Romans 13 - Ohiatonhseratokénti

Kaiotenserasónhas Tsi Nòkwa Neh Kakorásera Ahoianerénseras

¹ Kwáh iatehionkwétake ónenk tsi enhiontewénʼnaraʼkwe ne kakorásera ahoianerénseras, ne tsi iáh thakaianerenseróten takátake neh iáh Rawenni꞉io tahoriwíson, tánon tsi wahthátie neh rathikoráhsons neh kíʼ tsi Rawenni꞉io tesakówi.

² Ónhka kí꞉ken tenionteriwahrénho tsi roteríhonte neh rakóra ieriwáhias kíʼ tsi nahóten ne Rawenni꞉io rorákwen; tánon ónhka kí꞉ken neh thóh nenʼiéhiere rahónhak khók tehathatiatoréhtha.

³ Neh rathikóras iáh thateiothonwentsióhon nahonwathitsianíhseʼke nónka neh iohiánere tsi nihontiérha, nók neh tsi niháti neh kariwáksen tsi nihontiérha. Asenónweʼne kén níse neh tóhsa ashetʼtsaníhseke ne rathikóras? Neh kih thóh náhtier neh ioiánereh, ó꞉ni teniesarénsaron,

⁴ neh kíʼ tsi Rawenni꞉io rahonkwetaʼsónhas í꞉se sariwáke tsi rotihióte. Nók tokáha kariwáksen tsi nensátiereh, ehʼthóhʼne kíʼ setʼtsanísek, Asèken neh rahothisasténsera kwáh íken tsi hioníron nensakotiréhwaʼte. Rawenni꞉io seh rahonkwethasónhas tánon Rawenni꞉io rahorehwahthátsera rónstha nónka ensakotiréhwaʼte ne kariwáksen tsi nenhóntiereh.

⁵ Neh kíʼ ahoríwa tehiothonwentsióhon nahsehwénʼnaraʼkwe neh rathikorásons—iáh nek khók tèken tsi Rawenni꞉io rahorewathátsera, nók neh kíʼ ó꞉ni kaiatorehthátsera aoriwáke.

⁶ Neh kíʼ aoríwa sewakáriaks ne kaienthátseras, Asèken neh rathikorásons Rawenni꞉io ronwahiótense nónen enhatiriwaiériʼte ne rahotihioténseras.

⁷ Sewakáriak, káti, nahóten neh sewatkárote; ietsikáriaks ne iaʼtesewaiáti ó꞉ni ne sewaienthátseras iotkárote, ó꞉ni sewénest ne kakweiensthátsera tánon ratikwékon ietʼtsikwéniens.

Tsi Nisewahiotenserótens Tsi Naʼtesewáterhe

⁸ Kwáh tóhsa kanèka nónhka aietʼtsikarótani—nek khók aihsewatkarótake neh tsi natahisewathatenorónkwaʼke. Nónka kí꞉ken neh thóh nenháiere rotewennarákwen neh kaianerénsera.

⁹ Ne kaianerénseras, “Tó꞉sa shatenaʼkwaié꞉sat; tó꞉sa shehiá꞉set; tó꞉sa senénhsko; tó꞉sa sehiaskà꞉nek nakorénhson nahó꞉ten ahiakoiéntake,” oriwakwékon kí꞉ken, tánon ó꞉ni nohiásons sékon akénhake, akwékon tkakwékton nénskat atsiawenrátʼtsera, “Senorónkwak ne tesanonsanéken tsi níse nisathatenorónkwa.”

¹⁰ Tóhka shenorónkwas nakorénsons, iáh nonwénton thashenikonráhten; nhashenóronkwe, káti, nehʼne kwáh kahianerenseraʼkwékon tsi ensatewénnaraʼkwe.

¹¹ Tánon ken nahisewáiere, ne tsi sewateriéntare tsi niʼiowistáhe nónwa; ónen iakáhewe nahisewatʼkétsko tsi nisewéntaskwe. Asèken nenwenʼniseráteke nónen ne Rawenni꞉io enseshonkwaniákenʼte ónen sénha ákʼta íwas tsi ní꞉ioht ne kwáh shonthontiérenʼte shonthatsitewéthaʼkwe ne Ié꞉sos Kerístos.

¹² Kwáh tsi shíken ní꞉ioht nashontʼténʼne íwere tahioswátʼtheʼne, tánon nennísera skanóronks áhonwe. Ánion ietewárek tsi nihioʼiontenseróhtens nashontenʼnékha. Ánion thetéwak ne ionteriʼiosthákwas naihtewateriʼiósthaʼkwe nentiékheʼne.

¹³ Ánion tkariwaiérik tsi tiónʼnhek, tsi teioswátʼthe nonnitionʼnhétie iáh neh tsi tetiókaras: iáh ó꞉ni neh thiʼiohriwatesónha tsiʼni ienekirátha, iáh neh kanhakwaiesátsera tòhka ó꞉ni ne iáh tehioteriwatʼtkwéniens, kaserohénsera, kanaiésera.

¹⁴ Nók tesathatékwas neh ratheriʼiosthákwas ne Roiá꞉ner Ié꞉sos Kerístos, tánon sátkaf tsi ne sanontónnions ne sariwanerahákʼtsera ó꞉ni nahontasathatenikonraiériʼte tsi nahóten saskáneks.