Ruth 1 - Ohiatonhseratokénti

Elimelech Tánon Raohwá꞉tsire, Moab Niahón꞉ne

^1-2 Wahón꞉nise ne tho nón꞉ shontakahá꞉wi ohén꞉ton tsi niió꞉re ne Israel shahotiién꞉taʼne ne Ronontí꞉io, iáh tesewatennaʼ tsheranákere. Kí꞉ken rón꞉kwe Elimelech ronwá꞉iats tho nón꞉ nihaiá꞉tare tsi nihotiʼtarò꞉ten ne Ephrath tánon tho nón꞉ nihanakeréhkwe tsi nón꞉ tkanátaien Bethlehem ne Judah, wà꞉ne káti ne ró꞉ne Naomi tánon tehniiáhse rotiskenʼrakéhte shakotiienʼokón꞉ʼa Mahlon tánon Chilion ronwatí꞉iats. Kenʼnikarihwéhsa káti tho nón꞉ iahatinákerate tsi tionhwentiá꞉te ne Moab. Tsi káti nikarì꞉wes tho nón꞉ shihatinákere,

³ Elimelech waʼrénheie tánon Naomi ietsakaonhá꞉ʼa tánon ne tehniiáhse ronwatiienʼokón꞉ʼa.

⁴ Sók wahotíniake Moabite naʼtekenihwatsirò꞉ten, Orpah tánon Ruth konwatí꞉iats. Oié꞉ri niiohserá꞉ke ohnáken,

⁵ Mahlon tánon Chilion tetsá꞉ron waʼníheie tánon Naomi iatonsaiakoià꞉tiste, iáh tetsakoniá꞉kon iáh niʼ tetsakowí꞉raien.

Naomi Tánon Ruth Shá꞉kenewe Ne Bethlehem

⁶ Ohnaʼkénhkha káti Naomi waʼerihwá꞉ronke ne Roiá꞉ner tsi wahshakoiaʼtaté꞉riste ne raonkweʼtaʼshón꞉ʼa é꞉so tahshakotenniéhten ne kaienthóhsera; waʼontateweiennén꞉taʼne káti waʼakennakerá꞉ko ne Moab wakón꞉ne ne konwatisá꞉wha.

^7-8 Skátne wakonhtén꞉ti tsi nón꞉ tsi tionhontsá꞉ien ne Judah, tsi káti niioháhes wakonwatihthárhase, “Satsahtén꞉ti ietshiʼnistenʼnéha nionsásene. Aiá꞉wens káti ne Roiá꞉ner tho ní꞉ioht tsi ahtshisenirihwakweniénste tsi ní꞉se ní꞉ioht takenirihwakwenienstháhkwe ók ó꞉ni tsi nihá꞉ti ronenhé꞉ion.

⁹ Tànon ne Roiá꞉ner aontónsheke aontatshitsatenniéhten ne tetsà꞉ron aonseseníniake tánon aieseniién꞉taʼne tsi nón꞉ aieseniʼterón꞉take.” Naomi waʼtkonwatinoronhkwánion tsi ó꞉nen waʼtkontekáhsi. Sók tetsá꞉ron wattiahséntho.

¹⁰ Waʼkenì꞉ron tsi waʼontathró꞉ri, “Iáh! Éntewe tsi nón꞉ thatinákere ne sonkweʼtaʼó꞉kon.”

¹¹ “Ó꞉nenk tsi entsitsà꞉kete keniienʼokón꞉ʼa,” waʼì꞉ron Naomi. “Oh niiotié꞉ren tsi ísenehre aiétewe? Ísenehre kenʼ tóka shé꞉kon aonsonkewiraién꞉taʼne ne rotiskenʼrakéhte ne aonsesení꞉niake?

