Revelation 17 - Ohiatonhseratokénti

Ne Kashennowá꞉nen Wathokó꞉tha Tánon Ne Katsinonhiowá꞉nen

¹ Eʼthò꞉ne saiá꞉ta ne raronhiakeró꞉non tsi niká꞉ien rahá꞉we ne tsá꞉ta nikatsetá꞉ke ákta nontá꞉re tánon wahakénhase, “Káts, enkonhnatónhase tsi ní꞉iot tsi enkonwariwénhte ne kashennhówane wathokótha, ne né꞉tho kanatowá꞉nens tsi niká꞉ien ne kaniataraktontses kanatón꞉nianions,

² ahón꞉hake ne rontinón꞉tí꞉ios tsi ionwenhtsá꞉te wahón꞉teriwatentsate ne kentetsera í꞉ken, tánon ne ne otsítsa wahá꞉konekanontaon ne ronhnón꞉hontsakeró꞉nons tsi nahó꞉tinonwará꞉tonhseron.”

³ Káti iahatiaténhawe thóh atonhnhetsherá꞉kon tsi tewahtonhontsá꞉ien ne iahonwenhtsiatʼtenhá꞉ke, tánon wákʼken iónkwe thóh kenskwá꞉here nonekwénhtara nihaʼsó꞉koten katsinonhiowá꞉nen né꞉ne kwáh titkasenhnáhere ne kariwaieshá꞉tsheras, tánon tsá꞉ta nihonontsístonhte tánon oié꞉ri natehonakà꞉ronhte.

⁴ Ne iónkwe ne iotseronhiá꞉ton arihwaʼkonhné꞉ha tánon onekwénhtara niwashokó꞉tens, tánon ne iorasestánion ne owistanó꞉ron tánon owistanoronshón꞉as tánon onekó꞉ras, ne kahá꞉we ne watsá꞉nake ne owistanó꞉ron teiontʼnekontáhkwa titká꞉here ne kariwástons ó꞉ni ne teiótions né꞉ne ahón꞉ha ahó꞉wenk kentétsera:

⁵ tánon thóh kakenkwahrá꞉ke kahiá꞉ton kashén꞉na, kariwaséhton: “Babylon ne kasenhnowá꞉nen, ne konwaʼnisténha ne konthokótha tánon ne tsi ionwenhtsá꞉tes ne teiótions.”

⁶ Tánon wák꞉ken né꞉tho iónkwe tsi ne iononwarathónton ne raotinekwénhsas ne rotiiatatokéntis ó꞉ni raotinekwénhsas ne rotiriwatokénʼne rahonhà꞉ke ne Ié꞉sos. Nó꞉nen sák꞉ken, ní꞉i teiotenonhiá꞉niton tsi onkeriwanerá꞉ko.

⁷ Ók ne raronhiakeró꞉non wahakénhase, “Nontié꞉ren tsi nisariwanerakó꞉on? Í꞉i kwáh enkonró꞉ri ne kariwashé꞉ton naorihwà꞉ke ne iónkwe, tánon ne katsinoniowá꞉nen ne tsá꞉ta niʼonhnontsístonte tánon noié꞉ri nateonakarón꞉te né꞉tho raiatenhá꞉wis.

⁸ Ne katsinoniowá꞉nen ne wátsken né꞉ne rónhnekwe, iáh kíʼ ó꞉nen tesrón꞉nhe, tánon ó꞉nen thó꞉wa ahontaharákten tsi nón꞉we ne iáh tetkanón꞉kware iosonwakáronhte tánon thóh nón꞉we nienhénre nahahiatá꞉ton. Ó꞉ni ne ratinákeres ne tsi ionwenhtsá꞉te, né꞉ne ronón꞉ha ne iáh tehatisénhnare ne kaiatonhserá꞉kon ne iónhne ne sonnitskwáren ne tsi ionwenhsá꞉te, kwáh enhotiriwanerá꞉ko nó꞉nen enhón꞉waken ne katsinoniowá꞉nen, tiorì꞉wa tsi nirónhnhekwe tánon iáh ó꞉nen tesrónnhe tánon kíʼ shé꞉kon ensewathó꞉tasi.

