Romans 8 - Ohiatonhseratokénti

Iakoháwi Ne Kasatsʼténsera Tsi Nitʼtkáhas Nonikónra Neh Rawenní꞉ioke

¹ Iáh ónen thènen teskarewathatseráien tsi niʼiákon neh thóhʼnon niʼiakonʼnhétie skát꞉ne íken ne Kerístos Ié꞉sos.

² Asèken nahoianerénsera nonikónra, neh iontiónnhets tsi teionkwateriwahsóntere neh Kerístos Ié꞉sos, shatsiatotaríshon tsi nòkwa ne ahoianerénsera ne kariwáneren tánon ne kenhéion.

³ Tsi nahóten ne kaianerénsera iáh tehiotónʼon tsi naioiéren, neh iorihónʼni sóhtsi iotsihióhakwe tsi niʼiakonnhóten nónkwe, tsi naháiere ne Rawenni꞉io, waharéwate ne kariwáneren neh꞉ne tsi niwátstha tsi nihiakonnhótens ne ónhkwe tsi tahothéniete nénskat khók roiénha, neh꞉ne ahariwáthonʼne ne kariwáneren.

⁴ Rawenni꞉io kíʼ thoʼnahása, neh tsi niwésaks ne kaianerénsera ne tkariwaiéri. Neh꞉ne kwáh thokènhen aihtewariwakanón꞉ni, tsi thónon niʼionkwathaihtáke neh꞉ne tsi niʼiáwens nhonikónra. Nók iáh neh tsi niʼiáwens tsi niʼiakorenʼnáhon nónkwe.

⁵ Tsi niháti neh thóhʼnon niʼonhnonnhétie tsi niʼiorihióten ne ratiʼierónkes, tánon tsi niwaskáneks ne rathiʼiéronke neh tsioniarhótharon neh rahonanonthonʼnióntsera. Tsi niháti neh thóhʼnon niʼonhnonʼnhétie tsi nisakoróris ne Rawenni꞉io, tánon Rawenni꞉io thoʼniaróhtaron ne rahonanonthonʼnióntseras kwáh tsi nitʼthaskáneks.

⁶ Tóhka nek khók ensanonthonʼniónseke tsi nitewaskáneks ne tiéronke neh ensaʼrhióte, nók kíʼ tòhka nek khók ensanonthonʼniónseke ne Rawenni꞉io rahoriwasónhas kwáh nen꞉ne oriwihioʼónwe ensónʼnheke tánon ensaiéntake ne skén꞉nen.

⁷ Asèken tòhka nonikónra tiókonte owarón꞉ne non iewanontónʼnions ronikonratsátha ne Rawenni꞉io; áseh kén iáh tehontewennarákwa ne Rawenni꞉io rahoianerénsera, tánon ó꞉ni kwáh oriwí꞉io tsi iáh tahatikwéni nahontewénnaraʼkwe.

⁸ Tsi niháti neh nek khók rothihióte ne ahontahontaʼtehnikonraiérite, iáh neh takakwéni naʼontahonwanikonraiérite ne Rawenni꞉io.

⁹ Nók iáh kíʼ owarón꞉ne non tesanikonrahnentákon; neh saháwi tsi nisaróris nonikónra, ne sehnèkwa, Rawenni꞉io rahonikónra saháwi. Ónhka kíʼ ók iáh teháhawe neh Kerístos rahonikónra iáh kíʼ rahónha tehahonkwéta.

¹⁰ Nók tòhka seh nikwékon ne Kerístos, neh nonikónra enkarihón꞉ni tsi ensónʼnheke. Éhthoh nenshiére iawerohátsien ne saieróntha tsi enkénheie neh꞉ne kariwáneren enkarihón꞉ni; tánon Kerístos kíʼ éhʼthoh nihoriwakanón꞉ni neh iorihónʼni neh tsi tiesariwiʼiosténʼni rahohénton ne Rawenni꞉io.

¹¹ Tóhka ne Rahonikónra ne Rawenni꞉io, tsi raónha shokhétskwen ne Ié꞉sos ne kenheiátʼne, seh nikwékon, éhʼtho káti tsi nikáien shokhétskwen ne Kerístos ne kenheiátʼne, neh káti ó꞉ni enrónʼnhete tsi nihiotsihióha sewaieróntas ne tsi niwéhne tsi sehwakwékon ne rahonikónra.

¹² Éhʼtho káti, tewatenrosónhas, ionkwateriwaiénʼni, nók nehʼne tóhsa thoʼní꞉ioht tsi aihtionʼnhétie tsi niwaskáneks nonkwáhieronta.

¹³ Asehken tòhka thoʼní꞉ioht tsi entsioʼianénhawe naihtiónʼnheke neh tionháke, kwáh ensewénheie; nók kih tòhka nonikónra saiénawaʼse ne kwáh iaonhtsiáksʼtsi tsi nisaiérha ne sariwaneraháktsera.

