Romans 15 - Ohiatonhseratokénti

Taietʼtsinikonraiérit Nakorénsons, Nók Tóhsa Níse

¹ Tsi nítsion ne tewasátsʼten tsi nòkwati ne tewethákwen aiehthiriwáhwaʼse ne rotitsihióha naihtewatʼkéthaʼte ne rahothiriénʼnas, Iáh tatehiothonwentióʼon nahitewathatenikonraiériʼte.

² Khék, teiothonwentióʼon nakorénson aonʼtaietʼthinikonraiériʼte tsi nikáien ne thothinikonrakontákwen tsi ronnónha rahothiʼiatakenhátsera, ehnahontáwe ahathisátsʼtenʼne tsi nòkwati ne tewehthákwen.

³ Asèken ne Kerístos iáh rahónhak khók tethotʼthatenikonraieríton. Khék, tsi niwáthon noriwatokéntis, “Tsi nahóten iesénʼni nonkwesónha neh sahesanikonrakaréwaʼte ónen í꞉i sontiatakári.”

⁴ Kwáh tsi niateioriwáke kaiatónnion nohiathonseratokentíke neh kahiathónkwen naionkwariʼhónnien, ehnaʼontáwe nonʼtiérenk aionkwarahratieraiéntaʼne tsi nitsionkwáwis noriwatokénti naionkwanikonkátsʼteke tánon ó꞉ni ionkwaretiárons.

⁵ Tánon ionkwaterennaiéntat rahonháke ne Rawenni꞉io, tsi nón tkáien ne kanikonriʼiótsera tánon ne kanikonranirátʼtsera, aihsewaiénawaʼse sakanikónrak akénhake, ehʼnahisewáiere tsi nihoiéren ne Kerístos Ié꞉sos,

⁶ Kwáh káti sewakwékon iatahisewátieste skanikónrak akénhake tsi atsisewasénnaien ne Rawenni꞉io ó꞉ni neh Roiénha ne sonkwaiáner Ié꞉sos Kerístos.

Ne Kariwíʼios Ronwathiróri Nòn꞉ne Neh Iáh Tehotiriwiʼióstons

⁷ Tesewatatʼkweniénstak, etʼthóhʼne, káti, kwáh tsi ní꞉ioht ne Kerístos tsi ehtsisewakweniénston; thóh nasewáier ehnahontáwe nonkwesónha tahonwanonweráthon ne Rawenni꞉io.

⁸ Asèken kwahróris ne Kerístos tsi rónʼnhekwe ne nòn꞉ne sakoiotenséhaʼkwe ne Sitaeró꞉nons, ne naréneste neh Rawenni꞉io tsi roriwatóken, neh kíʼ, nahónton tsi nahóten ne Rawenni꞉io sakorarasténni ne ronwatinihokonkénhens ehnaiáwenʼne,

⁹ tánon nahothiʼiénawaʼse ne iáh tehatisitaeronons ne tahonwanonweráton ne Rawenni꞉io rahotanitenráhtsera. Tsi niwáton noiatonseratokénti, “Tanon káti nónen skát꞉ne iákwes ne iáh tehatisitaerónons tenkonnonweráton; tenkonriwáhkwaʼse.”

¹⁰ Àrok sékon sewáton noiatonseratokénti, “I꞉se ne iáh tesewasitaeronons, skát꞉ne sewatonnharónnion ne Rawenni꞉io sakoiatarákwen!”

¹¹ Tánon àrok sékon, “Thetsisewanonweráton ne Roiá꞉ner, sewakwékon ne iáh tesewasitaeronons; tsi sewasénnaien, kwáh sewentiokwakwékon!”

¹² Tánon áreh, tsi niháwen ne Isaiah, “Tsi nithotwahtsirínon ne Jesse enhatotáshon, Éntʼreh nasakohentéseh ne iáh tehatiʼsitaerónons, tánon rahonháke non nenhatíʼien neh rahonaskanéktseras.”

¹³ Rinekénnis ne Rawenni꞉io, tsi nikáien tesonkwáwis naskanéktseras, ahiaiatánaʼne natʼtsennonniátseras tánon ne skénnen neh tsi nitseniahésen, neh káti ne iakakontákwen nahontehiáron ne saskanéktsera neh akenikwékon ne rahosatsʼténsera ne Ronikonriʼióston.

Kór Ranikonraientátha Nontiéren Tsi Rothetsaníton Tsi Nihohiatónnion

¹⁴ Tewatenroshónhas: kwáh iaʼtetiáti keriwanírats ne tionhakésons kwáh íken tsi sewathonkwetakwaríshons, akwékon niesewáhaʼwe natʼthokhátsera, tánon ó꞉ni sewakwénion ne taisewataterihónnien.

¹⁵ Nók neh kikahiatónhsera kwáh iáh othénen tewakótaron tsi nahorihoténshons sakwehiarákwen, kwáh íken tsi iewakenikonrakontákwen neh karihónnis tsi nikahiotenserótens ne Rawenni꞉io rakenáhon.

¹⁶ Ne tsi rihiótense ne Kerístos Ié꞉sos nakhehiótense ne iáh tehatiʼsitaeronons. Watsióte tsi ní꞉ioht ne ratsihénstatsi ne kateriwahnhótha ne kariwí꞉ios ne Rawenní꞉ioke nitsawénon, ehnahontáwe ne iáh tehotiʼiánere nahontatiatakéna nahontahonwanikonraiériʼte ne Rawenni꞉io, neh tsi nihoriwathokenstén꞉ni ne Ronikonriʼióston ne Rawenni꞉io.

