Revelation 20 - Ohiatonhseratokénti

Ne Tewenhniawehetseráhsen Nihió꞉seras

¹ Eʼthó꞉ne waʼhí꞉ken raronhiakeró꞉non tahosnenhtonhátie karonhiáke, ne roʼtiakwenónhni nahonontónkwa ne iáh tekanonwáre iosonwakáronte tánon ne kwáh karonkwashowá꞉nen.

² Wahoshatstenhserakénhni ne ronhnonwaronhtsétha, né꞉tho oniarasténha, rahón꞉ha Nótkon í꞉ken tánon Ranesonró꞉non, tánon wahonerénhke né꞉ne énska tewenhniawehetseráhsen niioserá꞉ke,

³ tánon thóh iahohiatónhti tsi iosonwaká꞉ronhte, tánon wahasonwanhó꞉ton tánon kwáh í꞉ken tsi wahariwanirá꞉te tsi nahonhoton, ne káti ne tó꞉sa shé꞉kon ahonshasakonikonráten ne ronnonhontsakeró꞉nons, tsi nió꞉re ienwatokʼten ne enkáka tewenhniawehetseráhsen niioserá꞉ke. Eʼthó꞉ne ón꞉nen enshonwakʼkawe kenh nikariwésa.

⁴ Eʼthó꞉ne wakatkáto anitskwáras, tánon tsi niká꞉ien né꞉tho ratitskó꞉tons thonwaná꞉wi ne kakweniá꞉tsera ne tahatiiatórehte. Kwáh ó꞉ni waʼkéken tsi nihá꞉ti ne ronwaʼtiniaʼrhiát꞉khon ne tsi nihonwariwanirá꞉ti ne Ié꞉sos tánon ne raowenhnaó꞉kons ne Ní꞉io. Ne ronón꞉ha iáh ne tekonwashén꞉naien ne kaʼtsi noniowá꞉nen raohiatónhni tánon iáh teotiiená꞉on ne tahonwatikenkwaraiá꞉tonhke khóks ó꞉ni ne rontsá꞉nakes. Sahontonnhéte tánon waontkoráste tsi ní꞉iot ne ronhnontí꞉io skátne ne Kerístos ne énska tewenniawehetseráhsen niioserá꞉ke niká꞉ris.

⁵ (Ne roná꞉tsakes ronenheionshéron iáh ne teshonatonnhéton tsi niió꞉re nénska tewenniawehetseráhsen niioseráke ienwatotʼten.) Ne kí꞉ken ne tsiotserentákwen nahonsaiontón꞉nhete.

⁶ Iakotáskats tánon iotokénti tsi niiá꞉kon nenhiakoiatáheste nenhtewatsérente entiontón꞉nhete. Tsi nòkwah ne ronón꞉ha ne tekeníhaton kenhé꞉ion iáh othé꞉non teiosastenserá꞉ien, ók ronón꞉ha kíʼ ne Ní꞉io raotsihénstatsi enhón꞉ton ó꞉ni ne Kerístos, tánon kwáh enhontkóraste skátne ne raón꞉ha né꞉ne enskatewenhniawehetseráhsen nikarí꞉wes.

Otkonseráksen Ronwariwaieshá꞉ton

⁷ Nó꞉nenh ne énska tewenhniawehetseráhsen niioserá꞉ke ienwaʼtók꞉ten, Ne Ratʼkonseráksen enshonwatʼkawe tsi ranhotónkwe

⁸ tánon tentaiá꞉kenhne ne nasakonikonrá꞉ten ne ronnonhontsakeró꞉nons thóh tsi tekaiosaké꞉rons ne kaié꞉ri tsi ionwenhtsá꞉te, ne Gog tánon ne Magog, ne nahón꞉ton nahonhnitsiokwahró꞉roke nahonterí꞉io; thóh nihonatióhkwas tsi ní꞉iot nonesarónhkwas ne kaniatarakeʼkowáhne.

⁹ Iahatinenhraserónhni kwáh tsi nateionhontsakáron tánon wahtatiwánake ne tsi ronahná꞉taien ne roʼtiiatatokéntis tánon ne konwahnatanorónhkwa. Tánon ótsire tonsénhne karonhiá꞉ke thóh nontá꞉we Niió꞉ne, tánon wahakotsatatʼtsahate.

¹⁰ Tánon ne otkonseráksen tsi raón꞉ha sakonikonraténhniskwe thóh iahonwaiatónti otsirá꞉ke tánon ne iotékha ne watenatentástha, thóh nón꞉we ne katsinoniowá꞉nen tánon ne iáh teotiriwató꞉ken roʼtitokénhse iehón꞉nes, tánon enhotironhiakénhake kontatsésons ó꞉ni aontakwé꞉kons né꞉ne tsi nienhénwe ó꞉ni tsi nénhwe enkenhá꞉ker.

¹¹ Eʼthó꞉ne wakatkáto kowá꞉nen wanitskwaratserará꞉ken tánon tsi niká꞉ien ne thóh renskó꞉te; nohón꞉tsa tánon ne tsi karonhiá꞉te tsiatkontí꞉ten ne raohén꞉ton, tánon iáh ká꞉neka tahonsaiontʼká꞉tho.

¹² Tánon waʼkhé꞉ken ne ronenhé꞉ion, ratisennhowá꞉nens tánon ken nihatisénhnasas, ronhné꞉te ohénton tsi wanitskwaratseró꞉te, tánon ne kahiatonseraó꞉kons ontenhotonkonháton. Shé꞉kon ó꞉ni ó꞉ia kahiatónsera ontenhotónko, né꞉ne kahiatónhsera ne iónhnhe. Tánon ne ronenhé꞉ion wathonwatiiatórehte ne tahioianenhá꞉we tsi nihotiiotenhseró꞉tens, ne tsi nikaiá꞉ton ne kahiatonhserá꞉kons.

¹³ Tánon ne kaniatarakeʼkowáhne thontaiakohiatón꞉ti né꞉tho nón꞉we nihonenhé꞉ion, Ne kenhé꞉ion tánon ne tsi tionhontsá꞉ien ne kenhé꞉ion thontaiakoiathónti né꞉tho nón꞉we iehón꞉nes, tánon ratikwé꞉kon wathonwatihiató꞉rehte ne tahioianénhawe tsi nihonatié꞉ren.

¹⁴ Eʼthó꞉ne ne kenhé꞉ion tánon ne tsi tionhontsá꞉ien ne kenhé꞉ion thóh iahonwatiiatónhti tsi kaniá꞉taro ótsire. Ne kí꞉ken ne tekeníhaton ne kenhé꞉ion, tsi kaniá꞉taro ótsire;

¹⁵ tánon ón꞉ka nakoshén꞉na iáh tekaktsénhrion nakahiátonke ne kahiatonserá꞉kon ne iónhnhe thóh iahonwatiiatónhti tsi kanià꞉taro nótsire.