Revelation 8 - Ohiatonhseratokénti

Ne Tsatá꞉khaton Kanekentó꞉ron Tánon Ne Owistanó꞉ron Katʼtse Iontsienkwaronhniatáhkwa

¹ Nó꞉nen ne Teiotinaʼkarontónha owí꞉ra sathanhetsáke ne tsatá꞉khaton, kwáh sakthón꞉ton ne karonhiá꞉ke né꞉ne kák꞉non ne saʼtekawistí꞉hen nikarí꞉weskwe.

² Tánon wakhé꞉ken ne tsá꞉ta nihá꞉ti ratironhiakeró꞉nons ronón꞉ha thóh rón꞉nete raohénton ne Ní꞉io, tánon tsá꞉ta ní꞉kons tahonwénhnon iehonrawátsta.

³ Ó꞉ia raronhiakeró꞉non ne rahá꞉we ne owistanó꞉ron kát꞉tse iontsienkwaronhniatháhkwa tánon thóh ierá꞉te ákta tsi ietsienharáhkwa; ne thonwá꞉wi iawetowá꞉nen ne wenhnekerá꞉kon nahatsienʼkwaronhniátakwe né꞉ne iahá꞉tate ne nasakoterienhnaién꞉hase ne ratikwé꞉kon roʼtiiathatokénhtis thóh eʼné꞉ken ne owistanó꞉ron í꞉ken ietsienharáhkwake né꞉ne ohén꞉ton káhien tsi wanitskwaratseró꞉te.

⁴ Tánon naoién꞉kwara ne wenhnekerá꞉kon, skátne ne ronwanaterienhnaién꞉ni ne rotiiatatokéntis, onʼtharátate raohén꞉ton ne Ní꞉io thóh nontá꞉we ratiá꞉nake ne raronhiakeró꞉non.

⁵ Ethò꞉ne ne raronhiakeró꞉non wátrakwe ne iontsienkwaronhiatáhkwa kát꞉tse tánon thonthahatsirá꞉rate tsi nathatsí꞉rakwe ne ietsienharáhkwake tánon ohontsá꞉ke iahó꞉ti; tánon tsi niiorakaré꞉ni wakawé꞉re, iowerenháties, tewaninekarawá꞉nions, tánon teiahontsisónkwa.

Ne Tsá꞉ta Ní꞉kons Iehonrawátsta

⁶ Ó꞉nen ne tsá꞉ta nihá꞉ti ratironhiakeró꞉nons ne ronón꞉ha ratihá꞉we ne tsá꞉ta ní꞉kons iehonrawátsta wahatiweienénhtane nahatihonráwahte.

⁷ Ne tahatié꞉renhte raronhiakeró꞉non wahahonrá꞉wahte, tánon thóh nontá꞉we wahowí꞉sonti tánon ó꞉tsire, ne tekontséston onekwénhsa, tánon ne wationtesenhniá꞉te ohontsá꞉ke; tánon énskat náhsen-énkar nohontsá꞉ke onhtsá꞉hate, tánon énskat náhsen énkar ne tsi keríhtons ontsá꞉hate, tánon akwé꞉kon nohonteʼshón꞉as ontsá꞉hate.

⁸ Ne tekení꞉haton raronhiakeró꞉non wahahonrawá꞉te, tánon khaó꞉tent kwáh né꞉ne iononthowá꞉nen, iotsiratékha, thóh kaniatarakeʼkowáhne iahó꞉ti.

⁹ Ne énskat náhsen-énkar ne kaniatarakeʼkó꞉wa onekwénhsa ónh꞉ton, énskat náhsen-énkar ne ronhnonhnénion kaʼtshé꞉nens ne kaniatarakeʼkowáhne wahonhní꞉heie, tánon énkat náhsen-énkar ne kahonweiowá꞉nens waʼkarihwénhtane.

¹⁰ Nasénhaton raronhiakeró꞉non wahahonrá꞉wahte, tánon teiotsistohkwahnonhiáni thonsénhne karonhiá꞉ke, iotsiró꞉tatse kwáh né꞉ne wanitonkohá꞉ra, tánon thóh iatewatasénhte énskat náhsen-énkar ne tsi kaniataré꞉nion tánon ne tsi tsonekó꞉ton.

¹¹ Iononkwakskárat konwá꞉iats kí꞉ken otsísto. Énskat náhsen-énkar watsionekaiotsístane, tánon iakotiohkowá꞉nen wahahéheie ne wakarihónhni kíʼ oné꞉ka, tiorì꞉wa tsi ne ionhniá꞉ton naiotskárake.

¹² Ne kaierí꞉haton raronhiakeró꞉non wahahonrá꞉wate, tánon énskat náhsen-énkar ne karáhkwa watsiahón꞉ko, tánon énskat náhsen énkar notsistohkwashón꞉as, káti né꞉tho énskat náhsen énkar naoswathétshera taioká꞉rawe; énskat náhsen-énkar nentsekéne iáh thatetsowatsté꞉on, tánon ó꞉ni thóh nahá꞉wenhne noʼkarasné꞉ha.

¹³ Ethó꞉ne wakʼkatʼkathónhnionwe, tánon wahiwenhnáronhke á꞉kweks rawenhnó꞉te tsi nihawénhna tsi nihá꞉tse ne satekaronhí꞉ien, “Rotitenhtasere, rotitenhtásere, rotitenhtásere ne ratinakeréhnion tsi ionwenhtsá꞉te, tsi nontewenhnó꞉ten nó꞉ia iehonrawátsta né꞉tho áhsen nihá꞉ti ratironhiakeró꞉nons ó꞉nenh thó꞉wa ahatihón꞉rawate!”