Revelation 9 - Ohiatonhseratokénti

¹ Tánon ne wískʼkhaton raronhiakeró꞉non wahahonrá꞉wate, tánon wakatkáto otsísto ne tsosénhen karonhiá꞉ke ohontsá꞉ke ieioienhtà꞉on, tánon raónha thonwá꞉wi nahonontónhkwa ne iosonwakáronhte né꞉ne iáh tekanón꞉kwahre;

² wahanonhtón꞉ko ne iosonwaká꞉ronte ne iáh tekanonkwáhre, tánon thóh tsi iosonwakáronhte takaienkwahrinekénhne thóh nikaienkwahró꞉ten tsi ní꞉iot ne karistowá꞉nen, tánon ne karáhkwa ó꞉ni ne tsi ió꞉werare tahiokárawe né꞉ne tsi iosonwahká꞉ronhte tiohʼhawihtonh.

³ Eʼthó꞉ne tsi nontá꞉we noienkwáhra wahón꞉newe ne tsistá꞉rare nonhontsá꞉ke, tánon thonwaná꞉wi nahotiianerenhseraién꞉take kwáh tsi ní꞉iot ne takwahré꞉re ne tsi ionhontsá꞉te.

⁴ Ronwahtiró꞉ri ne tó꞉sa ahatikarónhni nohonteʼshón꞉as ne tsi ionhontsá꞉te khéks ne thé꞉nen nohón꞉te ní꞉iot khéks ne tsitʼnikarontó꞉ten, ók ne khók thí꞉ken nonkwehó꞉kon tsi niká꞉iens ne iáh tehonwathitsikwénhton rathikwenhká꞉rakes.

⁵ Ronwahtiriwá꞉wi nasakotironhiákente né꞉ne wísk niwenhní꞉take nikarí꞉wes, ók iáh kíʼ thasakotinonhwahrià꞉khon, tánon ne raotironiakénhsera kwáh thóh niioroniákenk tsi ní꞉iót ne takwáhrere nó꞉nen ónhkak iakonakontákwen.

⁶ Tánon ne thóh entewenhniserá꞉teke nonkwehó꞉kon kwáh eniakésake ne kenhé꞉ion ók iáh kíʼ thaieʼtsénhri; kwáh thenhiakotonhontsó꞉se naiaiéheie, ók ne kenhé꞉ion kwáh kíʼ enhiakohniá꞉kenhse.

⁷ Tsi nihatiiathó꞉tens ne tsistarare ne teshontsérens ne koshá꞉tens ronatakweniáhere nahonterí꞉io. Ne ratikwenká꞉rakes nahionʼkáto kwáh né꞉ne iehiohonronkóhare owistanó꞉ron í꞉ken; ne rathikónsakes kwáh né꞉ne ónhkwe tahonsakaierónhtarake,

⁸ tsi rotinonwehró꞉te kwáh né꞉ne iónkwe kaʼkonónhwis akénhake, tánon tsi ratinhotsótons kwáh né꞉ne kénreks raotinawí꞉ra teskaierónhtare;

⁹ ne ronskwenákes kwáh né꞉ne karistátsi akénhake ronatatskwenhó꞉ron, tánon tsi nateiotónhare ne raotinerahónshas thóh nateiotón꞉hare kwáh né꞉ne iawehtowá꞉nen ne tékeni teiokakwentón꞉te otiónkwa ionteriiostáhkwa ká꞉sere né꞉ne koshá꞉tens kontsatanihiontháhkwa watsionnaskenhnionhátie tsi tewaterí꞉io.

¹⁰ Rathitasóntons kwáh né꞉ne takwaré꞉re, iotinionwará꞉ien, tánon thóh tsi iehonanitháshate nón꞉we niiotishatstenhserá꞉ien nahonwatikarewáthake nonkwehokons né꞉ne wísk niwenhní꞉take nikarí꞉wes.

