Revelation 14 - Ohiatonhseratokénti

Ne Teonakarontónha Tánon Ne 144,000 Nihá꞉ti

¹ Ethò꞉ne iakatkáto, tánon thóh í꞉rate teonakarontónha owí꞉ra tsi ionón꞉te ne Zion! Tánon ne ratikwé꞉kon ne énska tewenhniáwe kaiéri niwáhsen-kaié꞉ri niwenhniaweheʼtseráhsen nihá꞉ti né꞉ne rahónha tánon ne roʼní꞉ha raotishén꞉na ne tehonwatiiatónkwen ratikwenhká꞉rakes.

² Tánon wakewenhná꞉ronhke thóh nontá꞉we karonhiá꞉ke thóh nikawennhó꞉ten kwáh né꞉ne wé꞉so tewaséntha tánon kwáh tsi niiorakáre kwáh né꞉ne iorakaré꞉ni tsi iowé꞉ren; ne owén꞉na onkatontè꞉ne thóh nikawenhnhó꞉ten kwáh né꞉ne onhowakó꞉wa ronaterén꞉note.

³ Tánon wahthatirihwàkwe orenhná꞉se ohén꞉ton tsi wanitskwaratseró꞉te tánon raotihénton ne kaié꞉ri nihá꞉ti ne ronhnonʼnheón꞉we ratironhiakeró꞉nons ó꞉ni raotihén꞉ton ne rotitstonhonkónha. Iáh ónhka thaónton nahieweientè꞉tane né꞉tho karén꞉na ne khók ne énska tewenhniá꞉we kaiéri-niwáhsen kaié꞉ri nateonenhiawehetseráhsen ronónha ne shonwahtiiatákwen ne tsi ionhontsá꞉te.

⁴ Ne tsi ronón꞉ha iáh tateonatatsiatastónston skátne ne konhnón꞉kwe, asè꞉ken iáh teotiniá꞉kon; ronón꞉ha ronwahnonterátses ne teonakarontón꞉ha owí꞉ra kwáh tsik nón꞉we nienhénre. Ronón꞉ha ne shonwatiiatákwen tsi nokwáh ne onkweshón꞉as kwáh né꞉ne entewatsetrénhte kaientwákwen ne enthón꞉ion ne Ní꞉io tánon ne teotinakarontónha owí꞉ra,

⁵ tánon ne rathisákon iáh nonhó꞉wen tekatsénhrion; kwáh iáh othé꞉non teotiní꞉kon.

Ne Raonateriwanhothátseras Ne Áhsen Nihá꞉ti Ratironhiakeró꞉nons

⁶ Eʼthò꞉ne ó꞉ia wahí꞉ken raronhiakeró꞉non rátie shatekaronhí꞉ien, ne rahá꞉we ne tsi nén꞉we kariwí꞉io ne nahonwatiró꞉ri tsi nihiá꞉kon ne iakónnhe ne tsi ionhontsá꞉te—kwáh tsi niateienekwenhsá꞉ke ó꞉ni ne kentióhkwas ó꞉ni nakoronkhátsera ó꞉ni nonkwehó꞉kon.

⁷ Tsi wahén꞉ron kwáh í꞉ken tsi rowénhte, “Tetserenhsá꞉ron ne Ní꞉io tánon tátion ne kaiatanerakwáhtsera, asè꞉ken ne kawistáhets ne raoriwenhthá꞉tsera ón꞉we aseken rahonha tensakohiatorente nonkweshonha. Senhnaien tsi rahonha roson tsi karonhiate oni tsi ionwenhsate, kaniatarakekowa, tanon ne tsi ionekotons nonekanos!”

⁸ Eʼthò꞉ne ó꞉ia raroniakeró꞉non, né꞉ne tekenihá꞉ton raroniakeró꞉non, wahononterátse ne thotierénhton, ratón꞉nions, “Tehiohiosheniénhen, tehiohiosheniénhen se ne Babylon ne konwakowá꞉nen! Ahón꞉ha iakahonhnién꞉ni ratikwé꞉kon ne ronhnonhontsakeró꞉nons ratinekí꞉ra notsí꞉tsa ne tsi natehioterhiatitkónskon naón꞉ha tsi nihionhí꞉kon.”

⁹ Eʼthò꞉ne ó꞉ia raronhiakeró꞉non, ne nasénhaton, washakononteratséshon nó꞉ia tenihiáse, tehaséntʼtos tsi nihawén꞉na, “Tsi niiá꞉kon nónhka enhonwashén꞉naien ne kaʼtsinoniowá꞉nen tánon ne raoiatónhni, tánon roʼtiiená꞉on tsi tehonwatikenkwaraiá꞉ton khóks ne satiweientetákwen rontsá꞉nake,

¹⁰ kwáh ó꞉ni ronón꞉ha enhatinekí꞉ra ne notsí꞉tsa né꞉ne Rawenni꞉io raoterhiatitkhóntshera, tewawéhron kwáh iáh thatekanekaiéston ne kák꞉sakon ne raonakwáhtshera, ne ronón꞉ha kwáh enhon꞉watironhiákente ó꞉tsire enwátston tánon iontenathentásta thóh raotihén꞉ton ne roʼtiiatatokénhtis ratironhiakeró꞉nons tánon raohén꞉ton ne teonakarontónha owí꞉ra.

