Romans 4 - Ohiatonhseratokénti

Tsi Nihawenéston Ne Abraham

¹ Nahóten ne Abraham neh thonwenʼhenthéston ahoriwakanónʼnike?

² Tóhkaʼ ahonsaonwatakwarísion rahohénton ne Rawenni꞉io, ahoientakéki knahótenk tahathaterénsaron. Nók iáh kíʼ tahakwéni tahataterénsaron rahohénton ne Rawenni꞉io.

³ Noriwatokénti wáton, “Ne Abraham tawethákwen꞉ne ne Rawenni꞉io, ne káti ne Rawenni꞉io wahokwénienste nahothonkwetakwarísion.”

⁴ Rónkwe ne roiótens rotʼkáriakʼse; ne rahokariáktsera iáh neh tekéntons tokàken ronwáhwi, nók ne kíʼ tsi knahótenk tehoténtsion.

⁵ Nók nónka ne rónkwe róien ne tewethákwen, iáh neh kahioténsera, Rawenní꞉ioke non nitawethákwen tsi nikáien ne rotʼróri neh iakoníkonh kwáh iáh othènen teiakosthónton, ne tsi thawetákwen thóhʼnon nihakenhénions ne Rawenni꞉io nek khók kakwénies nahonsahohianerásten tsi natehiátere.

⁶ Neh kíʼ rohthónhon ne Táwit neh꞉ne sahathárakwe ne rónkwe rahotsennonniátsera ne nónka akénhake ne Rawenni꞉io enhokwénienste tsi síken ní꞉ioht nahoriwakwarísion, kwáh iáh thènen tatekeníneren ne kahioténseras;

⁷ “Iakotáskats tsi niʼiákon ne Rawenni꞉io shesakonikónrense tsi natahonaterientawénrie, ne rahotiriwaneraháktsera rhoróron!

⁸ Rhotáskats ne rónkwe neh rahoriwaneraháktsera ne Roiá꞉ner iáh tahokontserhaserónʼnien!”

⁹ Kí꞉ken aktsenʼnonniátsera ne Táwit rhotarakwénʼne nek khók kén rahonáwenk ne ronwathiwarakwétaron? Iáh. Rhonónha ó꞉ni tsi nikáien ne iáh tehonwatiwarakwétaron rahonáwenk. Tetsionkwatnahnéten nohiatonseratokénti, “Abraham tawethákwenʼne ne Rawenni꞉io, tánon neh tsi tawethákwen Rawenni꞉io wahokwénienste tsi síken ní꞉ioht nahothonkwetakwarísion.”

¹⁰ Kátke kíʼ ehniʼiawénʼen? Ohénton kén káton kén onakènke ne Abraham sahonwahwarakwétaron? Ohénton, iáh onàken ken thoʼteiawénʼen.

¹¹ Oʼnhàken kén nihonwawarakwétaron, tánon tsi rhotewarakwétharon ne iawenéston tsi aonteriwanírate neh tsi tawethákwen ne Abraham ne Rawenni꞉io wahokwénienste tsi síken ní꞉ioht nahoʼthonkwethakwarísion nohénton sahonwahwarakwétaron. Rahóna káti ne Abraham neh kariwihiosthóntsera kanísera tiokwékthon tsi niʼiákon tiakawethákwen ne Rawenní꞉ioke tánon ó꞉ni raónha ne Rawenni꞉io ensakokwéniensʼte, iahwerhohátien tsi iáh teonwathiwahrakwétaron.

¹² Rahona ó꞉ni ronwaníha tsi niháti ne ronwatiwarakwétaron, iáh netèken tòhka kén neh tsi ronwathiwarakwétaron, Nók neh tsi kwáh éhʼtho ní꞉ioht tsi ronnonnhétie tsi thonethákwen nètho kanísera Abraham rónʼnhekwe nhohénton sahonwahwarakwétaron. Ne Abraham ne tsi tawethákwenʼne ne Rawenni꞉io wahaiéna tsi nahóten rhorahrátston ne Rawenni꞉io.

¹³ Rawenni꞉io rhorahrastén꞉ni ne Abraham tánon ne sakotereʼonkónhas ronónha rahonáwenk watónsere tsi ionwentsiáte, Ne karahratsthátsera tsi iothéson, iáh neh tehiorihónni ne Abraham tsi ratewennarákwaʼkwe ne kaianerénsera, nók neh iorihónni ne tsi tawethákwenʼne ne Rawenni꞉io ó꞉ni wahonwakwéniensʼte tsi síken ní꞉ioht nahothonkwetakwarísion.