⁹ “Ne kí꞉ken kariwanón꞉tons noʼnikón꞉ra ne wateʼnikonrathókha: ne tsá꞉ta nikanontsístakes né꞉ne kéntons ne tsá꞉ta niionontá꞉kes tsi nón꞉we ne iónkwe nikenskwáhere; kwáh ó꞉ni ne kéntons, tsá꞉ta niotinontiiotsherá꞉kes,

¹⁰ ók wísk nihá꞉ti ó꞉nen ronenhé꞉ion, saiá꞉tak khók srón꞉nhe, tánon nó꞉ia aré꞉khók nénhne teothotáshion; tánon nó꞉nenh enrá꞉we, nikarihwé꞉sa tsi enhonontí꞉ioke.

¹¹ Tsi nokwáh ne katsinoniowá꞉nen né꞉tho ronhnheʼkwe tánon ó꞉nenh iáh tesrón꞉nhe, raón꞉ha ne satekonhá꞉ton í꞉ken ók ne tehatinérenkwe ne tsá꞉ta nihá꞉tikwe, tánon thóh niahawenonhátie nahonwátonhte.

¹² Tánon ne oié꞉ri nikaná꞉karake ne wasatkáto né꞉ne oié꞉ri nihotinontiiotsherá꞉kes ronón꞉ha ne á꞉re khók teotiiená꞉hon ne kanontiió꞉tsheras aoshatsténhsera, ók enhatiié꞉na kíʼ ne kakweniáhtshera tsi roʼtinontiiós í꞉ken né꞉ne enkák khók enkawistáheke nenhkariwésonke, skátne ne katsinonhiowá꞉nen.

¹³ Ne kí꞉ken ne iateonatenikonraiéston tsi wahontiakwaríhsi ne raotishatsténhsera tánon ne raotikweniá꞉tsheras raonhá꞉ke ne katsinonhiowá꞉nen;

¹⁴ ne ronón꞉ha kwáh enhonterihioserónhni rahonhà꞉ke ne teonakaronhtón꞉ha, tánon ne teonakaronhtón꞉ha kwáh kíʼ ensakosénhni, asè꞉ken raón꞉ha ne Sakoiá꞉ner ne Roʼtiiá꞉ners ó꞉ni Sakonontí꞉ios ne Rontinontí꞉ios, tánon tsi nihiá꞉kon ne raónha ratikwekonháties né꞉ne ronwatinaʼtónhkwa ne ronwatiiatarákwen tánon rotiriwatóken.”

¹⁵ Tánon wahakénhase, “Nonekános ne wasatkáto, tsi nón꞉we ne wathokótha nikenskó꞉te, onkweʼó꞉kons iakó꞉ton tánon kanenhrowá꞉nenh tánon ne iakahontsakeró꞉nons ó꞉ni naronhkhá꞉tsheras.

¹⁶ Tánon noié꞉ri nikanakarákes né꞉tho wasatkáto, né꞉tho tánon ne katsinonhiowá꞉nen enkonwá꞉shon ne wathokó꞉tha; ronón꞉ha kwáh enkonwanenskwenhá꞉ton tánon enkonwanhostón꞉ni; ronón꞉ha kwáh enkonwahwá꞉rake tánon enkonwatsiatatsáhate otsirá꞉ke.

¹⁷ Asè꞉ken Ní꞉io iateoriwaientáse ne rawerhiá꞉ne ne thóh nakaiéren tsi nihotenikonrónhni tsi roriwanonwéhon nahontasaká꞉wen ne raotinontiió꞉tsera raonhà꞉ke ne katsinonhiowá꞉nen, tsi niió꞉re ne raowenhnaó꞉kons ne Ní꞉io kwáh iewatésha.

¹⁸ Ne iónkwe ní꞉se wásken né꞉ne kashenhnowá꞉nen kanatowanénhke né꞉tho tsiakoniarotá꞉ron ne rontinontí꞉ios tsi ionwenhtsá꞉te.”