Romans 1 - Ohiatonhseratokénti

Kór Tsi Niesakohiatónʼni Ne Romeʼró꞉nons

¹ Kór kih non nitsiawénon, rannhátsera, tsi ronwahiatarákwen neh꞉ne ahosenʼnénhawe ne Kerístos Ié꞉sos tánon Rawenni꞉io rohiotenseráwi nahoteriwahnhóthase ne karihwí꞉ios.

² Rawenni꞉io wahónniʼse tsi náhe thoʼrharátsthon ne karihwí꞉ios tsi nithotíha neh rahonhatserasónhas ne iehatiriwákens, tsi nikahiatónʼnions neh ohriwatokentísons.

³ Ne seh kariwaientákwen neh Roiénha, Sonkwaiáner Ié꞉sos Kerístos; tánon tsi nithotenekwensinon, tsi rawenʼnakeráton neh꞉ne Táwit non tahawatsiratátie;

⁴ tsi nitóha neh Niió꞉ne ne Rahohiatatokentítshera, Rawenni꞉io warhotáshon neh kasastenserowánen tsi raónha seh ne Kanísera tsi sonwakétskwen ne Roiénha ne kenheiátne.

⁵ Rahonháke non ne Rawenni꞉io tahákon natatewennihiótsera neh꞉ne akateriwanhóten ne Kerístos rahoriwáhke, Neh nahontáwe nakehéntense ne kwáh tsi niateʼiakahóntsiake nahontaʼiakétakwe tánon naiontewénʼnarakwe.

⁶ Í꞉se ó꞉ni thosewaiátareh tsi nítion neh Rome nónwe nisewanákereh, ónhka ne Rawenni꞉io iesakoʼnháton ne Ié꞉sos Kerístos rahonkwéta aiónton.

⁷ Kwáh káti sewakwékon tsi iakwahiátonse neh thonónwe Rome Rawenni꞉io tsi sewanorónkwa ó꞉ni tsiʼsewahonkaráwis neh rahónha rahonkwéta aisewáton: Aiáwens ne Rawenni꞉io sonkwaníha ó꞉ni ne Roiá꞉ner Ié꞉sos Kerístos ahtsítsion kenténrat ó꞉ni skénnen.

Aterénʼnaient Ne Kanonweratóntsera

⁸ Tiotierentákwen, Tehinonwenráthons Nakení꞉io rahonháke ne Ié꞉sos Kerístos neh kwáh sewakwékon, Asèken ohontsiakwékon iakoronkenhátie tsi nithiʼsewehthákwen.

⁹ Rawenni꞉io seh rakeriwanirátis tsi nahóten káthons tsi oriwíhiose—rahónha ne Rawenni꞉io tsi nikáien rihiótense neh kwáh akeriasakwékon tsi ní꞉ioht tsi kateriwanhótha ne karihwí꞉ios tsi nòkwati neh Roiénha. Rawenni꞉io rotheriéntare tsi kweʼiáre.

¹⁰ Kwáh tsi nihioriwáke enkaterénnaien. Keriwanóntons ne Rawenni꞉io rahonikonrihiótsera ónen nahónton ní꞉i iakwanatarénase.

¹¹ Kwáh íken tsi tewakatonhontióni nakwáken. Thoʼnahóntawe skátne ne karihwiʼiostontsherákon tsi aihtewathonʼnáren nehne aihsewahsátstenʼne.

¹² Nahóten kítons tewakwékon skátne tsi enhionkihiathakéna, í꞉se enkénhake naketakwéntsara ó꞉ni Í꞉i enkénhake ne tsi thisewethákwens.

¹³ Ónenk tsi ensewehiárake, tewatatékens, é꞉so ioriwáke wakatenikonrónni niaʼkwanatarénase, nók knahótenk tiókonte watiotátiskwe neh nátiere. Tewakatonhontió꞉ni nakeiatkwéni naʼkeriwiʼiosthontserateni neh skátne sewanákereh, tsi niwatiéren nakʼtéson nónwe neh iáh tehatisitaeronons.

¹⁴ Asèken kwáh tsi niatehionkwétakes tsi wakateriwaiénʼni, tsi nòkwati ne rothiʼianerenserí꞉ios ó꞉ni ne karakonróhnons, tsi nòkwati neh rathihiatonseraientéris tánon ne iáh tehonatheriéntare.

¹⁵ Thoʼkáti, kwáh tewahsʼteríhens nakateriwanhóten ne karihwí꞉ios ne tsi nítion ne Rome nónwe nisewanákere.

Ne Nahosatsténsera Ne Kariwí꞉ios

¹⁶ Asèken iáh tekatéhense ne kariwiʼiósthotsera; neh ne raotsténsera íken ne Rawenni꞉io ne naʼkoʼienawahséntsera nonkweʼtakwékon ne iakóien tewetáhkwen, ne ne ratisitaʼero꞉nons entʼthontiérenhte ethoʼne ne iáh tehatisitaeronons.

¹⁷ Asèken thóh í꞉wa ne raoriwakwahrishióntshera ne Rawenni꞉io tsi iawehnéston iatehiahotʼkáwen ne tewetáhkwen ne tewetáhkwen; tsi nikahiatónkwen, “Ne tionkweʼtaié꞉ri thóh ne nón꞉we nironhnonhnhétse tsi nithanetákwen.”

Rahonatʼkarónʼniat Nonkwesónha

¹⁸ Rawenni꞉io rahonakwátsera kwáh iotenéston tsi nitiosénʼen ne karonhiáke tsi nihiotkónte oriwakwékon ne kariwáneren ó꞉ni tsi niʼienikonrahétkens nónkwe ne tsi niʼhathiweienʼnáksens rathiʼhiótats neh kariwakwarishióntsera nakatokénʼen.