¹⁴ Tóhkaʼ tsi nahoténsons ne Rawenni꞉io rahrarásta neh ahontahonwénnon tsi niháti ne rontewenʼnarhákwa ne kaianerénsera, knaʼkáti ne ónkwe ahkawethakwátsera iáh thènen tekástha tánon tsi nahóten ne Rawenni꞉io rorahrátston iáh kih thènen satekenaʼtèken.

¹⁵ Ne kaianerénsera iewathihéntʼthos ne Rawenni꞉io rahonakwátshera; nók kahnónwe ne iáh thènen tekaianerenseráien, iáh kíʼ thahónton taontsiáke ne kaiahnerénsera.

¹⁶ Ne karharaston neh tkanonhʼkonniáton ne tewethákwen, nehkáti, tsi kahʼkwatákwen nètho kahrharáston ónenk tsi neh ahkariwaniráton ne Rawenni꞉io kwáh iáh non꞉ne thènen tasakokaraiénhase neh Abraham tsi nienhatwatsirí꞉ne iáh rhonónhak khók ó꞉ni takénhake nenhontewénrarhakwe ne kaianerénsera, nók kíʼ tsi niháti neh enthonʼnétakwe tsi kíʼ nihoiéren neh Abraham. Asèken Abraham ne kariwihiostóntsera kanísera rothónʼon nonkwatiakhéson;

¹⁷ Tsi niwáton ne kahiatonseratokénti, “Í꞉se ne kanísera koniónʼni kwáh tsi niaʼteiakahontsiákes.” Kwáh káti ioiánere tsi niwarharáston rahohénton ne Rawenni꞉io, tsi thóhnon nitawethákwenʼne ne Abraham, raónha ne Rawenni꞉io tethesakóhas ne iakawenhéion nahonsahiontónʼnhete ó꞉ni tsi nikáien rotenʼnáhon nahontakáha tsi nahóten ne iáh tekaiéntakwe.

¹⁸ Abraham tarétakwe ó꞉ni wahaskáneke, iawerohátsien tsi iáh kanekahtewaterihónʼniskwe ne karahrhátsera, ehʼkáti nontáwe tsi wakaiéntaʼne; kanísera neh iaʼteiakahontsiákes, kwáh káti tsi niwáton nohiatonseratokénti, “Tsi iensatwatsirí꞉ne ehʼnenhatíhake tsi níkon hiotsistokwarónnions.”

¹⁹ Ónen akthóntie nénskat tewenniáwe satehahoserihiákon; nók neh rawetakwátsera iáh tetioseronnénton sahanonthónʼnionwe ne raiátake, ónenk thoʼsíhiot tsi síken ní꞉ioht naiawenhéion, tánon ó꞉ni neh tsi neh Sarah iáh tahónton ahiowiraiéntaʼne.

²⁰ Ne rawetakwéntsera iáh tehotewentéton, iáh tehoteʼnhowénton ne Rawenni꞉io rahorahrhátsera; ne rahwetakwátsera ne wakanhá꞉ne ne kasatsténsera, ó꞉ni wathonʼnonweráton ne Rawenni꞉io.

²¹ Kwáh oriwí꞉io rahonʼníhne ne Rawenni꞉io tsi thóh nenháiere tsi nihorahrátston.

²² Ne aoríwa ne Abraham, thóhʼnon ne tewetákwen, ne Rawenni꞉io wahokwéʼnienste nahothonkwetakwarísion.

²³ Tsi nikahiatónnion nhowenʼnasónhas iáh rahónhak khók tehoriwáke, ne tsi wahonwakwénienste nahothonkwethakwarísion.

²⁴ Í꞉i ó꞉ni onkwariwáke tsi nikahiathónnion thoʼnaionkihʼkwénienste tsi aionkwathonkwetaʼkwarísion, ne tsi rahónha tetsitewéthakwe tsi nikáien ne shokhétskwen ne Ié꞉sos Sonkwaiáner ne kenheiát꞉ne

²⁵ Ónhkwa riwaneraháktsera iorihonʼni꞉on iehonwatiakwarísion nahrénheie, tánon ó꞉ni shonʼionnhéton ne thoʼnahontáwe aonsaionkwaianeráke rahohénton ne Rawenni꞉io.