¹¹ Tánon ne iohtékha ne rotironhiakéntha tsi nén꞉we tsi enhiotékhake. Iáh teká꞉ien naonhorisénhtane nenhtsekhè꞉ne khéks noʼkarasné꞉ha né꞉ne tsi nihá꞉ti ne ronón꞉ha ronwasenhná꞉ienskwe ne katsinonhiowá꞉nen tánon ne raoiatónhni tánon ne nónhka iakoiená꞉hon ne teonwatihiatónhkwen ne raoshén꞉na.”

¹² Kénen ne kén꞉tons tsi natehastiwishátste ne rotiiatatokéntis, né꞉ne tsi nihiá꞉kon iakotsenawáston ne raoriwatátshera ne Ní꞉io tánon iakotsenawáston ioriwató꞉ken ne tewetá꞉kwen raonhá꞉ke ne Ié꞉sos.

¹³ Tánon wakewenhná꞉ronhke thóh nontá꞉we karonhiá꞉ke watón꞉nions, “Shiá꞉ton kí꞉ken: Iakotáskats ne iakawenhé꞉ion ronón꞉ha kén꞉en ienwatáhsawen ronenhé꞉ion raonhà꞉ke ne Roiá꞉ner.” “Hen,” rá꞉ton ne Ronikonrí꞉ioston, “kwáh enhontoríhsen tsi nihonathatonhnakenà꞉on, Asè꞉ken tsi nihatiweienhó꞉ten enhotinonhtérane.”

Iakoienthokwenhá꞉tie Nonhontsakékha Iotonhní꞉son

¹⁴ Eʼthò꞉ne iakatkátho, tánon thoiotsikerá꞉re katsikeraʼrá꞉ken, tánon ne renskó꞉te notsikerá꞉ke ne teshiatié꞉ren Ronwaiénha nónkwe, owistanó꞉ron í꞉ken rononwaró꞉ron, tánon ne ne hioiotí꞉ie iontkwirhiástha rahá꞉we!

¹⁵ Thihá꞉te raronhiakeró꞉non tahaiá꞉kenhne nononsatokentikówahne, iehonatónhnions tsi nihawenhna tsi niká꞉ien ne thóh renskó꞉te notsikerá꞉ke, “Íhshatst ne sá꞉wenk iontkwirháststha tánon tsenthó꞉ko, Asè꞉ken tsi nikawistá꞉heks naieienthó꞉ko iaʼkáhewe, tiorì꞉wa ne kaienthó꞉tshera ne tsi ionwenhtsá꞉te kwáh í꞉ken tsi ionhó꞉rari.”

¹⁶ Sót꞉ki tsi niká꞉ien ne renskó꞉te nhotsikerá꞉ke tarotaró꞉ke ne raosá꞉re iontʼkwirhiástha ne tsi ionwenhtsá꞉te, tánon ne tsi ionwenhtsá꞉te wakaientʼwakwénhne.

¹⁷ Eʼthò꞉ne ó꞉ia raronhiakeró꞉non thontahaiá꞉kenhne nononsatokentikó꞉wane ne karonhiá꞉ke, tánon raónha ó꞉ni rahá꞉we ne iosarotí꞉ie iontʼkwirhiástha.

¹⁸ Eʼthò꞉ne ó꞉ia raronhiá꞉keró꞉non thontahaiá꞉kenhne ne tsi ietsenharáhkwake, né꞉ne raronhiakeró꞉non tehatsenhanónhne, tánon iathohénrehte tsi nihawénhna raonhà꞉ke ne rahá꞉we ne iosarothí꞉ie iontʼkwirhiástha, “Í꞉shatste ne iohiothí꞉ie shá꞉sare iontʼkwirhiástha tánon sheró꞉rok ne ionhorhokwenhtónhnions ne watenenharíseres ne tsi ionwenhtsá꞉te, Asè꞉ken ne naonenhá꞉res kwáh ionhó꞉rari.”

¹⁹ Sók kíʼ ne raronhiakeró꞉non tahaʼsharotaró꞉ke ne tsi ionwenhtsá꞉te, tánon thóh iathatesénhniate ne kowá꞉nen teionhiaritháhkwa né꞉ne raoterhiatitkhóntsera ne Ní꞉io.

²⁰ Tánon ne teionhiaritháhkwa watewahiá꞉rite nátste nakanatháti, tánon takanekwenhshó꞉te ne teionhiaritháhkwake, thóh nió꞉re è꞉neken niahá꞉he kwáh tsi nihiotkonshó꞉taron ne koshá꞉tens, thóh nió꞉re niahá꞉he kakʼnon neh tékeni tewenhniáwe niwatenienhtentsherá꞉ke nihioháhes.