Revelation 19 - Ohiatonhseratokénti

Tsi Tsiakotonhnáhere Ne Karonhiá꞉ke

¹ Ne tionhnonteratsetá꞉ne onkathón꞉teʼne kwáh né꞉ne iotsarókwen thóh karonhiá꞉ke, rontón꞉nions, “Teonwanonwerá꞉ton Ní꞉io! Kaiatakennhátsera tánon kaiataneráhkwatsera tánon kaʼshatsténhsera raó꞉wenk nón꞉kwa Ní꞉io,

² asè꞉ken ne raoriwenhtá꞉tshera orihwí꞉io í꞉ken tánon tkariwaié꞉ri; raónha rariwénhton ne kashennowá꞉nen wathokótha aónha iohetkénton tsi ionwenhtsá꞉te ne ióston naówenk kentétsera, tánon ne rarehwathákwen tsi iakokonwarhakhónhnion ne raonnhatseraó꞉kons.”

³ Shé꞉kon énskat ionshonterátste saonhní꞉ron, “Teonwanonwerá꞉to Ní꞉io! Iotsekwarakétskwen thóh nitewé꞉tha ahonhà꞉ke né꞉ne tsiotkonhón꞉we enkénhake tánon ne tsi nén꞉we enkénhake”

⁴ Tánon ne tewáhsen-nihá꞉ti ratiretsá꞉rons tánon ne rononhénion wahatiiatsenénhne tánon wahonwashén꞉naien Ní꞉io raón꞉ha renskó꞉te nanitskwá꞉rane, rontón꞉nions, “Eʼtho naiá꞉wenhne. Teonwanonwerá꞉ton Ní꞉io!”

⁵ Tánon thóh anitskwárahne nontontewenhní꞉ne watónnions, “Teonwanonwerá꞉ton nón꞉kwa Ní꞉io, shewakwé꞉kon ne raonhatsherashón꞉as, tánon ratikwé꞉kon ne ronwatsánis, kénk nahiesenhnáske ó꞉ni nahiesennhowá꞉nenhake.”

⁶ Eʼthò꞉ne tsi nonkathón꞉teʼne kwáh né꞉ne iakotsarokwá꞉ton iakotiohkowá꞉nen, kwáh thóh niiót tsi iorá꞉kare kwáh né꞉ne wé꞉so tewasénhtha tánon tsi niiorahkaré꞉ni tsi nateʼiotenonhianíhton iowerenhá꞉ties, tsiateotihenrétha, “Teonwanonwerá꞉ton Ní꞉io! Asè꞉ken ne Roiá꞉ner onkwáh Ní꞉io í꞉ken ne Roshatstenhserohwanenhkó꞉wa ronhnontí꞉io.

⁷ Á꞉nion ionkwahtshennonníhak tánon ionkwatonhnhárak, tánon tetshí꞉tion ne kahiataterakwátsera, asè꞉kenh ne raoniák꞉tshera ne teiotinaʼkarontón꞉ʼa owí꞉ra ón꞉we, tánon ne ró꞉ne iakotateweiennenhtá꞉ʼon;

⁸ nakahón꞉ha iontahtá꞉wi ne ne ahiakotseronhniáton ne waʼniatarí꞉io, teiostʼwát꞉te tánon ioiá꞉nere”— ne waʼniá꞉tarí꞉io né꞉ne kéntons tsi raʼtiiotenhserí꞉ios ne roʼtiiatatokéntis.

⁹ Tánon ne raronhiakeró꞉non wahakénhase, “Shiá꞉ton kí꞉ken: Iakotaskáts ná꞉ha tsi niiá꞉kon ne ionthontonkará꞉wi tsi roʼthennió꞉te rokhwáhere ne teonakaronhtónha owí꞉ra.” Tánon wahakénhase, “Né kí꞉ken ne raowenhnaó꞉kons ne Ní꞉io.”

¹⁰ Eʼthó꞉ne thóh waʼtiá꞉taièn꞉tane rashí꞉tát꞉ta nahishén꞉naien, ók wahakénhase, “Ní꞉se iáh teió꞉wenk ne naʼshé꞉re! Í꞉ih tánon ní꞉se teionkeniriwaienawákon ionkenihió꞉te skátne ne sewatenroshón꞉as ratikwé꞉kon ne ronón꞉ha ratihá꞉we norihwí꞉io né꞉tho Ié꞉sos rorihotáshion. Ahonwashén꞉naien Ní꞉io!” Asè꞉ken noriwihioón꞉we né꞉tho Ié꞉sos rorihotáshion neh iakoshatstenserá꞉wis nonkweʼokon naiontʼró꞉ri ne Ní꞉io raoteriwanhothátsera.

