Revelation 21 - Ohiatonhseratokénti

Ne Á꞉se Tsi Karonhiá꞉te Tánon Á꞉se Tsi Ionhontsá꞉te

¹ Eʼthó꞉ne wakatkáto ne á꞉se tsi karonhiá꞉te ó꞉ni ne á꞉se ionhontsá꞉te; asè꞉ken ne tiotierén꞉ton tkaronhiátekwe tánon ne tiotierén꞉ton tionhontsá꞉tekwe ionatohéston, tánon ne kaniatarakeʼkowáhne iáh othén꞉nen tésken.

² Tánon waʼkatkáto ne onatatokénti, né꞉ne á꞉se Jerusalem, tahiosnentonhá꞉tie karonhiá꞉ke Niió꞉ne nontá꞉we, kaweienhnenhtá꞉on tsi ní꞉iot ne iehiá꞉tase iakoraséston tsi rotiniát꞉ke ne rónhkwe.

³ Tánon onkathón꞉teʼne iowenhnakaré꞉ni thóh nontá꞉we tsi tewanitskwarahtseró꞉te watón꞉nions, “Satkáto, ne tsi ronónshote ne Ní꞉io thóh skátne nonkweʼó꞉kons. Ne Raónha thóh enhenterón꞉take skátne ne ronón꞉ha tsi ne raó꞉ti Ní꞉io enkénhake; ne ronón꞉ha raón꞉ha raonkweʼtashón꞉as enkénhake, tánon kwáh ne Ní꞉io raonhatsí꞉wa tsi enhatikweʼkónhake;

⁴ raón꞉ha kwáh tsi niateiokaserá꞉kes tsi enshakokaseró꞉kewe. Ne kenhé꞉iat iáh tahonsakaién꞉take; naiontiónhnion tánon ne taionsénhto ó꞉ni naieronhiá꞉ken iáh taonsakaién꞉take, asè꞉ken ne tsionatserénhton ionatohéston.”

⁵ Tánon tsi niká꞉ien ne thóh renskó꞉te nanitskwará꞉ne wahén꞉ton, “Satkáto, Ní꞉i wakonhnihá꞉tie orihwakwé꞉kon á꞉se.” Kwáh ó꞉ni wahén꞉ron, “Shiá꞉ton kí꞉ken, asé꞉ken kí꞉ken owennaʼsónhas né꞉ne aontaiaketákwe tánon orihwí꞉io í꞉ken.”

⁶ Eʼthó꞉ne wahakénhase, “Ó꞉nen ontè꞉sa! Í꞉i ne tsiotserentá꞉kwen ó꞉ni nonakénkha, né꞉ne tsiotasawáhkwen tánon tsi ieiotót꞉te. Ne rotiniatát꞉tens í꞉i kwáh enkhenená꞉nonte tsi enkhé꞉ion thóh nénhtewe tsi tsió꞉nekote noné꞉kanos natón꞉nhets.

⁷ Tsi niiá꞉kon nenhiontesénhni eniehié꞉na kíʼ naorihoʼténsons, tánon í꞉ih ne raoti Ní꞉io enkénhake tánon ronón꞉ha keienhokónha enhón꞉ton.

⁸ Ók ne roʼnát꞉tsens, ne iáh teotí꞉ien ne tewetá꞉kwen, ne teotihiatátions, ne sakonaséh꞉thas, ne roʼthí꞉teha, ne rontahenná꞉ras, ne rontenakwaiesáthas, tánon ratikwé꞉kon ne rotinhó꞉wenhs, ne raotinák꞉tes kwáh thóh nón꞉we tsi kaniatá꞉re ne iotékhas nótsire ó꞉ni iontenatentástha, ne né꞉tho ne tekeníhaton kenhé꞉iat.”

⁹ Eʼthó꞉ne saiá꞉ta ne tsá꞉ta nihá꞉ti ratironhiakeró꞉nons ne raón꞉ha raksenhá꞉we ne tsá꞉ta nikák꞉sakes titkaʼhere ne tsá꞉ta níkons nonakénkha kanhratariné꞉tsheras tá꞉re tánon wahakénhase, “Káts, kwáh enkonnatónhase ne iakónkwe, ne ró꞉ne waʼtón꞉sere ne teiotinaʼkaronhtónha owí꞉ra.”

¹⁰ Tánon Ní꞉io raoashatsténhsera iahontiatenhá꞉we thóh nón꞉we tsi teiotenonhianì꞉ton, tsotenontá꞉te tánon wakatkáto ne ioiatatokénti Jerusalem taiotsnentonhá꞉tse karonhiá꞉ke thóh nontá꞉we Niió꞉ne.

¹¹ Ne ió꞉ien ne raoiatanerakwáhtshera ne Ní꞉io tánon teioswát꞉te kwáh né꞉ne waʼkenre owistanoronsónhas, tsi ní꞉iot ne washokwí꞉io ohón꞉te, tsi ní꞉iot ne natʼthésa nikanenhióten, ió꞉kenk tsi ní꞉iot notsishé꞉ra.

¹² Kwáh í꞉ken tsi tsotasón꞉tate, tékeni iawénhre ní꞉kons iotenhenrén꞉tonhnions, tánon ne tsi iotenhenrén꞉tonhnions tekeniiá꞉wenhre nihá꞉tis ratironhiakeró꞉nons raʼtinikonrá꞉re, tánon natenhenrá꞉kes thóh kaiá꞉tonhnions tsi nihó꞉tisenhnotensons ne tekeniiá꞉wenhres nihotitsió꞉kwahkes Israerʼró꞉nons;

¹³ ne tsitká꞉rakwinekens nòkwahti asen níkons iotenhenrentons, notoré꞉ke nòkwahti asen niiotenhenrentons, nentiene nòkwahti asen niiotenhenrenteons, tánon ne tsi iatewahtsentʼtos nó꞉kwahti asen niiotenhenrenhtons.

