Revelation 5 - Ohiatonhseratokénti

Ne Kaiatonserakwenónhni Tánon Ne Teiotinaʼkarontónha Owí꞉ra

¹ Ethò꞉ne wakatkáto ne saweientetákwen né꞉ne tsi niká꞉ien renskó꞉te nanitskwará꞉ne ne kahorhotakwenón꞉ni tsi kaiá꞉ton ne kaiatonhserá꞉kon tánon ne oná꞉ken nokwá꞉ti, kanakentó꞉ron ne tsá꞉ta niiorì꞉wake tsi nikasestá꞉ron;

² tánon wahí꞉ken ne roshatstenhserowanenhkó꞉wa raronhiakeró꞉non rariwanontónhnions kwáh í꞉ken tsi rowénhte, “Ónhka rorión꞉te ne tahahiatonhseraʼkhási tánon tahanhetsá꞉ke?”

³ Tánon iáh ónhka ne karonhiá꞉ke khéhs nonwenhtsá꞉ke khéhs ne nà꞉kon tsi ionwenhtsá꞉te teiakokwé꞉nion ne taiehiatonhseraʼkhási khéhs nahiontkáto.

⁴ Tánon takatáhsawen wakkaʼséntʼto notsitakó꞉wa tiorì꞉wa tsi iáh ónhka teiotetsénhron naiakorihóntake taiehiatonserakʼkhasi ne kahorohtakwenónhni khéhs nahiontkáto né꞉tho.

⁵ Ethò꞉ne saiá꞉ta ne rarehtsá꞉rons wahakénhase, “Tó꞉sa teshaséntʼto. Satkáto, ítsken ne raothitárah ne kén꞉reks né꞉tho nón꞉we Judah, ne naotéra ne Táwit, ne roʼtesénhnion, káti ne enhakwé꞉ni tahaiatonhseraʼkhási tánon ne tsá꞉ta ní꞉kon kanakentó꞉ron.”

⁶ Ethò꞉ne wakatkáto tsi natewanitskwaratserátereh tánon ne kaié꞉ri ronhnónnhe nikarhió꞉takes ó꞉ni ratiiatattóntie ne ratirehtsá꞉rons ne teiotinaʼkarontónha owí꞉ra í꞉rate tsi shí꞉ken ní꞉iot nahonwanonwarià꞉kon, tsá꞉ta nateonaká꞉ronhte tánon tsá꞉ta natehaká꞉ra, né꞉ne tsá꞉ta niwatonhnhetserá꞉ke ronwaiò꞉tenhse ne Ní꞉io thonwanateniéhton nonhontsakwé꞉kon.

⁷ Thóh niahá꞉re tánon iahó꞉kwa ne kahorohtón꞉ni ne saweientetákwen tsi niká꞉ien thóh renskó꞉te nanitskwaráhne.

⁸ Ne nó꞉nen shiháhawe ne kahorohthakwenón꞉ni, ne kaié꞉ri nihá꞉ti ne ronón꞉nhe kárhios tánon ne tewáhsen nihá꞉ti ratirehtsá꞉rons wahatiiataién꞉taʼne raohénton ne teiotinaʼkaronhtón꞉ʼa, satiiatátions ratí꞉hawe ne onhowakó꞉wa tánon nowistanó꞉rons aké꞉ra titkáhereh wenhnekerá꞉kon, né꞉ne raonaterén꞉naient ne rotiiatatokéntis.

⁹ Orénhnase wathatirihwákwe: “Í꞉se ne sarí꞉onte nasatháwa ne kahorotakwenón꞉ni tánon ne tasnhetsiá꞉ke, asè꞉ken í꞉se ne iesanonwarhià꞉kon tánon né꞉ne sanekwénhsa seskarhiaténhni ne Ní꞉io raonkweʼtashón꞉as rotiiatatokéntis né꞉ne kwáh tsi niateiakotsokwáhkes tánon tsi niateionronkhatserá꞉ke ó꞉ni nonhkweó꞉kon tánon ne ronhnonhontsakeró꞉nons;

¹⁰ í꞉se waseiónhnien né꞉ne ronhnonhontsakeró꞉nons ahón꞉ton tánon ratiʼtsihénstatsis tahonahonwahiò꞉tenhse nón꞉kwa Ní꞉io, tánon ronón꞉ha enthatiniarotároke ne tsi ionwenhtsá꞉te.”

¹¹ Ethò꞉ne watkatkathón꞉nionwe, tanon wakhewenhnáronke ne ronatiohkowá꞉nen ratironhiakeró꞉nons tehotihonwarón꞉ni tsi wanitskwaratseróte tánon ne ronhnonhé꞉nion kários tanon ne rotitstenokónhas; thóh niʼonatiohkwá tsi ní꞉iot ne mirihons tánon thóka natekaiáhseres ne tewenhniaweheʼtseráhsens,

¹² teotiriwákwens kwáh ratiwenhnakwé꞉kon, “Teoténhtion ne teiotinaʼkaronhtónha owí꞉ra tsi niká꞉ien ne ronwanonhwarià꞉khon ne nahaié꞉na ne kaʼshatsténhsera oni naokwahsétsera ó꞉ni naototkhátshera ó꞉ni kaʼshatsténhsera nasakoiathaté꞉riste ó꞉ni tasakorénhsaron ó꞉ni kaiatanerakwáhtsera ó꞉ni naonwashén꞉naien!”

¹³ Ethò꞉ne onkathón꞉teʼne kwáh tsi niatehá꞉ti ne rononhné꞉nion thóh karonhiá꞉ke ó꞉ni nonwenhtsá꞉ke ó꞉ni ne ná꞉kon tsi ionwenhtsá꞉te ó꞉ni ne kaniatarakeʼkowáhne, tanon ratikwé꞉kon né꞉tho nón꞉we nihathì꞉teron, teonwarihwákwahse, “Tsi niká꞉ien ne thóh renskwáhere nanitskwaráhne ó꞉ni raonhà꞉ke ne teiotinaʼkaronhtón꞉ha owí꞉ra ne naonwashén꞉naien ó꞉ni taonwarénhsaron ó꞉ni rohiatanerákwat ó꞉ni roshatstenhserá꞉ien né꞉ne tsi nienhénwe tanon tsi nén꞉we enkénhake!”

¹⁴ Tánon ne kaié꞉ri nihá꞉ti ne rononhénion kárhios wahonhní꞉ron, “É꞉tho niiá꞉wenh!” Tánon ne ratiretsárons wahatiiatiénenhne tánon waonwashén꞉naien.