Ne Rosaténhtse Kanaskwaʼrá꞉ken

¹¹ Eʼthó꞉ne wakatkáto onteronhianhotónko, tánon thóh nón꞉we ní꞉res kanaskwará꞉ken! Ne roʼshá꞉tentse ne ronwanaʼtónhkwa Roʼriwatóken tánon Oriwí꞉io í꞉ken, tánon thóh kariwakwarishontserá꞉kon tsi tehaiatoréhtha tánon rateriioserónhnis.

¹² Ne raká꞉rakes kwáh né꞉ne otón꞉kwa ó꞉tsire, tánon wé꞉so rononwaró꞉rons; tánon thóh kashénhnare né꞉tho iáh ón꞉ka teiakoterièn꞉tare nahó꞉ten kén꞉tons kwáh rahonhatsí꞉wa khók roterièn꞉tare.

¹³ Neh róston nateweiára onekwensá꞉ke iehió꞉kwe, tánon ne ronwanatónkwah Ne ne Raʼó꞉wenhna Ní꞉io.

¹⁴ Tánon ne konwaterí꞉iose ne karonhiá꞉ke, ne ronatseronhniáton ne waniatarí꞉ios, washokwará꞉ken tánon ioiá꞉nere, rahón꞉ha ronhwásere rotishaténhtse kanaskwará꞉ken.

¹⁵ Thóh tsi raʼsakáronhte tkaiá꞉kens iosarotí꞉ie ne enshakoièn꞉te ne ronhnonhontsakeró꞉nons, tánon kwáh rahón꞉ha enshakokʼkoraste ne enráste ne teioteristakwenónhni; kwáh tenharatatséshon ne otsí꞉tsa kanekonhniátha né꞉ne raonakwáhtsera ne raoterhiatitkhóntsera ne Ní꞉io ne Roshatstenhserowanenhkó꞉wa.

¹⁶ Raʼotewehiarákwahke tánon ranhí꞉tsake thóh kasenhná꞉re, “Sakonontí꞉ios ne Rontinontí꞉ios ó꞉ni Sakoiá꞉ner ne Rotiiá꞉ners.”

Ne Kaʼtsinonhiowá꞉nen Tánon Ne Raotsió꞉kwas Ronterí꞉ios Wahonwatisénhni

¹⁷ Eʼthó꞉ne wahí꞉ken raronhiakeró꞉non karáhkwake í꞉rate, tánon rowenhnakaré꞉ni tsi iasakonónke ratikwé꞉kon notsitenhokónhas ne ratiwerókwas ne ratítses è꞉neken tsi iowé꞉rare, “Káts, sewanitsiokwaró꞉rok ne kowá꞉ne rokwáhere ne Ní꞉io,

¹⁸ neh naietsiwaʼrá꞉ke ne rotinontí꞉ios, né꞉ne raʼotihierontashón꞉as sakotihéntense ronterí꞉ios, ne ratihierontashón꞉as ne ratiʼshatstes, ne raotihierontashón꞉as koshá꞉tens tánon tsehatikwé꞉kon ne roʼtishá꞉tens—akwé꞉kon nohierontashón꞉as, tetsá꞉ron ne iontatewenhní꞉io tánon ne ienhá꞉tsera, tetsá꞉ron nahiesenhnáska tánon nahiesennhowanénhke.”

¹⁹ Eʼthó꞉ne waʼhí꞉ken ne katsinoniowá꞉nen tánon ne rontinontí꞉ios tsi ionwenhtsá꞉te skátne ne raotitióhkwas ronterí꞉ios waʼonhnitsiokwaró꞉roke nahonteriioserónhni niahonwatiaʼtón꞉ti ne roshá꞉tentse koshá꞉tens tánon niahonwanatsatónhti ne raotióhkwas ronterí꞉ios.

²⁰ Tánon ne katsinonhiowá꞉nen wahonwaié꞉na, tánon skátne ne iáh tehotiriwató꞉kens rothitokénse né꞉ne ronón꞉ha roʼtiioténʼen raohénton ne wenestanion tsi ne róston tsi nishakonikonraténhni tsi niiá꞉kon rotiiená꞉on ne rahohiatónkwa ne katsinonhiowá꞉nen tánon tsi niiá꞉kon ne konwashén꞉naien ne raohiatonhnishón꞉as. Tetsá꞉ron kí꞉ken iahonwatiiatónhti tiehonhnónhe thóh tsi kaʼniá꞉tare ne ótsire né꞉tho ne iotékha ne watenatentástha.

²¹ Tánon ne ronátiakes né꞉ne waotinonwarhià꞉kon ne raosarehkó꞉wa ne rosaténhtse koshá꞉tens, ne nasarehkó꞉wa ne tkaiá꞉kens tsi rasaká꞉ronhte; tánon ratikwé꞉kon ne otsitenokónhas ne ratiwerókwas ne wahonnitséokwe ne raotiierón꞉tas.