Revelation 15 - Ohiatonhseratokénti

Ne Raronhiakeró꞉non Ne Roʼtienawáston Ne Tsá꞉ta Ní꞉kons Nonakénkha Kanratariné꞉tsheras

¹ Eʼthò꞉ne ó꞉ia sakatkáto tsi niwatieronhníststa ne karonhiá꞉ke, teiotenonhianì꞉ton tánon ioriwanerá꞉kwat tsá꞉ta nihá꞉ti ratironhiakeró꞉nons ne ronatienawáston ne tsá꞉ta ní꞉kons kanratariné꞉tsheras, né꞉tho ne nonakénkha í꞉kens, Asè꞉ken tsi nokwáh ne ronón꞉ha ne raoterhiatitkhóntshera ne Ní꞉io iahontók꞉ten.

² Tánon tsi nakatkáto tsi nahó꞉ten onhtotá꞉si kwáh né꞉ne kaniatarakeʼkó꞉wa otsishé꞉ra í꞉ken tekaiéston ótsire, tánon tsi niiá꞉kon ne ronwashén꞉nion ne katsinoniowá꞉nen tánon ne raoiatonhnishón꞉as tánon tsi niiothiáton ne raoshén꞉na, thóh rónhnete kaniatarák꞉ta ne kaniatarakeʼkó꞉wa ne otsí꞉sera í꞉ken ne ratihawáhions ne raonhowakó꞉wa ne karenshotaróʼkhons ne Ní꞉io.

³ Tánon ne wathatirihwákwe ne Mahís raorénhna, né꞉ne Ní꞉io raonhá꞉tshera, ne ó꞉ni raorénhna ne Teiotinaʼkarontónha owí꞉ra: “Teiotenonianì꞉ton tánon ionerá꞉kwat ne saioʼténhsheras, Saiá꞉ner Ní꞉io né꞉ne Sashatstenhserowá꞉nen! Kaianeren tánon orihwí꞉io í꞉ken ne sawenénhnas, Shenontí꞉ios ne ronhnonhontsakeró꞉nons!

⁴ Saiá꞉ner í꞉se ne iáh teshaterónhni tánon aieshasenhnowánate? Asénke iateshiá꞉ti ne sahiatatokénhti. Akahontsakwé꞉kon kwáh éntsien tánon enieshasénhnaien sahén꞉ton, asè꞉ken ne sariwenhtá꞉tsera kwáh kíʼ iotehrihó꞉tashion.”

⁵ Shontóhetste kí꞉ken iakatkáto, tánon nononsatokentikó꞉wa ne tsi ronathatoseró꞉te ne ratiriwaní꞉rats thóh karonhiá꞉ke watewatenonhón꞉ti,

⁶ tánon thóh tahatiiá꞉kenhne ononsatokentikó꞉wane ne tsá꞉ta nihá꞉ti ratironhiakeró꞉nons ne ronatienawáston ne tsá꞉ta nikanhrákes, ne ronatieronhiáton ne kwáh teioniataraswáte kará꞉ken, ne ó꞉ni teonatatskwenákʼton ne owistanó꞉ron niwashokó꞉ten,

⁷ Eʼthò꞉ne saiá꞉ta ne kaié꞉ri nihá꞉ti ratironhiakeró꞉nons tashaká꞉wen ne tsá꞉ta nihá꞉ti ratironhiakeró꞉nons tsá꞉ta nikatsá꞉kes nowistanó꞉rons í꞉ken kwáh ne kaná꞉non ne raoterhiatitkhóntsera ne Ní꞉io, tsi raónha ne ronhnhehón꞉we ne tsi nén꞉we tánon tsi nén꞉we enkénhake;

⁸ tánon nononsatokentikó꞉wane kwáh tontakaienkwará꞉rahne thóh nontá꞉we ne raohiatanerakwahtsherá꞉kon ne Ní꞉io tánon ne raoshatstenhserá꞉kon, tánon iáh ónhka taiekwé꞉ni niahiontá꞉wehiate nonhnonsatokentikó꞉wane tsi niió꞉re ne tsá꞉ta kanratarihnétshera ne tsá꞉ta nihá꞉ti ratironhiakeró꞉nons thotí꞉ha ienwatót꞉ten.