¹⁷ Tsi teiakeníkʼken ne Kerístos Ié꞉sos, nekíʼ, enkʼkwé꞉ni nakenaiéhake tsi rihiótense ne Rawenni꞉io.

¹⁸ Entewakenikonrahkontákwen ó꞉ni nek khók enkatróri tsi nihoiéren ne Kerístos nakonháke nakheiasáriʼne ne iáhʼtehatiʼsitaeronons neh꞉ne ahonwawénnaraʼkwe ne Rawenni꞉io. Neh iorihónʼni tsi nikawennhóten wakathatíhon ó꞉ni nakeweiénʼna,

¹⁹ Ne kasatsʼténsera tsini watieronnísta ne ioriwanerakwaténions, ó꞉ni nahosatsʼténsera ne Rawenni꞉io Rahonikónra. Tanon káti, tsi nitewakatʼtahínon ne Jerusalem tsi nióre ne Illyricum, kwáh tewakeriwasaháthon tsi wakateriwánote ne kariwí꞉ios ne Kerístos rahonháke.

²⁰ Énskat khók tsi nahóten tiókonte kaskáneks neh꞉ne akateriwanóten ne kariwí꞉ios tsi nonwésons ne iáh nonwénthon tehonwasennarónken ne Kerístos, neh꞉ne tóhsa tahontakatnanétha nakorénson tiakotásaʼwe.

²¹ Tsi niwáton nohiatonseratokénti, “Tsi niʼiákon ne iáh tehiontatróri ne Rahonháke enhiontkátho, tánon tsi niʼiákon ne iáh teiakonrónken eniakonikonraiéntaʼne.”

Kór Raskáneks Nahanátara Ne Rome

²² Tánon káti éso ioriwáke wakatenikonrónni niakwanatarénaʼse nók knahótenk tiókonte watiotátisʼkwe.

²³ Nók kíʼ ónen wákson natioténseras nakʼtéson nonwéson tánon kíʼ ó꞉ni tsi ónen wéso ioseráke shikaskáneks ne iakwanatarénaʼse,

²⁴ Ónen káti aiáwens ehnaiáwenʼne. Tsi ní꞉ioht ne iakatʼtakwaríshaʼte ne Spain, tewakathonwentió꞉ni ne iatátʼtaʼne iakatketótaʼtse nohénton ne Spain niáke, tánon naskwaiénawaʼse ne thóhʼnon niáke, neh kíʼ nónen ienʼkwa ken nikariwésha ienkwanatarénaʼse.

²⁵ Nók kíʼ ónenk, Jerusalem niahonkenonhátie niaʼkehiótense ne Rawenni꞉io rahonkwetaʼsónha nehnónwe.

²⁶ Asèken ne tionterennaientákwas ne Macedonia tánon ne Achaia kwáh íken tsi iatehotiriwaiéntaʼse nasakotisniénon ne iakóten ne Rawenni꞉io rahonkwetaʼsónhas ne Jerusalem.

²⁷ Kwáh ronónha iatehotiriwaiéntaʼse; nók, kíʼ tsi nihióta, kwáh ronateriwaiénni naʼsakotisniénon. Ne Sitaeró꞉nons tesakonarehniaténis ne iahʼtehatiʼsitaeronons tsi nahoténsons ne iohiáneres ne Rawenni꞉io totkáwen ne rahonatónnhes, ne iáh tehotiʼiánere ne thonetákwens, nekáti, akarihónni nasakotiʼiénawaʼse ne Sitaeró꞉nons ne thonetákwen nasakónon tsi natahonatonwentiónike niaʼtewenniseráke.

²⁸ Neh nónen enkeriwaiériʼte kí꞉ken kahioténsera tánon enthekheiáwi nowísta ne ronwatirohróki, ehʼthóhʼne káti Spain non nienhénke tánon iekwanatarénaʼse tsi niahonkenonhátie neh non.

²⁹ Nónen ienkwáken, wakateriéntare tsi kwáh enkanánon enkháwi ne Kerístos rahohiataterítsera.

³⁰ Wakwaretiáron, tewatenrosónhas, neh tsi tetsitewetákwen ne Roiá꞉ner Ié꞉sos Kerístos tánon ne aoríwa tsi nitionkwáwis nètho onikónra, wakwaretiron skát꞉ne aihtewaterénnaien kwáh ahontaionkwanikonrakontákwen rahonháke ne Rawenni꞉io askwaterennaiénhase.

³¹ Sewaterénnaien ne tsi niháti ne Judea ne iáh tethonwetákwen ne Ié꞉sos Kerístos tóhsa aiontkaréwate, tánon ó꞉ni ne Rawenni꞉io rahonkwetaʼsónhas ne Jerusalem nahontsennónni nahatiʼiéna naʼtsenawasétsera.

³² Tanon káti thóh iénke kwáh enkananonhátie natsennonniátsera, thóh nithonikonriʼióʼon ne Rawenni꞉io, tánon tsi ienkwanatarénaʼse

³³ Nakaterénnaient ne Rawenni꞉io, nonkwaiatakweniʼiótsera ne skénnen, ákwe aihsewakwekónhake.