Revelation 12 - Ohiatonhseratokénti

Ne Iónkwe Tánon Ne Iononwarontsétha

¹ Né꞉ne kowá꞉nen ioriwanerá꞉kwat ontothá꞉shon karonhiá꞉ke: iónkwe ne iotieronhniá꞉ton karáhkwa, tánon asontenhnékha karáhkwa iorasitakenserákwen, tánon ne kanontsí꞉ne ne iononwaró꞉ron ne kakahkwentonhniáton ne tékeni iawénhre nikatsistóhkwake.

² Kahá꞉we iowiraientáhsere tánon tewaséntʼtos tsi niiorón꞉iake teiowehestá꞉nions tsi iowiraientáhsere, thóh tsi niioroniáken tsi iowiraientáhsere.

³ Ethò꞉ne ó꞉ia áre ioriwanerákwat sontotá꞉si ne karonhiá꞉ke: rakowá꞉nen teotenhokwentáronhte rononwarontsétha, tsá꞉ta nionontsístonte tánon oié꞉ri naʼteonakáronte, tánon tsá꞉ta naʼteotenonwará꞉nen ne ranontsí꞉ne.

⁴ Ne rentáhsake wahónhewe nasénhaton nieiotsistohkwarónhnions tánon ohontsá꞉ke wahtewatesénhniete. Ethò꞉ne ne rononwahrontsétha waʼthá꞉tane ahohénton ne iónkwe tsi niká꞉ien ne ó꞉nenh thó꞉wa aiowiraién꞉taʼne, ne káti nahón꞉ton ahononwarhià꞉khon ne roiénha kwáh tsi niiostó꞉re enrehnakerá꞉te.

⁵ Tánon waonakerátste ne roiénha, roskenrá꞉keta rát꞉saha, raónha ensakotʼkó꞉raste ratikwé꞉kon ne ronhnonontsakeró꞉nons ne ne karístatsi enhatenhnitseronhniá꞉te. Ók kíʼ ne roiénha takonwahwirakwatʼte tánon Niió꞉ne niahonwahiaʼténhawe tánon tsi tewanitskwaratsérote ne raonitskwá꞉ra;

⁶ tánon ne iónkwe onté꞉ko thóh niahá꞉he iahonwenhtsiaténhake, thóh nón꞉we nihanaktaseronhnién꞉ni ne Ní꞉io, káti thóh nón꞉we enwá꞉ton takonwasniéne né꞉ne énska teweniaweheʼtsheráhsen tékeni tewenhniáwe iáh-iak niwenhniserá꞉ke.

⁷ Tánon thonteriioseraiéntane ne karonhiá꞉ke; Wiseh tánon ne raoronhiakeró꞉nons wahonterí꞉io ne rononwarontsétha. Ne rononwarontsétha tánon ne raoronhiakeró꞉nons tahotinákwen,

⁸ ók ne rononwarontsétha wahonwasénhni, tánon iáh ó꞉nen thé꞉nen ne ronónha teshotinaktaiénhtakwe ne karonhiá꞉ke.

⁹ Ne rakowá꞉nen rononwarontsétha tahonwaiathénte, né꞉tho oniarasthénha, raónha ne ronwanaʼtónhkwa ranikonratʼsen tánon notkonseráksen, ne sakonhowenhténhnis nohontsakwékon—ne raónha ohontsáke tonwahiatónhtion, tánon ne raoronhiakeró꞉nons tonwatiiatónhtion skátne ne raónha.

¹⁰ Eʼthò꞉ne onkathón꞉teʼne iowénhte thóh karonhiá꞉ke, watón꞉nions, “Ó꞉nen ón꞉we natesenhnié꞉tshera tánon ne kaʼshatsténhsera tánon ne raonhnontiiótshera nonkwáh Ní꞉io tánon ne raokweniátshera ne roiatarákwen Kerístos, asè꞉ken ne sakoriwá꞉ros nonkwatatekénhas ó꞉ni nonkwatenhoséntsheras tsi thonwaiathénton, raónha sakoriwá꞉roskwe tsi niwenhní꞉seres ó꞉ni tsi niwasón꞉tes raohén꞉ton ne Ní꞉io.

¹¹ Ók ne ronwasenhniéton ne raón꞉ha ne raonekwénhsa ne teotinaʼkaronhtónha owí꞉ra tánon nowén꞉na ronatrorhiá꞉ton, tánon ronathateweienhnentá꞉on nahontsakwaríshion tsi ronhnón꞉nhe ó꞉ni nahonní꞉heie.

¹² Sewatonhnáren káti, í꞉se ne tsi karoniá꞉tes tánon tsi niiá꞉kon ne nón꞉we niiená꞉kere! Ók iotenhtá꞉sere ne tsi ionwenhtsá꞉te ó꞉ni ne kaniatarakeʼkowáhne, asè꞉ken ne ótkon teiathasénton né꞉ne teiotenonianí꞉ton aterhiatitkhóntshera, tiorì꞉wa tsi roterièn꞉tare ne raó꞉wenk kaʼwistá꞉hets tsi kenk nikariʼwésa!”

Ne Rononwarontsétha Sahaterí꞉io á꞉re Ne Tsi Ionwenhtsá꞉te

¹³ Káti nó꞉nen ne ronhnonwarontsé꞉tha sahatkáto né꞉tho tsi nithonwaiatóntion netá꞉ke tsi ionwenhtsá꞉te, wahaseréhson ne iónkwe tsi niká꞉ien ne iowiraientáhon roskenrakéhte.

¹⁴ Ók ne iónkwe ne tkonwá꞉wi tekanerahontsá꞉ke nakwekskó꞉wa raonerá꞉ontsa, ne káti nahón꞉ton taká꞉ten é꞉ren awé꞉te aonhá꞉ke noʼniáre ahonwenhtsaténhake niakátie, thóh nón꞉we tsionát꞉te ne takonwasniéne nikariʼwésa, né꞉ne áhsen niʼioseráke nikarì꞉wes.

¹⁵ Ethò꞉ne tsi rasaká꞉ronte noʼniáre takanekó꞉ten tsi ní꞉iot ne kaniataráke ne nahioiatakerákwe ne iónkwe, ne iahioiaténhawe.

¹⁶ Ók tsi ionwenhtsá꞉te wahosnié꞉non ne iónkwe; watewatskárawe tánon iahontneʼkanekwáne né꞉tho iononwaronhtsétha thonekawéron tsi rasaká꞉ronhte.

¹⁷ Eʼthó꞉ne ne rononwarontiétha wahanákwase ne iónkwe, tánon thóh niahá꞉re nasakoteriioserónhnien ne ronátiaʼkes ratitsaokónha, tsi nihá꞉ti ronatienawáston ne raoriwatátsheras ne Ní꞉io tánon ronatienawáston ne raotrorhiá꞉tshera ne Ié꞉sos.

Ne Tahatierénhte Katsinoniowá꞉nen

¹⁸ Eʼthò꞉ne ne rononwarontiétha thóh wathá꞉tane onesarón꞉kwake ne kaniatarakeʼkowáhne thí꞉ioke.