Romans 9 - Ohiatonhseratokénti

Ne Nonkwesónha Neh Rawenni꞉io Kwáh Tesakohiatatokénthon Sakohiatarákwen.

¹ Kwáh oriwí꞉io watʼtharákwen; Kerístos nʼí꞉i rahonkwéta tánon iáh tekanowéntha. Nakwéri neh꞉ne Ronikonriʼióston thoniarótaron, tánon ó꞉ni rakeriwaniráti tsi iáh tewakenówens

² Nónen enkíron tsi nikowánen nakenikonratséntsera, iáh tiehiotótʼthe tsi natewakawehéstha nakweriáne

³ nakonkwetaʼsónha, kwáh neh sahakwaiáta ó꞉ni sahakwanekwénsa! Rohnónha rahothiriwáke ahónthon nakaskáneke neh hiatetiáti ahakréwaʼte ne Rawenni꞉io ó꞉ni tahionkihkháshion ne Kerístos.

⁴ Rohnónha neh Rawenni꞉io rahonkwetaʼsónha; rahónha rohtewirahrákwen ó꞉ni washakawenésten ne rahohiatanerakwátsera; iathonteriwáieste tánon tasakáwen ne kaianerénsera, Rawenni꞉io wahsakonathónhaʼse tsi ní꞉ioht tsi ahonwasénʼnaien neh kwáh tkariwaiéri; wahathiʼiéna ne Rawenni꞉io tsi nihorarasthánions;

⁵ thóhʼnon tahathiwatsiratátie neh kwáh rononkweʼtowaʼnénskwe ne Hebrews; tánon ne Kerístos, tsi ónkwe ihken neh sahothitsiókwa. Aiáwens ne Rawenni꞉io tsi rahónha akwékon sakoháwi, tsi nénwe aionwasennaʼiénseke!

⁶ Iáh neh tekáton tsi nihorahrátston ne Rawenni꞉io iáh ehteiawénhen; iáh ratikwékon nIsraelrónon Rawenni꞉io tehahonkwéta.

⁷ Ne nònʼne sáka ne tsi nithonatwatsirínon ne Abraham. Rawenni꞉io wahawénhase ne Abraham, “Tsi nienhsathwatsí꞉rine raonhá꞉ke ne Isaac nón꞉we nenhtón꞉ne kwáh kíʼ tsi nikoniaʼrarátstenhni.”

⁸ Ne kíʼ kéntons iáh ratikwékon neh Abraham sakoienokónhas ronónha ne Rawenni꞉io sakoienokónha akénhake, nók neh khók, tsi niháti ne Abraham sakoienokónha, Asèken Rawenni꞉io kwáh oriwihioʼónwe tsi rorahrasténʼni, rohnonha khók neh enhonwatinathonkwake Abraham sakoienokonhas.

⁹ Ne Rawenni꞉io owennaʼkésons non nihorahrástons; “nónen ienkáhewe tèntke, tánon neh Sarah eniowiraiénthake.”

¹⁰ Tánon iáh thók takonháke. Asèken ne Rebecca tékeni teiakonekenterontseráien tetiáron neh sahotinísera, nehʼne tsi tewasótʼtha Isaac.

^11-12 Neh nahontáwe tsi nihotinikonrón꞉ni ne Rawenni꞉io niahontasónterehke thoʼnahiontonhátie tsi ní꞉ioht tsi thotenikonrón꞉ni ne rahonháke, Rawenni꞉io waharóri, “Ne takowánen tenhoriwásniese neh rokénha.” Thóh ní꞉ioht tsi taróhri nohénton sahowiraiéntaʼne, nohénton thènen nahiátiere neh teniʼiáse ahioʼianeréhake tòhka ó꞉ni kariwahétken akénhake; Káti tsi nihorákwen neh Rawenni꞉io neh thohawíthon tsi nishakonáhon, iáh tòhka kén tsi nahonatiéren.

¹³ Tsi niwáton ne Kahiatonseratokénti, “Rinorónkwa ne Jacob, nók ríhsons ne Esau.”

¹⁴ Ne káti kén aihtewénron nètho Rawenni꞉io iáh tehoriwatóken? Kwáh iáh thènen ne tenkéntons.

¹⁵ Asèken wahawénhase ne Mahís, “Nakaskáneke kwáh tsík ónka enkhètenre; kwáh tsík ónka tenkhehiaróthon nakaskáneke.”

¹⁶ Neh káti, akwékon entewanónton, iáh tsi nahóten kíʼ tiónkwe tewaskáneks onhnaihtewátiere, nók kwáh nek khók ne Rawenni꞉io rahoténrat.

¹⁷ Asèken nowenʼnatokénti rohróris ne Egypt ronnontí꞉io, “Í꞉i wakonnontí꞉ioste neh nahontáwe nakonʼniáhese nakéneste nakesatsʼténsera tánon tahonréni naksénʼna nonhontsiakwékon.”

¹⁸ Nekáti, tòhka ne Rawenni꞉io enhaskáneke naréneste nónkak asakótenre, ehnihaiéra, tánon tòhka enhaskáneke nónkak aiontenikonrátsate, ehnihaiéra.

