Ruth 4 - Ohiatonhseratokénti

Boaz Wahotí꞉niake Ruth

¹ Boaz eh tho niahá꞉re tsi rontkennisaʼahtáhkhwa eh tho iahátien. Ne káti kí꞉ken rón꞉kwe Boaz ohén꞉ton thoná꞉ton kwáh sénha ákta iatatenónhkwe ne Elimelech, eh tho wahoké꞉tohte Boaz, tahó꞉nonke, “Kén꞉ nontá꞉se, ontiatén꞉ro, tánon sátien.” Tho kí niahá꞉re tánon wahátien.

² Thó꞉ne ó꞉nen Boaz tánon oié꞉ri niháti ne ohén꞉ton rónnete ne kaná꞉takon waʼshakoriʼwanón꞉tonhse skátne ahóntien. Tsi káti ó꞉nen akwé꞉kon wahóntien.

³ Iahotárhahse ne iatatenónhkwe, “Kí꞉ken Naomi, Moab naʼtontá꞉ien ionská꞉neks naiontenhní꞉non tsi thothéhtaien tewatatenónhkwe Elimelech. Tánon kanonhtónnion teiotonwentsó꞉hon aiesatókenhse tsi nikarihò꞉ten.

⁴ Tóka káti tesatonwénhtsó꞉ni nashní꞉non raotihén꞉ton kí꞉ken ken꞉ʼen ratitskó꞉ton, shní꞉non. Tóka káti iáh thatesatonwentsó꞉ni tsì꞉ron kiʼ, áseʼken ne tiotierénhton í꞉se satehshén꞉naien thó꞉ne ó꞉nen í꞉ʼí.” Thó꞉ne ó꞉nen wahèn꞉ron ne rón꞉kwe, “Í enkhní꞉non.”

⁵ Wahèn꞉ron Boaz, “Tóka káti Naomi enhsehehtahní꞉non ne ki énkene Ruth, kí꞉ken Moabite iakotehré꞉ʼons ne káti rawenhé꞉ion raohéhta kahwatsí꞉rakon enkaién꞉take.”

⁶ Wahèn꞉ron ne rón꞉kwe, “Ne aorì꞉wa enská꞉tkaʼwe nakhní꞉non ne kahéhta ne tsi iáh thaʼhatiiehna ne keienʼokón꞉ʼa. Í꞉se káti shní꞉non tonhsonkwaterihwaténien.”

⁷ Ne tho nón꞉ shontakahá꞉wi nahatirihwénhte nahò꞉ten watkè꞉ron tóka niʼ tahontá꞉ton ne kahéhta tsi nikaianerenhserò꞉ten ne rotkè꞉ron enharíhsi ne raóhta tánon ienhó꞉ion ne wahahní꞉non. Tho nihotiianerenhserò꞉tenʼne ne Israerʼró꞉non tsi ó꞉nen onterihwakwatá꞉ko.

⁸ Tsi káti ó꞉nen kí꞉ken rón꞉kwe wahohró꞉ri ne Boaz, “Í꞉se shní꞉non,” waharíhsi ne raóhta tahó꞉ion ne Boaz.

⁹ Wahèn꞉ron Boaz, ne kí꞉ken ohén꞉ton rónnete ók ó꞉ni ne ronátiaʼke ken rónnes akwé꞉kon, “Í꞉se ensewarihwaʼní꞉rate ón꞉wa wenhniserá꞉te tsi akwé꞉kon wakhní꞉non ne Naomi tsi nahò꞉ten rotiiéntahkwe ne Elimelech tánon sakotiienʼokón꞉ʼa Chilion tánon Mahlon.

¹⁰ Ne ó꞉ni kí꞉ken Ruth, Moabite naiehwatsirò꞉ten Mahlon ronéhkwe, enionkení꞉niake. Ne káti rawenhé꞉ion raohsén꞉na enkatátie tsi kahéhtaien tánon tsi nén꞉we enkahwatsiratátie enhonwehià꞉rake tsi nón꞉ nihanakeréhkwe. Ón꞉wa wenhniserá꞉te káti í꞉se ensewarihwaʼní꞉rate.”

¹¹ Ne káti kí꞉ken ohén꞉ton rónnete tánon ronátiaʼke eh tho rónnes wahonnì꞉ron, “Hen, í꞉ʼi kiʼ eniakwarì꞉wenhte. Aiá꞉wens káti Roiá꞉ner ahsakoiaʼtaté꞉rihste eh tho naieiaʼtoʼtén꞉hake seniniáhkhe tsi natekeniiaʼtoʼténhne ne Rachel tánon Leah, é꞉so iotiwiraientá꞉ʼon Jacob raoriwá꞉ke. Aiá꞉wens aiesakwáhtsheʼne kenʼtàrakon ne Ephrath tánon atshennowá꞉na tsi nón꞉ ne Bethlehem.

¹² Aiá꞉wens káti kí꞉ken kennitiaʼkoiénha Roiá꞉ner aontahsakotenniéhten ratiksaʼokón꞉ʼa eh tho náiohton ne sahwá꞉tsire tsi ní꞉ioht ne nihatihwatsirò꞉ten ne Perez, ronwaién꞉ʼa ne Judah tánon Tamar.”

Boaz Tánon Raohwatsireʼkénha

¹³ Boaz iaʼshakoiaʼtén꞉hawe ne ró꞉neʼ Ruth tsi nón꞉we thèn꞉teron. Roiá꞉ner waʼshakoiataté꞉rihste tánon waʼontháwa wahrénnakerate raksá꞉ʼa.

¹⁴ Konnón꞉kwe waʼontathró꞉ri Naomi, “Tshennakará꞉tat ne Roiá꞉ner! Tahiatenniéhten ón꞉wa wenhniserá꞉te tshateré꞉ʼa ne ahiaiaʼtakéhnha. Aiá꞉wens ne raksá꞉ʼa ahasennowáhnha ne Israel!

¹⁵ Shesá꞉wha iesanorónhkhwa ne sénha iesaiaʼtakéhnhen tsi ní꞉ioht ne tsá꞉ta niháti aiesawiraién꞉take. Tánon nón꞉wa tshateré꞉ʼa saiesá꞉ion. Á꞉se ensrón꞉ni tsi sónhnhe tánon ó꞉ni enthiá꞉ion skén꞉nen ahsanonhtónnionwe nó꞉nen ensaksténhaʼne.”

¹⁶ Naomi, kwáh ieiaʼtákta tsi wahonwaié꞉na ne raksá꞉ʼa tánon akaónha wahonwatenʼnikòn꞉raren.

¹⁷ Kí꞉ken konnón꞉kwe ne tho kontinákere wahonwahsén꞉non kí꞉ken raksá꞉ʼa Obed. Waʼtkonterihwaré꞉niaʼte akwé꞉kon aiakotó꞉kenhse, “Raksá꞉ʼa wahrénnakerate Naomi ronwaién꞉ʼa!” (Toh nihatiweienoʼtén꞉e neʼthó shontakahá꞉wi.) Obed káti ieshoién꞉ʼa ne Jesse tánon ne ieshoién꞉ʼa ne Táwit.

^18-22 Ne káti kí꞉ken waʼkahwatsiratátie ne Perez tánon tsi niió꞉re Táwit. Perez roién꞉ʼa ne Hezron, Ram, Amminadab, Nahshon, Salmon, Boaz, Obed, Jesse, Táwit.