Romans 2 - Ohiatonhseratokénti

Rawenni꞉io Rahoriwentátshera.

¹ Níse ontiaténro, tehietʼtsiʼiatorétha kén nakorénsons? Kwáh iáh othènen tesáien nasaterahiátakwe. Áseh kén nónen tensehiatórete nakorénsons, nók thonishéra tsi nihatiʼhiéra, í꞉seʼkhók wasatatréwaʼte.

² Ionkwatheriéntare ne Rawenni꞉io tsi taiérits nónen tensakoiatórete nonkwesónha tsi niháti neh kén nienhothiʼiéren kiʼ nahorihótens.

³ Nók í꞉se ontiaténro, kwáh iatesháti ehnisaieránion tánon kíʼ kwáh nènne iaʼteseiatoréton nakorénsons! Ísere ontèken ensehseniákenʼne neh Rawenni꞉io rahoiatoretátsera?

⁴ Kátonkén skenrón꞉ni tsi niʼiókwas neh rahononronkwátsera, ronikonrí꞉io, ronikonkátsʼte. Oriwiʼiohónwe sateriéntare ne Rawenni꞉io tsi nitoriwaiéri Asèken rahtheniéntʼtha nahonsaiasárine nahonsahsatatréwate.

⁵ Nók iáh tatesahontakáronte tánon seriasáksen. Nekarihónʼnis, í꞉se satatonniénʼnis neh karewatátsera sénha tehiotenonhianíton tsi ní꞉ioht ne tewenʼniserónte nónen neh Rawenni꞉io rahonakwátsera tánon ne tkariwaiéri kaiatoretátsera enhiotásion.

⁶ Asèken ne Rawenni꞉io kwáh niatehionkwétake tsi tesakoriwaserákwaʼse entioʼianénhawe tsi naiakotiéren.

⁷ Rohnatiakhésons ne ronʼnónkwe nek rothiʼióte ne iohiánere, tánon ronʼnésaks neh kaiataterítsera, kakwenienstátsera, tánon ne hionʼnheónwe atónʼnhets; ronʼnónha ne Rawenni꞉io entesakáwen ne tsi nénwe enhonnónʼnheke.

⁸ Ótiakhes ne ronʼnónkwe ronatétʼtsen tánon ratiriwásons ne tkariwaiéris, neh enhathísere neh kariwáksen; rathiʼiátake ne Rawenni꞉io entʼtáweron ne rahonahkwáhtsera.

⁹ Enkaiéntake neh karonhiakénsera ó꞉ni ne kanonwakténtsera tsi niháti neh꞉ne enhotihióte ne kariwáksen, Nehʼne Sitaeró꞉nons entatihénte tánon ó꞉ni neh iáh tehatisitaerónons.

¹⁰ Nók Rawenni꞉io entʼthátkaʼwe ne kahiataterítsera, kakwenienstátsera, tánon ne skén꞉nen tsi nihiákon ne eniakohióten neh iohiánere, nehʼne Sitaeró꞉non entatihénte, tánon thóne ne iáh tehatisitaerónons.

¹¹ Ne Rawenni꞉io akwékon kwáh satetiót꞉te tsi tesakoiatorétha.

¹² Ne iáh tehatisitaerónons iáh tehatíhawe ne Mahís rahohianerénsera; rathiriwaneráhaks tánon kwáh rothiʼiatathónʼon. Ne Sitaeró꞉nons rathíhawe ne kaianerénsera; rathiriwaneráhaks nók kíʼ neh tehonwathiʼiatoretákwa ne kaianerénsera.

¹³ Rawenni꞉io iáh ne thèken tsi sakotakwarísions nonkwesónha tsi natehóntere ne rahónha tòhka kén ne tsi ronatahonsatáton ne kaianerénsera, nók ne tsi rathísere ne kaianerénsera tsi nihiotshate.

¹⁴ Ne iáh tehatiʼsitaeronons iáh tehathíhawe ne kaianerénsera; nók nónen kátkek thóh nenhothinikonráwen ehnenhathíʼiere tsi nihʼiótiate ne kaianerénsera, ronónhak thihontatianerenseronniénni, iahwerohátien tsi iáh tehathíhawe ne kaianerénsera.