¹¹ Rotinón꞉tiiotseraien ne tesakoniarotáron í꞉ken ne iáh tekanonkwáhre ne iosonwahkaronhte; ne raoshén꞉na ne Hebrew né꞉ne Abaddon, tánon ne Greek né꞉ne ronwanatónhkwa Apollyon.

¹² Ne tontié꞉rente atatrewathátshera iotohétston. Thóh nón꞉we shé꞉kon teiorihwà꞉ke ne karehwatháhtsera théntewe.

¹³ Ethò꞉ne ne iáh-iak kháton raronhiakeró꞉non wahatátiste ne raówenk iehonrawátsta, tanon wakewenhnáronke thóh nontá꞉we ne kaié꞉ri nikanakárake ne owistanó꞉ron í꞉ken ietsienharáhkwake raohén꞉ton ká꞉ien ne Ní꞉io,

¹⁴ wahonwénhase ne iaiákhaton raronhiakeró꞉non ne rahá꞉we iehonrawátsta, “Sheiátkaf ne kaié꞉ri nihá꞉ti ratironhiakeró꞉nons ne ronónha thatiné꞉ren thóh ne kaniatarowanénhne Euphrates.”

¹⁵ Káti ne kaié꞉ri nihá꞉ti ratironhiakeró꞉nons sahonwanaʼkawe, ronón꞉ha ronwatiienahwákonhne ne thóh nenhkahá꞉wike, nawenhní꞉sera, tsi nenhwenhnì꞉tarake, tánon tsi nenhioserá꞉teke, nenhsakotinonwahrià꞉kon énska énkar nonkwehó꞉kon.

¹⁶ Tsi nihá꞉ti ne raotitióhkwas ne rotisátens tsi ronterí꞉ios né꞉ne tekéni tewenhniáwe million; onkahonsonkóte tsi nihá꞉ti.

¹⁷ Tánon thóh kíʼ niní꞉iot tsi wakhé꞉ken ne koshá꞉tens nakeserenhtá꞉kon ne rothisaténtie ne ronátston ne rontentskwenorókta thóh niwahshokó꞉ten tsi ní꞉iot notsí꞉re tánon ne teioterón꞉ronte kanenhianhó꞉ron tánon ne iontenatentástha; ne ratinontsí꞉nes ne koshá꞉tens kwáh né꞉ne kénreks onón꞉tsi, tánon otsí꞉re tánon iontenatentástha takontiʼiá꞉kenhne tsi ratisakarón꞉tes.

¹⁸ Kí꞉ken áhsen ní꞉kons kariwaiesátsheras énska énkar nonkwehó꞉kons wahakononhwarià꞉khon, né꞉ne otsí꞉re tánon oiénkwáhra tánon iontenatentástha tkontiiá꞉kens tsi ratisaká꞉ronhtes.

¹⁹ Asè꞉ken ne raotishatsténseras ne koshá꞉tens thóh í꞉wa tsi ratisaká꞉ronhtes ó꞉ni ratitasaʼkes; kí꞉ken otáhsons kwáh né꞉ne ó꞉niares, iotinontsistón꞉tons; tánon ne kóntstha naiakotikaré꞉wate.

²⁰ Ne ken iotsétons nonkwehó꞉kons, iáh nenhné꞉e ne teiakononhwarià꞉khon kí꞉kens kariwaiesátsheras, iáh teshonatatrewáton naoioʼténhseras ne ratitsá꞉nakes khéks nahonatsakwahrí꞉shion tsi konwasenhnaiénskwe ranikonra꞉sen ó꞉ni kaiatonhnishón꞉as ó꞉ni owistanó꞉rons tánon kawistará꞉kens ó꞉ni nowásas ó꞉ni nonénhias ó꞉ni noién꞉te, né꞉ne iáh tekontí꞉kens iáh ó꞉ni teionathón꞉te khéks takontekhá꞉hakwe.

²¹ Tánon iáh teshonatatrewá꞉ton tsi nisakonaséhtons khéks ne raonatenhenhnaráhtsheras khéks tsi nihonahtenakwaiehsá꞉tons khéks tsi nihotinénskwen.