Revelation 6 - Ohiatonhseratokénti

Ne Tsá꞉ta Ní꞉kons Kanakentó꞉ren

¹ Ethò꞉ne waí꞉ken ne teiotinaʼkaronhtónha owí꞉ra wathanhetsáke énska ne kanhekentó꞉ren, tánon waihiatón꞉teʼne saiá꞉ta ne rónhne kário iathohénrehte, kwáh thonihawenhnó꞉ten tsi ní꞉iót naʼká꞉wehre, “Káts!”

² Iakatkáto, tánon thóh í꞉rate kanaskwaráken! Ne roʼshe rahanénhawe; anonwaró꞉re taʼón꞉ion, tánon iahaiá꞉kenhne ne tsi karón꞉iate ne nahatesénhniete tánon nahateʼshénhni.

³ Nó꞉nen shathanhetsiá꞉ke ne tekení꞉haton, waihiatónhteʼne ne tekení꞉haton rónhne kárhio iathohénrehte, “Káts!”

⁴ Tánon thóh waʼrá꞉we ó꞉ia koshá꞉tens, teionekwenhtá꞉rate nihashokó꞉ten thóh nón꞉tare tsi tewanitskwaratseró꞉te; ne rosathéntse Ní꞉io roshatstenhserá꞉wi nasakoterí꞉ioste nonkwehó꞉kon ne tsi ionwenhtsá꞉te, ne káti ne tahionthatawenhthóhseron; tánon ne Ní꞉io wasarowá꞉nen thó꞉wi.

⁵ Nó꞉nen sathanhetsá꞉ke nasénhaton, waihiatónhteʼne nasénhaton rónhne kário iathohénrehte, “Káts!” Watkakathón꞉nionwe, tánon thóh í꞉rate kanaskwahóntsi! Ne roshaténhtse ne rahá꞉we tékeni iekontseriharáhkwa,

⁶ tánon onkathónhteʼne kwáh né꞉ne owén꞉na raotinenhrí꞉hen ne kaié꞉ri nihá꞉ti kíʼ ronhnón꞉nhe kárhios rontónh꞉nions, “Tekakontserá꞉ke onátsa eniakhoʼkarhiátse ne sewenhní꞉sera, tánon iá꞉iak nikakontserá꞉ke teiotikonstónhres eniakhoʼkarhiátse ne sewenhní꞉sera tsi eniakoiò꞉ten, ók tó꞉sa kíʼ enskarón꞉ni ne iakeniewáhtha karonhtas ó꞉ni ne watenenhariseres!”

⁷ Nó꞉nen sathanhetsá꞉ke ne kaierí꞉haton, Waiwenhná꞉ronhke ne kaierí꞉haton rónhne kárhio iathohénrehte, “Káts!”

⁸ Watkatkathónhnionwe tánon thóh í꞉rate rotashó꞉kwen koshá꞉tens! Ne ró꞉she né꞉ne ronwá꞉iats kenhé꞉iat norenis, tánon tsi tiohontsá꞉ien ne kenhé꞉ion rononterátie thonwaná꞉wi nahontiaʼtakwehní꞉ioste énska enkár ne tsi ionwenhtsá꞉te, ne nashakotinonhwariaʼkonhnion asareʼkó꞉wa aónste, ashakononkarhiát꞉te, ó꞉ni kannratarinhétshera, ó꞉ni né꞉ne kontí꞉rios kontiʼtshé꞉nens ashakonásten ne tsi ionwenhtsá꞉te.

⁹ Nó꞉nen shathaʼnhétsiake ne wiskhá꞉ton, wakatkáto nà꞉kon ne tsi ietsenharáhkwake ne raonatónhnhets tsi niká꞉ien ne ronón꞉ha ronhwatinonhwarià꞉khon ne iorihónhnion ne raowén꞉na Ní꞉io tánon tsi nihotiriwahnirá꞉ton tsi nihonatró꞉ri;

¹⁰ tsiathotihén꞉rehte tsi nihatiwén꞉na, “Shasatstenhserowanenhkó꞉wa Saiá꞉ner, saiatatokénhti ó꞉ni oriwihioʼón꞉we í꞉ken, thóh nenhkariwé꞉shonke tsi nió꞉re ní꞉se ienseriwénhte tsi enserewá꞉te ne ronhnonhontsakeró꞉nons tsi ionkhinonwariatkhónnion?”

¹¹ Ne satiiatáktions taonwénhnon kará꞉ken atewehiá꞉ra tánon wahonwatiró꞉ri rontoríhsen shé꞉kon nikariwéhsa, tsi niió꞉re ienkaʼná꞉ne tsi nihá꞉ti ne rontenroshón꞉as ratinhá꞉tsheras ó꞉ni ronthatekenokónhas ó꞉ni rontenhnhosonhokónhas, ronónha ó꞉ni kwáh iostó꞉re tsi enhonwatinonwarià꞉kon.

¹² Nó꞉nen sathanhetsáke ne iaiá꞉khaton, Watkaʼkathónhnionwe, tánon kwáh í꞉ken tsi watewatenonhianí꞉te watsiahontsí꞉shonkwe, ne karáhkwa kwáh kahón꞉tsi nahá꞉wenhne tsi nontaioká꞉rawe, ne iekarakwahié꞉ri nasontenhné꞉kha thóh nonshokoténhne tsi ní꞉iót nonekwénhsa,

¹³ tánon notsistohkwashón꞉as ne tsi karonhiá꞉te tonsénhne ohontsá꞉ke wakaién꞉taʼne kwáh tsi ní꞉iot ne tionhnionwarontonhakó꞉wa tsi wáhiens ne koserá꞉ke nó꞉nen tekawehratá꞉se.

¹⁴ Ne tsi karonhiá꞉te tót thonsónton tsi ní꞉iot ne kahorohtónhni kaiatónhsera, tánon kwáh tsi ní꞉konhs ionontarónhnion ó꞉ni kawehnhó꞉ton tsi é꞉ren kahawí꞉ton tsi nón꞉we nihiotinák꞉te.

¹⁵ Ethò꞉ne ne rotinontí꞉ios ne tsi ionhwenhtsá꞉te; ó꞉ni ne ratikoráhsons tánon ne ronteriioserakwení꞉ios ó꞉ni ne rotikwatsénions ó꞉ni ne ronhnonkweʼtowá꞉nens, tánon kwáh tsik ónhka, ienáskwa tánon ne ionthatewenhní꞉io, wahontashetánion ostenhrokónson tánon tsi nón꞉we nosténrakes ne tsi ionhnontarónhnions,

¹⁶ ienhiahierón꞉nion tsi iononténion tánon tsi iostenhraréhnion, “Kasewatenontié꞉nent ontionhá꞉ke tánon takwaiatáset tsi rakonsón꞉te tsi niká꞉ien ne thóh renskwáhere nanitskwará꞉ne né꞉ne tó꞉sa asonkwáken tánon tsi natehaterhiatítʼkons né꞉tho teiotinaʼkaronhtón꞉a owí꞉ra;

¹⁷ asè꞉ken ne teiahonhniseranón꞉hiani tsi natehonterhiatítʼkons iaʼkáhewe, tánon ónhka naiekwé꞉ni naionthakatstá꞉te?”