¹⁴ Tsi niháti neh꞉ne rotiháwi neh Rawenni꞉io Rahonikónra raónha Rawenni꞉io sakoienhokón꞉a.

¹⁵ Nonikónra nètho Rawenni꞉io thiáwi iáh neh tesonniénʼnis ne senáskwa akénhake ó꞉ni naihsónnien naihsaterónseke; khék nonikónra neh sonniénʼnis ne Rawenni꞉io iaiénha akénhake, tánon kíʼ nahosatsʼténsera nonikónra iontionniénʼnis natsitewaróhri ne Rawenni꞉io “Rákeni! Í꞉se Takwaiénha!”

¹⁶ Rawenni꞉io Rahonikónra tánon nonkwanikónra tetsiáron tsiatʼrhóris tsi Rawenni꞉io seh sonkwaienhokónha.

¹⁷ Tsi náhe raónha sonkwaʼiohokón꞉a enkénhake, entewaiéna neh kahiataterítʼtseras ne sakonónstati neh rahonkwetaʼsón꞉a, tánon káti ó꞉ni satenʼionkwawénhake ne Kerístos tsi nahóten ne Rawenni꞉io rorakwén꞉ni; tòhka síken knaiawén꞉ne thoʼní꞉ioht tsi aitewaroniáken tsi nihoroniakén꞉en ne Kerístos, ehʼthóhne káti entewaiéna ne kaiatanerakwátsera tsi nihoienáʼon ne raónha.

Táweh Ne Kahiatanerakwátsera

¹⁸ Watʼtiatórete tsi niʼionkwaronhiakénʼen tsi nióre nónwah iáh tahónton nehʼne tahontahionteniéntenste neh kahiatanerakwátsera nen ionkhirihotáshase

¹⁹ Akwékon nahoténsons ne Rawenni꞉io rohsahánion iotiráres neh naiáwen ne Rawenni꞉io asakorihotáshiaʼse neh sakoienhokónhas.

²⁰ Rawenni꞉io waharíwente akwékon tsi nahoténsons kasahánion naionáti tsi nihiothirihóten, iáh ohnónha thoʼtihiotirihón꞉ni, nók neh kíʼ tsi Rawenni꞉io thoʼní꞉ioht tsi hiathoriwaiéntase. Iáh kíʼ thènen tehiotiéren Rawenni꞉io neh kíʼ raskánekskwe

²¹ ne kasahánion iatekaiáti kátkek iensewatatewenʼní꞉ioʼne tsi konwahnaskónʼni neh꞉ne tóhsa ahiótʼken nók akaiéna ne kahiatanerakwátsera rahonathatewenniʼhiótsera ne Rawenni꞉io sakoienokónha.

²² Asèken ionkwateriéntare nónwa tsi nióre niwatʼtháwi akwékon tsi nahoténson kasahánion ioroniáken tsi nihiokararénserons, kwáh tsi ní꞉ioht naiakowiraiéntaʼne.

²³ Nók iáh kíʼ nek khók tèken tsi nahoténsons ne kashahánion; onhtionháke nón nikénteron nonikónra, neh tewatierénta tesonkwáwis ne Rawenni꞉io káti ó꞉ni skát꞉ke tsi ionkwanikonranónwaks, tsi nihionkwárare ne Rawenni꞉io thoʼní꞉ioht tsi ahsonkwakenhénion tsi síken ní꞉ioht neh rahónha sonkwaiohokónhas íken, tánon ó꞉ni kwáh tewahiatakwékon tsi ahonsontatewenní꞉ioʼne.

²⁴ Asèken askanektserákon non nitsiawénon tsi tionkwaniakénʼen; nók tòhka aitewatkátho tsi nahóten tewaskáneks, kwáh káti iáh thènen askanéktsera tahonsakénhake, Asèken ónhka tsi nítsion tsi tewasʼkáneks nónen thènen iokwatʼkáton?

²⁵ Nók tòhka neh tewaskáneks tsi nahóten neh iáh tehionkwatʼkáthon, thetewahwisʼsátsʼte kíʼ tsi ionkwárare.

²⁶ Kwáh kíʼ neh saoríhwa nononikónra tewètha naionkwaiénawaseh, kwáh tsi ní꞉ioht tsi ionkwaʼtsihióha. Asèken iáh tehionkwateriéntare onhní꞉ioht tsi ahitewaterénʼnaien; íʼonhkwariwáke nonikónra tsi roniténtase ne Rawenni꞉io, tsi nihionikonranónwaks iáh taiewenʼnhatʼtshénri nehʼtaiéron.