¹² Satsahtén꞉ti, aséʼken sótsi ó꞉nen wakeksténha naonsonké꞉niake. Ók ó꞉ni nakéhrheke tóka shé꞉kon aiohrharahtseraién꞉take tánon ón꞉wa iokarahtsherá꞉te aonké꞉niake tánon tehniiáhse rotiskenʼrakéhte aonsonkewiraién꞉taʼne,

¹³ aietsatehrhà꞉rate ken tsi niió꞉re iaʼnonkweʼtaié꞉riʼne? Né꞉ kenʼ taiesení꞉tahste ne akó꞉ren aonsesení꞉niake? Iáh, keniién꞉ʼa, tsaterién꞉tare tsi iáh nowén꞉ton tho thaiá꞉wenʼne. Roiá꞉ner iáh thaʼtehshakerihwasnié꞉se tánon wakeʼnikónhkararens ne senirihwà꞉ke.”

¹⁴ Sók á꞉re tonsatiahséntho. Thó꞉ne Orpah waʼtiakonoronkwá꞉nion nakosá꞉wha tánon tho nionsá꞉ien tsi nón꞉ tienakeréhkwe. Sók ne Ruth iaʼontatié꞉na ne Naomi.

¹⁵ Ók ne Naomi waʼì꞉ron, “Ruth tsaríha ó꞉nen saionhtén꞉ti tsi nón꞉ nakohwá꞉tsire tánon nakoní꞉io thatinákere. Wá꞉s káti sásene.”

¹⁶ Tontakariʼwaserá꞉ko ne Ruth, “Tóhsa takeriʼwanón꞉tons nakoniá꞉tkawe! Takeríhon naiétene. Tsi nón꞉ nienhénhse tho kiʼ niʼ ní꞉i nienhén꞉ke tsi nón꞉ nenhsiʼteróntake tho kiʼ enkiʼteróntake. Sonkweʼtaʼshón꞉ʼa í꞉ʼi꞉ ó꞉ni akonkweʼtaʼshón꞉ʼa enwá꞉ton tánon Saní꞉io í꞉ʼi ó꞉ní Akení꞉io enwá꞉ton.

¹⁷ Tsi nón꞉ nenhsíheie tho kiʼ niʼ ní꞉i nón꞉ nenkíheie, tho nón꞉we neniontià꞉tata. Tóka káti ne Roiá꞉ner ne tiaonhá꞉ʼa ahakʼrewáhte, nek enkakwé꞉ni ne kenhéion, taionkenikáhsi tóka enkoniatewén꞉teʼte!”

¹⁸ Tsi ó꞉nen Naomi waʼontkáhtho ne Ruth tsi waʼontenikòn꞉risa nákene iáh thé꞉nen tetsakà꞉wen.

¹⁹ Iatiahtén꞉ti káti tsi niió꞉re Bethlehem. Shiaháʼkenewe kanatakwé꞉kon wahontshennón꞉ni, tánon konnón꞉kwe watiotihén꞉rehte wakonnì꞉ron, “Kwáh kenʼ orihwí꞉io tsi í꞉se Naomi?”

²⁰ “Tóhsa Naomi takwaná꞉tonk,” waʼì꞉ron; “Marah, takwaná꞉tonk, ne kén꞉ton iotskà꞉ra ne tsi Rohsatstenhserowá꞉nen Rawenni꞉io wahakónnien tsi tewakatonhnhakárien tsi kónhnhe.

²¹ Shaʼkahtén꞉ti ne kén꞉en, wakkwahtshéhne. Nok ne Roiá꞉ner shatiaʼtenhá꞉wi kwáh iáh thé꞉nen tesékhawi. Oh nontié꞉ren káti Naomi ahskwanatónhkwe né꞉ ne Rohsatstenhserowá꞉nen Rawenni꞉io rakerihwèn꞉ton tánon thakwatenniehtén꞉ni kaʼnikonhraráhtshera.”

²² Tho káti ní꞉ioht tsi sá꞉ionwe Naomi, tsi tionwenhtsà꞉te ne Moab; í꞉kene ne Ruth, akosá꞉wha ne Moabite naʼehwatsirò꞉ten. Tsi wá꞉kenewe Bethlehem, kwáh ó꞉nen shontahontáhsawen ratiienʼthókwas teiotikonhstónhrhes.