St. Mark 3 - Ohiatonhseratokénti

Asen-haton nateioteriȣasonterakȣen tsinikaiaton Rti. Mark.

¹ Sekon are ionsahataȣeiate tsi ionterennaientakȣa, saiatat eh raiatare ne skati roiatakenheion.

² Akȣekon ok iakoterharaton toh shiken nenhaiere, neh ahonȣariȣarhost nahonsahotsiente nʼAȣenta-tokentike.

³ Nok ne Iesos, ȣahaȣenhase ne roiatakenheion: Kanonsihen testann,

⁴ Ethone ȣasakaȣenhase ȣahenron: ahonton ken naontaieriȣaierite nʼAȣentatokentike, okneʼs naonsaionteriȣateȣate? Aonsaiontatonnhete nonkȣe okneʼsʼ naiontateriio? iah othenon tethonatati.

⁵ Ateriatikhonserakon ȣasakotkatoseron, ok ikene ȣahonikonkararen tsini honeriasaniron. Ȣahaȣenhase kati ne ronkȣe: sanentsakȣarisi, ȣahanentsakȣarisi nok oksaok eh nonsaioianerenne tsiniiot ne skati.

⁶ Oksaok sahatiiakenne ne Pharisian nok iasakotinikonrisake ne Erodianronon kah nahontahatiierate naonton ahonȣaiena.

⁷ Nok tanon sahatotarho ne Iesos, nok kaniatarakta niiahare ȣahonne ne raotiokȣa; iotiokȣatsanit ȣahonȣasere, noneh Galile. Judé, Jerusalem, Idume akȣekon oni nisinonkati ne Jourdan tiakotentionkȣen.

⁸ Sahatiriȣaronkanion ne Tyr-ronon oni ne Sidonronon tsini ioriȣanerakȣatenion tsini haierhakȣe ne Iesos kentiokoȣanen oni neneh ȣahonȣaiatorenne.

⁹ Nese ȣaonni ȣasakaȣenhase ne raotiokȣa: kaȣeiennentaonhak ne kaonȣeia toka tenȣatonȣentsioȣe, sotsi ȣahi kentiokoȣanen, onȣa toka tenhionkhiiatorarake.

¹⁰ Aseken onen sikentiokoȣanen sisesakotsienton, ne kati ȣahonni tsiki niiakon ne iakonnrare tsi ok nakannroten ok kentitiaȣenskȣe ionskaneks neok oni ne iaiakoiatosere ne raonhake.

¹¹ Nok nonatkonseraksen tsiokʼsʼenʼsʼ niiore iahonȣaken tare ronȣasennaienskȣe; kontonhakȣe: Ise ne Niio Iaienha.

¹² Nok tanon sakonnhesehakȣe nakontrori tsi raónha.

¹³ Onontoharake niiahare, nok ȣatesakoiataiestasi ne ȣahonne.

¹⁴ Nok ȣasakoiatarako tekeni iaȣenre nihati nahatikȣekonhatieseke neh oni nʼiensakotori enhonteriȣanotonra.

¹⁵ Asakokȣeniatserononi naonsasakotitsiente nʼia-kononȣaktanionni, oni naonsasakotiiatinekenȣe nʼo-natkonseraksen onkȣe iakonatienni.

¹⁶ Kenhnihotisennotens ne tekeni iaȣenre nihati: Simon noneh Tier Shonatonkȣen.

¹⁷ Sak Zebedé roienha tanon ne rokenha San nehne Boarneges ronatonkȣen, ȣatenientenstakȣen, Raȣeras Roienha.

¹⁸ Andre tanon Philippe, Bartelemi, Ȣatio, Atonȣa, Sak Alphé roienha; Tadde tanon Simon Kananeenronon.

¹⁹ Tanon Sitas Iskariot, neneh Iesos rotenninon.

²⁰ Iotiokȣatsanit are saieserenne nonen sonsahontaȣeiate, akȣekon iah tehotinaktotaskȣe ne tahonstskaon.

²¹ Siiahatiriȣaronke ne raoȣatsire ȣathotisterihen saonȣaiatisakha aseken iontonnionskȣe, tehanonȣaraȣenrie.

²² Nok ne ratiiatons Jerusalem thotiientakon rontonhakȣe are neneh: rotkonseraien ne Beelzebul, nok neh aosennakon tsi sesakotekȣata nʼonatkonse-raksens.

²³ Nok tanon ne Iesos iasakohnonke nok Sahenron tsi ȣatesakoriȣakentonkȣen; oh naiaȣenne nʼotkon-seraksen astste iaonsahoiatonti notkonseraksen?

²⁴ Aseken toka iah skanikonra tehken tsi kanakeraseraien iah ki taonton akanakeraserateke.

²⁵ Nok oni ne skaȣatsira tekariȣatironte iah ki takaȣatsirateke.

²⁶ Toka kati nonȣa ratateriȣaiahaki nʼotkonsera-ksen, nok tehoriȣatironte iah ki Sotsi ihnon thiiare, akȣa tanon iosnoratie enhaton.

²⁷ Iah onka taiekȣeni ahonȣanonskari ne rosastenseraien, ne iah ohenton tahontahonȣanerenkhe.

²⁸ Oriȣiio tsi kȣarori, tsi akȣekon enshonikonrhon ne Niio ne kariȣaneraaksera, oni tsinikon aiakoriȣaiesatakȣen ne kaȣennaksens.

²⁹ Nok tanon onkakiok enhosennaiesaton ne Rotkon Ronikonratokenti iah nonȣenton tiiaonsahatiatokeȣe: ok eken tanon enhorane niatekakonte ahatetsiratakȣe.

³⁰ Neh ȣaonni eh nahaiere tsi ȣahatati ne Iesos ne tsi rontonhakȣe rotkonseraien notkonseraksen.

³¹ Onen eh ȣaonneȣe ne rontateken okonha oni ne ronistenha, astste tontahatitane, iahonteriȣaniete iaonȣennonke, aseken sotsi kentiokoȣanen tohonȣanen ronnihne.

³² Ȣahonȣarori, ȣahiron; kenh tonnete astste ne sanistenha oni seȣatatekenhokonha iesaiatisaks.

³³ Tontahenron: Onka nakenistenha oni ne tekatennontere.

³⁴ Ȣathatkatonnionȣe tsi ietaraien nok ȣahenron: Kenh ȣahi kaien nakenistenha oni nʼonkȣatatokenha.

³⁵ Aseken onka kiok enhonȣanikonraierite ne Niio, neh onkiatatekenha oni akenistenha enȣaton.