¹⁵ Tsi nihatiweienʼnhótens wenéstha rahonerianésons non nikahiatónnion tsi nihiotiáte ne kaianerénseras. Rahonanontonniónseras non niwenéstha tsi éhʼtho ní꞉ioht, sewatiéren tsi ní꞉ioht tsi ronʼnontónnions nek khók eniakokʼkónten tánon sewatiéren ó꞉ni neh entiakó꞉ne.

¹⁶ Éhʼtho káti, tsi ní꞉ioht tsi kateriwanhótʼtha ne kariwí꞉ios, thóh káti nen hiotonhátie tsi nióre tewenniserónte nónen ne Rawenni꞉io, rahonháke ne Ié꞉sos Kerístos, tenhahiatórete tsi nihotiriwasehtánions nonkwesónhas.

Sitaeró꞉nons Tánon Neh Kahianerénsera.

¹⁷ Onhníse ní꞉ioht? Sitaeró꞉non satatenathónkwa; kaianerénsera seniahésen tánon thetserénsarons ne Rawenni꞉io;

¹⁸ Sateriéntare tsi nahóten raskáneks ne Rawenni꞉io naihsahióten, tánon sateweniéston ne kaianerénsera nasataterákwase neh tkariwaiéri.

¹⁹ Kwáh sateriéntare tsi í꞉se nasehiasárine ne teieronwékon, taseswatʼthéten tsi niháti neh tsi tetiókaras non nihónʼnes.

²⁰ Sehiatenikonráwis neh tiakotonʼnhót꞉te tánon serihonniénʼnis ne kenʼnitothiʼiónsa. Kwáh kén tokén꞉en sanikonraiéntas ne kaianerénsera ó꞉ni nathokhátsera tánon ne kariwakwarisióntsera.

²¹ Serihonniénʼnis nakorénsons—nontiéren tsi iáh níse tesataterihonniénʼni? Sateriwahnhótha, “tóhsa shenénsko”—nók senénskwas kén níse?

²² Sáton “tóhsa satenakwaiésat” nók satenakwaiesáta kén? Séswens ne kahiatonnisónhas—shenénskwas kén nononsatokentíke?

²³ Tesataterénsaron nasawáke ne Rawenni꞉io rahohianerénsera—nók tsiatehatha ken ne Rawenni꞉io tsi téshas ne rahohianerénsera?

²⁴ Tsi niwáton noriwatokénti, “I꞉se ne Sitaeró꞉nons sewaríwa, ne iáh tehatisitaeronons ronwasenʼnaksátha ne Rawenni꞉io.”

²⁵ Tohká꞉a satewenʼnarákwa ne kaianerénsera, tsi satewarakwétaron iorihontákwen; nók kíʼ tòhka꞉a iáh tesatewenʼnarákwa ne kaianerénsera, sénha iohiánere꞉ne neh tóhsa nonwénton ahiesawarakwétaron.

²⁶ Tóhka꞉a ne iáh tehoriwiʼióston, neh iáh tehonwahwarakwétaron, ratewenʼnarákwa tsi nihiótsiate ne kaianerénsera, iáh ontèken ne Rawenni꞉io thoʼtéhiot tsi ahokenʼénion tsi síken ní꞉ioht nahotewarakwétaron?

²⁷ Éhʼtho káti í꞉se ne sewasitaerónons neh꞉ne iáh tehotiriwiʼióston enietʼtsiríwente, neh tsi tesewaiákon ne kaianerénsera, iáh werohátien tsi kwáh sewahiatónnion ó꞉ni sewatatewarakwétaron, tsi náhe ronatewenʼnarákwe ne kaianerénsera, iáh werohátien tsi kwáh iáh tehonatatewarakwétaron.

²⁸ Ónka káti nekénhen ne kwáh Sitaeró꞉non akénhake, kwáh tókenske ronwahwarakwétaron? Iáh nek tèken tòhka ken nek khók nátste nòkwati tsi Sitaeró꞉non íken,

²⁹ Neh꞉ne kwáh tokén꞉en ronwahwarakwétaron, tsi niʼiáwens, ne kwáh Sitaeró꞉non neh꞉ne kwáh raweriá꞉ne íken, neh kíʼ tsi kwáh raweriáne thoʼtákwen tsi ronwahwarakwétaron, neh꞉ne Rawenni꞉io Rahonikónra thóh nihióson, nók iáh tsi nahóten ne kahiatónʼnion neh kaianerenserákons. Kíʼ rónkwe raiénas ne rahorensaróntsera neh꞉ne Rawenní꞉ioke néntewe, iáh nonkwé꞉ne.