhken iakotiokowáhnen, sénha rohnateriwahténion ne Sitaeró꞉non kariwiʼiostontsera, wahtatirihóroke ó꞉ni wahsakotinikonráten notiakhésons neh rahotinonwahroríta.

¹¹ Kwá tehiotonwentióʼon nahonwanáskweke, ne tsi kwá iewahtsirakwékon sakotinikonraksátha ne tsi ne sakotirihonniénnis tsi nahóten ne iáh tathehiothonwentióʼon, tánon akwékon ne karihónnis tsi nihiotéha tsi nihonahtéttien tsi ní꞉ioht tsi rontʼwistónnis.

^12-13 Kwáh né꞉ne Crete nahahiatóten꞉ne, né꞉ne sahiáta rahonnonkwetaʼkén꞉en ne rohthokénsekwe, norihwí꞉io tsi nahóten ráhwen, “Ne Crete nonwe tiotkonʼónwe rohtinó꞉wens, karhiotátsens, tánon ronnentórah ronthenenhiá꞉rons.” Ne kí aoríwa kwá ioníronk tsi ietʼtsihiatewennaiéntonf, thóh nahontáwe ahonatakarítheke tsi ahontahonʼnetakwénhake

¹⁴ Tóhsa ahshakonatahónsatathe ne Sitaeró꞉nons ne ronatʼkarihshónʼa tánon né꞉ne tsi nikáien ne éhren rohnéton ne oriwihioʼónwe.

¹⁵ Kwá tsík nahóten aóskon íken tsi nikáien ne ronnónha ó꞉ni oriwí꞉io íken; nónkwe ne iekheriasí꞉io tsi nahò꞉ten iontkáthos akwé꞉kon tie ioiánere, nók tsi niháti ne ratiweiennáksens tánon iáh tehthonetákwen akwékon kíʼ nénhne tshiewahetken.

¹⁶ Rónton ronwahientéri ne Rawenni꞉io, nók tsi nihatiweiennóten ó꞉ia ní꞉ioht tsi watʼróris. Kwá ronaʼkenronhniáskon ó꞉ni iáh tehontewennarákwa, iáh tehathikwéniens ne thènen ioiánereh tsi nahontiéreh.