Romans 16 - Ohiatonhseratokénti

Kór Watesakonónweron Niateionkwétakes Ne Rome

¹ Tewakatonwentió꞉ni nakíron thíken tewatenosénha Phoebe, tsi nikáien iakoteríhonte tionterennaientákwa ne Cenchreae kwáh íken tsi tionkwetaiéri.

² Teietʼtsiʼiaróhton rahosénnakon ne Roiá꞉ner, tsi nihonateriwaiénni ne Rawenni꞉io rahotiókwa, tánon ietʼtsiʼiénawas tsi nahóten taiakotonwentionníhake, Asèken nakahónha tehionteroserowánen tánon ó꞉ni ní꞉i hiontiénawaʼse.

³ Iáh thekenonwerátons ne Priscilla ó꞉ni ne Aquila, ne skát꞉ne ionkwáiote tsi sakwahiótense ne Kerístos Ié꞉sos;

⁴ Ehkenonnhárakwe ní꞉i akeriwáke. Éso tsi tekenonwerátons—iáh tewakonwáʼkok, nók akwékon ne tsi ronterennaientákwas ne iáh tehatishitaeronons.

⁵ Tekenonweráthons ne thonetákwen tsi rahotinonskónsons non niʼonterénnaiens kwáh tsi ní꞉ioht ne ononsatokentíke. Tekenonwerátons nakaterósera Epaenetus, rahónha ne totserenton tsi watonhontsaien ne Asia tahawetakwe ne Kerístos.

⁶ Tekenonwerátons ne Onwári, tsi niaʼteiakotátʼtsahaton ietʼtsihiótense.

⁷ Tekenonwerátons nònʼne ne Andronicus ó꞉ni ne Junia, Sitaeró꞉non nateniʼiatóten tsi ní꞉i ní꞉ioht skát꞉ne iakwanhótonkwe; kwáh íken tsi ronwatiʼientéris ne ronteriwanhótʼtha, rohnónha rothihénton rotiriwiʼiostáʼon tsi ní꞉i ní꞉ioht.

⁸ Tehinonweráthons neh Ampliatus, nakateroseranóron Roiá꞉ner tehonateriwasóntere.

⁹ Teihnonwerátons nònʼne ne Urbanus, skát꞉ne ionkeníʼiote ne Kerístos rahoʼioténsera, ó꞉ni nakateroseranóron Stachys.

¹⁰ Teihnonwerátons ne Apelles, rawenéston tsi nihoriwatóken tsi nòkwa ne Kerístos. Tekenonwerátons ónhka ne Aristobulus rahowátsire akénhake.

¹¹ Teihnonwerátons ne Herodion, Sitaeró꞉non nahaiatóten, ó꞉ni neh rotiriwiʼióstons ne Narcissus rahowátsire.

¹² Tekenonwerátons ne Tryphaena ó꞉ni ne Tryphosa, Roiá꞉ner ronwahiótense, tánon ne ahkateroseranóron Persis, tsi niʼiawetowánen rohiótense ne Roiá꞉ner.

¹³ Iahihiateniétaʼse nateraswiʼiohiótsera ne Rufus, rahónha ronwaiatarákwen ne rohiótense ne Roiá꞉ner, tánon ó꞉ni neh ronisténha, tiókonte thóh ní꞉ioht tsi tehionkʼkánere tsi síken ní꞉ioht ne iontsénha.

¹⁴ Tekenonwerátons ne Asyncritus, Phlegon, Hermes, Patrobas, Hermas, tánon akwékon neh ronátiakes ne rothiriwiʼióstons ne ratikwekonháties.

¹⁵ Tekenonwerátons ne Philologus, ó꞉ni ne Julia, ó꞉ni ne Nereus tánon ne iatenosénha, ó꞉ni ne Olympas, tánon akwékon ne Rawenni꞉io rahonkwetaʼsónha ne ratikwekonháties.

¹⁶ Tesewatatenorónkwat. Kwáh ratikwékon ne Kerístos raotiókwa iahitsiʼiateniétaʼse ne raotinonronkwátseras.

Onakènka Iaʼonniatonhátie Karesarontiéra

¹⁷ Wakwaretiáron, tewatenrosónhas; ietsinikonráʼrak tsi niháti ne tehatinenratkhásons ó꞉ni sakotinikonraksáta nonkwesónhas

¹⁸ Asèken ónhka ne thóh niʼieweiennóten iáh kíʼ Kerístos sonkwaiáner tehonwahiótense, nók nek khók ronnonthónnions tsi nahóntiere ó꞉ni nahóten ahónneke. Kawenníʼios rónstha ó꞉ni tekarénsaron tsi ní꞉ioht tsi rontátis sakotinikonrahténnis ne tionkwetaiéris.

¹⁹ Akwékon iakoriwarónken tsi nisewariwatóken tsi nòkwa ne oriwatokénti, neh kíʼ karihónnis tsi niwakatʼtsennónni níse sewariwáke, tewakatonwentió꞉ni naihsewanikonrowanénhake tsi nòkwati ne ioʼiánere, nók tóhsa tesewawénrie ne wahétken.

²⁰ Tanon Rawenni꞉io, neh nonkwaiatakweniʼióhtsera ne skénnen, kwáh iostóre tenhoskwaserónkwaʼte ne ranesonrónon ne sewasitókon. Ne rahoténrat ne Sonkwaianer Ié꞉sos sewakweʼkónhak.

²¹ Timothy, ne skát꞉ne ionkeniʼióhte, tetsisewanonwerátons; ne non꞉ne sáka ne Lucius, Jason, tánon ne Sosipater, rasitaeronon.

²² Í꞉i kiken Tertius, wakʼkhiáton kiʼkahiatónsera tsi niháwen ne Kór, takwehiárak tsi wakeriwiʼióston.

²³ Gaius, tsi ronnónshote non niwakataweiáthon, tetsisewanonweráthons, Erastus, tesakokʼwistanonnáhani ne kanáta, tánon nonkwatatekénhas Quartus teietʼtsinonwerátons.

²⁴ Ne rahoténrat ne Sonkwaiáner Ié꞉sos Kerístos sewakwékon sewakwekónhak.

Tsi Ieʼiotéson Kór Wathononweráton Ne Rawenni꞉io

²⁵ Ánion tsi tewasénnaien ne Rawenni꞉io! Rokwénion nahiónnen nasesátsʼteke tsi tisetákwen, tsi ní꞉ioht tsi kateriwanhóta ne karihwí꞉ʼios ne Ié꞉sos Kerístos rahoriwáke ó꞉ni ne karihotasiónkwen tsi nikariwashétonʼne ne tkariwaiéri tsi nitsawénon.

²⁶ Nók kíʼ neh tsi nihotihiathónnions ne rothitokenséhakwe ne iorihónni iakotiokowánen nonkwesónha aiakonikonraiéntaʼne nʼoriwíʼio; ne ronnheʼónwe Rawenni꞉io rotennáʼon kwáh ken tiokwakwékon aiakoteriéntaraʼne nʼoriwíʼio, nekáti nakwékon ahontahonwétaʼkwe ne Rawenni꞉io ó꞉ni ahonwawénnaraʼkwe.

²⁷ Nek khók rahonhatsíwa Rawenni꞉io, rahonhatsíwa khók ronikonrowánen, ne kaiatanerakwátsera rahonháke ne Ié꞉sos Kerístos ne tsi nenhwen. Éhʼtho naiáwenʼne.