²⁷ Tánon neh Rawenni꞉io, kwáh onhkweʼriah꞉ne non iatehakanere, rhoteriéntare tsi niwanonthónʼnions nonikónra; Asèken nonikónra ónhkwe ahkoriwake tsi roniténtase ne Rawenní꞉io tánon neh entsioʼhianénhawe tsi nihoskhanektseróten.

²⁸ Kwáh ohriwakwékons ionkwateriéntare ne Rawenni꞉io ioʼiáneres tsi nishakotsérahse tsi niʼiákon ne ronwanorónkwa, tsi niháti ne sakhoʼnháʼon, ne entioianénhawe tsi nihoskanektseróten.

²⁹ Tsi nihʼiákon ne Rawenni꞉io ónenk sakohiatarákwen tánon ó꞉ni sakokwatakwenʼni kwáh thoʼnahatiʼiatotenhake tsi ní꞉ioht ne Roiénha, neh káti neh Roiénha entakowanénke tsi nihátis nathatekénseras.

³⁰ Éhʼtho káti tsi niháti ne Rawenni꞉io sakohiatarákwen, iesakonáton; tánon tsi niháti ne iesakonáton, sahsakoriwakwathákwaʼse tsi natehóntere, tánon ó꞉ni tasakáwen neh rahohiatanerakwátsera.

Rahonháke Ne Ié꞉sos Kerístos Non Nihawenéston Ne Rawenni꞉io Tsi Nisonkwanorónkwa.

³¹ Tsi akwékon kíʼ neh tewanontónʼnions, onh nahóten aihtewahkwéni aihtewénron? Tóhkaʼ neh Rawenni꞉io tewakwékon, ónhka káti aiekwéni nahionkihiatʼkónten.

³² Sékon ó꞉ni neh kwáh roiénha iáh kih tehonónsthaton ne tóhsa aharoniáken, nók wahahónnien nahonthasónkwaʼne! Tsi wahshóntion neh Roiénha—iáh káti onhtèken ó꞉ni kwáh skenénstsi tsi entesóntion nohiáshon nihiorihoténsons?

³³ Ónhka ahiekwéni ahonwathiriwáhro neh Rawenni꞉io rahonkwetaʼsónha? Rahóna ne Rawenni꞉io sakoróris iáh tehothiníkon!

³⁴ Ónhka káti ónhte, ahiekwéni nahonwathiríwente? Kwáh iáh ónhka taiekwéni nahonwathiríwente, Kerístos Ié꞉sos rahónha neh rawenhéionʼne, tánon kíʼ áhre, tsi nikáien neh sonwakhétskwen tsi srónʼne tánon tsi raweientethákwen ne Rawenni꞉io ísrhes. Í꞉i onhkwariwáke tsi roniténthaʼse neh Rawenni꞉io rahohénton!

³⁵ Ónhka káti, ahiekwé꞉ni neh tahonwahsiotaríʼsih ne Kerístos tsi nikáien ne shonkwanorónkwa? Ne kariwahʼhétken ahkakwé꞉ni onhtèken, tòhka ó꞉ni neh thènen ahionkwanorónsten tòhka ó꞉ni neh thènen karonhiakénsera tòhka ó꞉ni natonkariákon tòhka ó꞉ni katentetserákon tòhka ó꞉ni ne thènen ahiotʼterontónhake tòhka ó꞉ni ne kenhéhiat?

³⁶ Tsi niwáton nohiatonseratokénti, “Kwáh tsi niatewenniseráke nonkwesónha teionkihionnaríkʼkons nahionkihiásehʼte níse sarihónʼniat; thonitiónkihte tsi ní꞉ioht ne teiotinakarontónha nakonwatírio.”

³⁷ Iáh, kíʼ noriwakwékons kwáh ionkwáien natesenniéntsera rahonháke tsi nikáien neh shonkwanorónkwahon!

³⁸ Kwáh wahkeriwaníron tsi iáh thènen takakwéni neh tahionkwakáshase tsi nòkwa ne rahononronkwátsera; kwa iáh thènen tewahsterístha tohkàken ahitewénheie tòhka ó꞉ni nahitiónʼnheke; ratironhiakerónons, ratirorásons, tánon neh tkasatsʼténseras ne karonhiáke iáh takakwéni ne tahionkwakháshases ne rahononronkwátsera, tánon tsi niʼiawénserons nónwa ó꞉ni tsi neniawénseron tsi niahawenonhátie iáh takakwéni ne tahionkwakháshion ne rahononronkwátsera,

³⁹ tánon iáh ó꞉ni tsi nahóten ne éhneken iothohetsʼtákwen ne tsi ionwentsiáte tòhka ó꞉ni nahóten ne nàkon iothohetsʼtákwen ne tsi ionwentsiáte takakwéni ne tahionkwakʼkháshion ne rahononronkwátsera ne Rawenni꞉io neh tsi Ié꞉sos Kerístos Sonkwaiáner sonkwasenhénʼni.