¹⁹ Rawenni꞉io sakorewátha, Asèken nahóten naiotónhon nawenéston tsi nòkwa ne Rawenni꞉io kwáh nenne iáh thènen tekéntons ne ronónha, Asèken rahonhatsíwa ne Rawenni꞉io ronikonraientáton.

²⁰ Tsi náhe tahonwentsíson ne Rawenni꞉io, kwáh thokénʼen nonkwesónha aiakonikonraiéntaʼne neh rahosatsténsera iáh nonwénton tiewathótʼtha tánon kwáh ó꞉ni oriwihioʼonwe tsi rahónha neh Rawenni꞉io íken. Kíʼ nahorihoténsons iáh tahónton naiontkátho, nók enwáton kíʼ naieiéntereʼne ne kíʼ enkakwéni nahonwaiénteraʼne ne Rawenni꞉io ne tsi nahoténsons ne Rawenni꞉io rosahánion. Kwáh káti iáh othènen tehonatesénʼnaien nahatirahʼiátakwe.

²¹ Ronwaientéri ne Rawenni꞉io, nók iáh kíʼ theʼtonwáwis ne kakweniesthá꞉tshera tsi natehiothonwentióʼon, tóhkas ó꞉ni tahonwanonweráton. Sénha wahathitaráhetʼte tsi nihonanonthonniontserótens tánon ononwaroríhta iahónton tánon tsi iáh thènen tèwah ne rathinontsínes neh káti kananónkton ne kariwáksens.

²² Ronthon rontʼthókas, nók kíʼ thoʼnathónʼnhokʼte;

²³ tsi ní꞉ioht nahonwasenʼnaiénseke neh ronʼnheónwe Rawenni꞉io, kahiatonʼnisónhas konwasénʼnaiens thóh ní꞉ioht tsi kasahánion nehne tahonsaontiérenkes ne ronʼnihéions ronnónkwe tòhka ó꞉ni neh otsiténhas tòhka ó꞉ni ne katʼtsénens tòhka ó꞉ni neh oniaresónhas.

²⁴ Ne ronʼnónkwes ne tsi nitonathónʼnhokte, Rawenni꞉io tiesakotkáwen neh꞉ne ahothihióten ne tehioriwátsions tsi nitonskáneks ne rahoneriáne, tánon kwáh atehenserákon tsi nihontiéras tsi natehóntereh.

²⁵ Ne tehontathawísta ne Rawenni꞉io rahoriwakwarishióntsera ne ohnhówen; neh konwasénʼnaiens tsi nahoténsons ne Rawenni꞉io rohsahánion tsi ní꞉ioht neh raónha ahonwasenʼnaien tsi nikáien neh kwáh raónha rohsahánions, neh꞉ne raónha ahonwasénʼnaien tsi nénwe! Éhʼtho naiewen꞉ne.

²⁶ Ne tsi éhʼthoh nihathiʼhiéra ne ronʼnónkwes, Rawenni꞉io tiesakotʼkáwen ne tahontathaskanéksʼseke. Iehióhe nòn꞉ne neh tionatʼthonwísens kontatenikonrothákwas nákonsthe tsi naʼtehiotonhontióha nakontʼwatsirónni ohiaʼásks wahothinonwáthaʼne.

²⁷ 5 Kwáh nòn꞉ne neh sákat ne ronʼnónkwe wahontiakwaríshi tsi nihiorenʼnáhon nahonteroserónni neh tsionatʼthonwísen, nehne tahontathaskáneke. Ne ronʼnónkwe wahothinonwátaʼne nònne, tsi káti naháwenʼne rohnónha ó꞉ni wahonwathiréwate tsi natehonaténtion tsi nihathiwenienʼnáksens.

²⁸ Nonkwesónha tsi ratiriwásons nahonʼnonthónnionwe ne kwáh thokénʼen ahonwanikonraiéntaʼne ne Rawenni꞉io. Tóh nòkwa iesakotʼkáwen tsi nòkwa neh rathinikonrahétkens, neh tsi éhʼtho nihathiʼiéra tsi nahoténsons neh iáh tatehiotonwentióhon neh nahathiʼiéreh.

²⁹ Ne rathihiatanánon neh niateʼioriwákes neh kariwaneraháktseras, wanonthonniontseráksens, ronaskéʼnaʼse tánon kanakwátsera; kwáh rathihiatanánon neh kanosátsera, asakonásehthe, ronaterihioháties, rathinikonrátha, tánon rathiseróhen. Rothiriwakáte,

³⁰ tánon tehontathanowenténis; ronwásons neh Rawenni꞉io, rothiʼianerenseráksen, rontatónni, tánon rathináie; sénha ne é꞉so rononthonniónkwa onhnahatíʼiere ne wahétken; iáh tesakothiwenʼnarákwa neh ronwathiʼienhokónhas;

³¹ rathinikonráksens; iáh tehotiriwahtóken, tánon iáh ó꞉ni tehonnenéstha nahontahothiriwaiérike tòhka ó꞉ni nasakothítenre nakorénsons.

³² Ronateriéntare tsi niwáton ne Rawenni꞉io rahoianerénseras nónka kí꞉ken thóh ní꞉ioht tsi iakonʼnhétie teiakoténtion naiaiéheie. Tánon kíʼ iáh nek tèken tsi sékon thóh ní꞉ioht tsi nihatiʼieránions, nók kíʼ iehióhe sakothiretsárons nakorénsons neh nihatiʼiérah.