¹⁴ Tánon tsi natewasón꞉tote ne kaʼnatowanenhke tekeni iawenhre niió꞉tinenhrá꞉ke tekaʼnenhiaseronhnion, tánon ne tsó꞉tinenhraktions thóh nón꞉we nihá꞉tisenhnaronhnions ne tekeniiá꞉wenhre nihá꞉tikwe ne ratikwé꞉konhne ne teiotinaká꞉rontonha owí꞉ra.

¹⁵ Ne raronhiakeró꞉non ne rák꞉tharani neh raʼhá꞉we ne kaʼniá iontenientenstá꞉kwáh owistá꞉noronh nahó꞉ten í꞉ken ne nahá꞉tenienten ne kaʼná꞉towahnenhken tánon tsi iotenhenrehtón꞉nions ó꞉ni tsi tewasón꞉totes.

¹⁶ Ne kaʼná꞉towahnenken kwáh tká꞉riwaierin tsi teió꞉tekeronhte, tsi niions kwáh sateiót tsi natewatá꞉karon; tánon ne wahatenientenste ne kaʼná꞉towahnenhke ne raó꞉nia, wísk iawenhre tewenhniá꞉we niwatenientenhtserake nió꞉re ieken; tsi niions tánon tsi natewathá꞉karon ó꞉ni tsi nitót꞉te kwáh sateiót.

¹⁷ Kwáh ó꞉ni wahá꞉tenienten nahó꞉sontasonhas, tekeni-tewenhniá꞉we iáh-iák iá꞉wenhrte niwá꞉sitake nitót꞉te. Ne nonkwe akotenienthentsera, nétho raronhiakeró꞉non waratste.

¹⁸ Nasón꞉take ne ionhniá꞉ton ne natʼthésa nikanenhióten, ók ne kanatowanenhke owistanorón꞉tseroskon ne eh, thóh niiokenk tsi niiót notsisera.

¹⁹ Tsit kenskwahere nasón꞉takes ne kanatowanenhke neh karaʼsestakwen ne kwáh tsit nahó꞉tensons ne kawistanorontserí꞉ios; ne tsó꞉tserenhton ne natʼthésa nikanenhióten, ne tekenihá꞉ton tehioterónʼhionte nikanenhió꞉te, nasenhá꞉ton tekaiéston ne karáhken tánon nathésa nikanenhió꞉te, ne kaierihá꞉ton teioshó꞉kwatʼte nohón꞉te,

²⁰ ne wiskkhaton onekwentá꞉ra niwashó꞉koten, ne iáh-iakʼkhaton ioteherahrónhnion onénhia, ne tsáʼtakhaton teiót꞉tsinekwahronhte nohón꞉te, ne shá꞉tekonhaton teioteronhionte ohón꞉te, ne tiotón꞉haton tehiotʼtsinekwáhronhte, noierí꞉haton teiót꞉thontonte niwashó꞉koten, nenska-aton tehioterónhionhte nóhonte, ne tekeni-iawenrehaton tetsosohkwáhkaras nariwakonhnéha.

²¹ Tánon ne iotenhenrá꞉karonhtons iotenhenrentonnions tekeni neh iawenhre níkons onekó꞉ras, ne sewatenhenrát꞉tions skanekó꞉ratʼtions ió꞉ien, tánon ne tsi tekanatokenserons kwáh owistanhó꞉ronhtseroskons í꞉ken, thóh niió꞉kens tsi niiót notsisera.

²² Iáh othenen tewakát꞉katon nononsatokenti ne kanatowanenhke, asé꞉ken naononsatokenti ne ne Roiá꞉ner Ní꞉io ne Roʼshaststenserowanenkó꞉wa tánon ne teiotinakarontón꞉ha owí꞉ra.

²³ Tánon ne kanatowanenke iáh othenen thateiotonhontsioni ne kará꞉kwáh khehs nasónt꞉thenhnekha kará꞉kwáh ne takaswát꞉thete, asé꞉ken ne ne raoiá꞉tanerakwahtshera ne Ní꞉io ne nahoswát꞉thetsera í꞉ken, tánon ne wathaseranihionthá꞉kwah ne ne teiotinakaronhtón꞉ha owí꞉ra.

²⁴ Ne ronnón꞉hontsakeró꞉nons kwáh thóh nón꞉we natenhón꞉tekhahakwe nahoswát꞉thetshé꞉rakon, tánon ne rontinontí꞉ios ne tsi ionwenhtsá꞉te enthatihá꞉we ne raotiiá꞉tanerakwahtsheras ne nón꞉we.

²⁵ Ne tsi iontenhenrá꞉karontons iáh nón꞉wenhton thaʼonsaká꞉nhotonke nenhniserakes—tánon iáh nón꞉wenhton nokarasneha tsiá꞉onton neh nón꞉we.

²⁶ Nonkweʼokons kwáh entsehá꞉we ne kaiá꞉tanerakwahtsheras ó꞉ni nakorenhsá꞉ronhtsheras nonkweʼokons.

²⁷ Ók iáh thaʼhó꞉tens ne iáh teiót꞉kweniens kwáh iáh tsiá꞉hontaweiate, khehs nón꞉ka ne ne iakó꞉hiote nhó꞉nowen, ók nek khók tsi niiá꞉kon ne iesenná꞉re ne teiotinakaronhtón꞉ha raoiá꞉tonhserake ne ionnhe.