Revelation 2 - Ohiatonhseratokénti

Nateriwanhó꞉thatsera ne Aorí꞉wake Ephesus

¹ “Raonhà꞉ke ne raronhiakeró꞉non ne tsi ionterennaientáhkwa thóh nón꞉we Ephesus shiá꞉ton: Ne kí꞉ken ne raowenhnaó꞉kons ne raónha rahá꞉we ne tsá꞉ta nikatsistóhkwakes thóh saweiententáhkwen, raónha thóh nón꞉we natehatekhahákwa tsi natekóntere ne owistanó꞉rons wathasherotákwas:

² “Wakaterièn꞉tare tsi nisahioʼtenhseró꞉tens, tánon satakátstaton niatasotʼten. Wakaterièn꞉tare tsi iáh thasehiathakátsthate ne wahét꞉ken tsi nihontié꞉ra; ní꞉se waseiatenientén tsi niiá꞉kon né꞉ne ionthatenatónhkwa ionteriwanhótha ók iáh kíʼ neh tè꞉ken, tánon wahonwatiiaʼtatshén꞉ri rotinó꞉wenhs.

³ Í꞉i kwáh ó꞉ni wakaterièn꞉tare tsi iathensóten tsi nisathakatstáton tánon saronhiakenhátie ne aorí꞉wake natsénhna, tánon ní꞉se iáh thateswisenhé꞉ions.

⁴ Ók tsi nokwáh ní꞉se iáh tekeriwanón꞉wes, né꞉tho ní꞉se tsi shatsakwarí꞉shion ne kanoronhkwá꞉tshera ne saién꞉takwe ne tiotierénhton.

⁵ Sashehiá꞉ra káti tsi nahó꞉ten ní꞉se tisahiathénton; sashatatré꞉wat, tánon ne shasateriwathénʼtsiat ne kahioʼténhsera tsi nisahió꞉tekwe ne tiotierénhton. Tó꞉ka iáh, kwáh Í꞉i í꞉seke niénheske tánon é꞉ren ensetkhá꞉wite ne sáwenk wathaseranihiontháhkwa tsi nón꞉we niká꞉ien, nok khók tó꞉ka ken enseshatatré꞉wate.

⁶ Tsi nió꞉re nón꞉wa ne kí꞉ken ensaié꞉nawaʼse: ní꞉se seriwáhsons ne raotihioʼthénhseras ne Nicolaitans, ne nonhní꞉i ítsons.

⁷ Ánion nónhkak ne tehionhontakáronhte iontahón꞉satat tsi nahó꞉ten ne Roʼnikonrí꞉ioston ratón꞉nions rononhà꞉ke ne tsi ionterennaientákwas. Ne ne tsi niiá꞉kon nenhiontesénhniete, Í꞉i kwáh enkerí꞉on ne tahiontskà꞉on tsi iorón꞉tote ne atón꞉nhets ne ne thóh nón꞉we tsi rothé꞉taien ne Ní꞉io.

Nateriwanhotatsera ne Aoriwake ne Smyrna

⁸ “Tánon raonhà꞉ke ne raronhiakeró꞉non ne tsi ionterennaientáhkwa nón꞉we ne Smyrna shiá꞉ton: Ne kí꞉ken ne raowenhnaó꞉kons ne thóh tierénhton tánon ne oná꞉kenkha í꞉ken, raónha ne rawenhé꞉ionhne tánon sahatónhnete:

⁹ “Wakaterièn꞉tare tsi ne saronhiakensera ó꞉ni ne sathentétshera, ethosà꞉ne tsi sakwátshe. Wakaterièn꞉tare tsi niieshasenhnatʼsatha tsi niiá꞉kon ne ne iónton ratishitaheró꞉nons tánon iáh kíʼ ronón꞉ha tè꞉ken, ók né꞉ne Ótkon raotióhkwakon.