Rawenni꞉io Rahonhakwátsera Ó꞉ni Nataniténron

¹⁹ Nók ónkak tsi nítsion enhionkénhase, “Thoʼkíʼ níhiot, onhʼní꞉ioht tsi ahakwéni neh Rawenni꞉io ónkak asakoriwatsénriaʼse? Ónka aiekwéni naiontenówente tsi nihonikonróten neh Rawenní꞉io?”

²⁰ Nók í꞉se, órie, ne tahonthatsewenʼnáweron ne Rawenni꞉io? Nhotára kátse iáh tehoriwanontónʼni ne rónkwe tsi nikáien róhson, “Nontiéren tsi ehní꞉ioht tsi tatiatíson?”

²¹ Tsi nihiótha, ne rónkwe nenhatietónʼni kwáh tsi nentanónweʼne tsi énratste nionawastakarí꞉io, tánon tekatʼtsétake enhatʼtsetónʼni nehʼne sakanawáhstha, skatséta kwatóken tsi nikaháwi ónen neh énratste tánon ne ó꞉ia kwáh nènʼne tsikʼnikaháwi neh꞉ne áhraste.

²² Tanon kwáh neh sáka tsi niʼioriwhí꞉io tsi nihoiéren ne Rawenni꞉io. Wáhʼrehre naréneste ne rahoʼnhakwátsera tánon nharotáshi ne rahosatsʼténsera. Nók kwáh íken tsi rohnikonkátsʼtekwe sakothakastáton tsi niháti ne tensakoiatórete ne rahonhakwatserákon thóhʼnon niahonenonhátie ne kariwaiesatserákon.

²³ Tánon ó꞉ni reraʼkwe narotási tsi niʼiókwas ne rahohiatanerakwátsera, ostónha thesonkwáwi kíʼ kahiatanerakwátsera tsi nísonkwe nesténʼni ne kenténrat.

²⁴ Asèken í꞉i nètho tsiónkwe neh tesonkwanáton, iáh tòhka kén nek khók tsi natehóntere ne Sitaeró꞉nons nók neh ó꞉ni neh iáh tehatisitaeronons.

²⁵ Kén ní꞉ioht tsi ráwen neh kahiatonserákon ne Hosea: “Nonkwesónha iáh í꞉i tewakonkwéta thekèn꞉ne neh henkhenátonkwe ‘Ihi akonkweta.’ Ne rahotiʼtiókwa iáh thekhenoronkwákwe neh enkhenáthonkwe ne, ‘Tekanhóron.’

²⁶ Tanon kwáh tsi nónwe nihiokwénrare neh thoʼní꞉ioht tsi ronwatiróri, ‘Iáh í꞉se tewakonkwéta,’ neh thoʼnónwe ne enhonwathinathónkwaʼke neh ronʼnheónwe Rawenni꞉io sakoienhokónha.”

²⁷ Tanon Isaiah wahanikonraiénthaʼte tsi nòkwa ne Israel, “Tòhka ó꞉ni thóh nahionthonkwetaʼkáteke neh Israel tsi níkon tekanesaronkhótharon neh ahtsakthóntie neh kaniatarakhekówa, nók khiʼkenk nenhatíhake enhathiniákenʼne;

²⁸ asèken ne Roiá꞉ner kwáh iostóre enioriwaníronke tsi tesakoiatórete nonkwesónha ne tsi ionwentsiáte.”

²⁹ Kwáh thóh ní꞉ioht tsi nitháwen ne Isaiah tsiotierénton, “Tòhka neh Rohsatsʼtenserowánen Roiá꞉ner iáh thasakonónstaton nonkwaʼshótseras, thóh nahionkwaiatawénhen tsi ní꞉ioht ne Sodom, thóh naihtewaiathoténhake tsi ní꞉ioht ne Gomorrah.”

Neh Kariwí꞉io Israerʼró꞉non Oni Akoriwáke

³⁰ Ne káti naihtewénron ne iáh tehatisitaeronons, tsi ronteniénthaskwe nahonsahonthaʼteriwaʼserónnien rahohénton ne Rawenni꞉io, tewéthakwe tsakoriwahseronniénʼni tsi natehóntere ne Rawenni꞉io;

³¹ Tsi náhe ne Rawenni꞉io rahonkwétas, ronnehsáskwe ne kaianerénsera nahonsaiakoriwaserónnien tsi natehóntere ne Rawenni꞉io, iáh tehotitʼtsénrion.

³² Tanon nontiéren tsi iáh? Neh tsi iáh tehathiniahésenʼne ne tewethákwen nók neh tsi nihotiʼiéren. Tánon neh kíʼ tahonashítsiake ne “tsiakoshitsásʼtha nhonénhia”

³³ nowennaʼtokénti neh watroriátha: “Satkátho, watsiéntatse tho nón꞉we Zion onénhia ne enkakwéni nónkwe entsiakosítiake, tánon nosténra neh enkakwéni tenhiakoniohtáko. Onhkakíʼok nenthonwétakwe iáh tahonsahiontateriwásten.”