¹⁰ Tó꞉sa shá꞉teron tsi nahoʼténhsons aseronhiáken. Thasatatehnikón꞉raren, ne ranikonraʼsen skanó꞉rons iatsisewahiatónhti tohkára nítion tsi ionthatenotónhkwah ne káti ní꞉se naietsiiateʼniénten, tánon oié꞉ri nón꞉ta ní꞉se kwáh tensewaterientakári. Ók sewariwatokénhak tsi nió꞉re kenhé꞉iatne, tánon í꞉i entkwáhion ne oronhónkwa ne iónhne.

¹¹ Ánion nónhka ne tehahontaká꞉ronhte ratahónshatat tsi nahó꞉ten ne Ronikonratokénhti sakoró꞉ris ne tsi ionterenhnaientákwas. Ónhka akénhake nahateshénhni kwáh kíʼ iáh tahokarónhniate ne tekéni há꞉ton kenhéiat.

Nateriwanhotátsera ne aoriwà꞉ke ne Pergamum

¹² “Tánon ne raronhiakeró꞉non ne tsi ionterenhnaientáhkwa ne Pergamum nón꞉we shiá꞉ton: Ne kí꞉ken ne raʼowenhnaó꞉kons tsi niká꞉ienh rahá꞉we ne tetsá꞉ronhkwen nokwá꞉ti tsi iosarothí꞉ie:

¹³ “Wakaterièn꞉tare tsi nón꞉we nisená꞉kere, tsi nón꞉we nótkon nihotenitswaratsérote. Ne kíʼ sá꞉ka satienawáston nakshén꞉na, tánon ní꞉se iáh tesatonhní꞉en tsi thisetákwen nakonhà꞉ke iekanihá꞉rakwe tsi nihotenhniseraténionhkwe ne Antipas ne rakeriwanirá꞉tis, ne nakonkwè꞉ta ne roriwató꞉ken, ronwanonwarià꞉khon ne thisewatenrohónhne, tsi nón꞉we nótkon nihanákere.

¹⁴ Ók thó꞉kara niiorì꞉wake tsi konhiát꞉konte: ní꞉se otià꞉kes ne nón꞉we ne ronatienawáston ne raorionhnienhní꞉tshera Balaam, raónha rorihonhnién꞉ni ne Balak tsi ní꞉iot tsi ashakoterístaièʼn nonkwehó꞉kons Nisraeró꞉nonke, ne káti ne ahón꞉neke ne kákhwa né꞉ne konwateskontá꞉ni kaiatonhniʼshón꞉as tánon ne ahonteriwathéntiaʼte ne kanakwaiesá꞉tshera.

¹⁵ Káti ó꞉ni ní꞉se kwáh tionkwè꞉taien otià꞉kes ronónha ronatienawáston ne raotirionhnienhní꞉tsheras ne Nicolaitans.

¹⁶ Sasewatatré꞉wat káti. Tó꞉ka iáh, Í꞉i kwáh iostó꞉rent tsi enkoniaʼtorén꞉ne tánon enkateriioserónhni nakheiatkón꞉ten ne én꞉katste nashareʼkó꞉wa tsi nitsoiakén꞉en tsitʼsaká꞉ronhte.

¹⁷ Ánion ne nónhka teionhontakáronhte iontahón꞉satat tsi nahó꞉ten ne Ronikonratokénhti ratónhnions ne tsi ionterenhnaientákwas. Ne nónhka ne rotesénhnion kwáh í꞉i enthí꞉ion ostón꞉ha ne washé꞉ton kanà꞉taro, tánon í꞉i kwáh enthí꞉ion ne kanenhiaráken, tánon thóh ne kanenhiará꞉kenʼne tsi kahiá꞉ton kaʼsénhnase ne né꞉tho iáh ónhka teiakoterénhtare ne khók rahonhatsí꞉wa tsi niká꞉ien nenhaié꞉na.

Nateriwahnothá꞉tsera Thóh nón꞉we Ne Thyatira

¹⁸ “Tánon raonhà꞉ke ne raronhiakeró꞉non ne Thyatira nón꞉we shiá꞉ton: Ne kí꞉ken raowenhnashón꞉as ne Ní꞉io Roién꞉ha, ne rakarakéhsons kwáh né꞉ne otónhkwa otsí꞉re, tánon ne rashì꞉takes kwáh ne ne tekastarathè꞉ton kwé꞉nis:

¹⁹ “Wakaterièn꞉tare ne saioʼténhseras—ne sanoronkwáhtiera, tsi thishetákwen, sathatsiothénstha, tánon sanikonkátste. Wakaterièn꞉tare nonáhken tsi saioténhen tsi sénha kaioʼtenhserowá꞉nen tsi ní꞉iot ne shontontié꞉renhte.

²⁰ Ók ne kí꞉ken wátienh nakonriwá꞉kwahse: sateʼnikonriióston né꞉tho ión꞉kwe Jezebel, naónha ne wathatenatónhkwa iotokénhse tánon iakorihónhnien ó꞉ni naiakothahará꞉kwahte nakenatsherahó꞉kons ne ahonteriwathéntiaʼte kanakwaiesáhtshera tánon ne ahonhné꞉ke ne kákhwa konwahnateskontáni kaiatonhnishón꞉as.

²¹ Kerarahtiéskwe nahonshontatré꞉waʼte, ók onteraiá꞉takwe nahonshontatré꞉waʼte ne tsi kenhnikaién꞉ha.

²² Thasatenhnikònhraren, thenkenatoién꞉te, tánon tsi nihiá꞉kon ne skátne ronatenakwaiesá꞉ton naónha ienkheiatié꞉ten ne kowá꞉nen tahonhnikòn꞉raren, ne khók tó꞉kaken enshewatatré꞉wate tsi nikaweienhnó꞉tens;

²³ tánon kwáh enkheién꞉te nakoioʼokón꞉as nahonhní꞉heie. Tanon akwé꞉kon ne ononsatokénhtis kwáh enhiakoterienʼtá꞉rahne tsi Í꞉i katkátos noʼnikón꞉ras ó꞉ni nawé꞉ris, tánon kwáh ne entkwáion ne tsi sewahiatatʼtions ne sewahioʼténhseras tsi natehioténhtion.

²⁴ Ók ne sewatsá꞉khes ne thóh nón꞉we Thyatira, ne iáh tesewatienawáston kí꞉ken karihonhnienhní꞉tshera, né꞉ne tsi nítion ne iáh tesewahweientétaon nó꞉tiaʼkes tsi niienatónhkwa ne teionó꞉tes raoriwaʼshón꞉as Notkonserát꞉sen, ní꞉se enkwénhase, I ní꞉i thakwaién꞉hase nó꞉ia ní꞉iot iorié꞉niatste;

²⁵ ne khók sewatienawastónhak tsi ná꞉oten sewá꞉ien tsi nió꞉re téntke.

²⁶ Rononhà꞉ke tsi nihá꞉ti enhontkwé꞉ni tánon ienontashón꞉teren natsoténhseras tsi nió꞉re ienwahtonhontsiotʼten, Ní꞉i kwáh enhkherí꞉on nahonwanatkó꞉raste ne ronhnonontsakeró꞉nons;

²⁷ nahsakonatkó꞉raste ne enhónste ne teioteristakwenón꞉ni, tsi ní꞉iot nó꞉nen ne ionawastakarí꞉io kát꞉tse tewatokwáhton—

²⁸ satéiot tsi ní꞉i niwatiená꞉on ne kakasténhsera tsi nitaká꞉wi ne Rakeʼní꞉ha. Tsi raón꞉ha ne ratesénhnies ní꞉i kwáh ó꞉ni entʼkon ne tewenhtenhawí꞉tha otsisto.

²⁹ Áhnion ónhka ne teionhontaká꞉ronhte iontahonsátat tsi nahó꞉ten ne Roʼnikonrí꞉ioston ratónhnions ononhà꞉ke nononsatokénhtis.