Revelation 10 - Ohiatonhseratokénti

Ne Raronhiakenó꞉ron Rahá꞉we Ne Ken Ní꞉wa Kaohrotakwenón꞉ni

¹ Tánon wahí꞉ken nó꞉ia rashátste raronhiakeró꞉non tahosnenhtonhátie karonhiá꞉ke, ne teotwanát꞉tonh notsá꞉ta, ioronró꞉te teioʼkwatá꞉se ne ranontsí꞉ne; ne rakón꞉sake thóh ní꞉iót kwáh né꞉ne karáhkwa, tánon ne rashinakéhsons thóh ní꞉iot kwáh né꞉ne iotón꞉kote.

² Rahá꞉we nikahorotáha tekatakwahrí꞉ton ne ratsá꞉nake. Ne saweientehtákwen nahashitáti thóh kaniatarakeʼkowá꞉ne iatehashitáhereh tánon ne sanekwá꞉ti nahashí꞉tate ohontsá꞉ke ne tehashitáhere,

³ iorakaré꞉ni tsi wathohénrete, kwáh né꞉ne kénreks rotonhrá꞉ien. Tánon né꞉nenh tehohénrehte, ne tsá꞉ta nihá꞉ti ratiwé꞉ras enká꞉wereh.

⁴ Tánon nó꞉nenh ne tsá꞉ta nihá꞉ti ratiwé꞉ras wahatiweráste, Ó꞉nenh shikhatón꞉sereh, ók wakewenhná꞉ronhke karonhiá꞉ke nontá꞉we watón꞉nions, “Tó꞉sa shiá꞉ton tsi nahó꞉ten ne tsá꞉ta nihá꞉ti ratiwé꞉ras wahonhní꞉ron, tánon kwáh tó꞉sa enshiá꞉ton.”

⁵ Ethò꞉ne ne raronhiakeró꞉non ne rí꞉ken í꞉rate kaniatarakeʼkowáhne ó꞉ni nonwénhtsá꞉ke wahanenhtsakétsko ne saweientetákwen karonhiá꞉ke niahaié꞉rate

⁶ tánon wahorarátsten tsi niká꞉ien ne ronhnheón꞉we ne tsi nén꞉we enkénhake, tsi raónha ró꞉shon ne tsi karonhiá꞉te tánon tsi nihioteriwátserens tsi karonhiá꞉te, ó꞉ni tsi niioteriwatséren ne tsi ionhonhtsá꞉te, ó꞉ni ne kaniatarakeʼkó꞉wa tánon tsi niioteriwatséren né꞉ne kaniatarakeʼkowáhne: “Thóh nón꞉we kwáh ó꞉nenh iáh tahonshontenhniskwáhton,

⁷ nok tsi nenhwenhniserá꞉tekes nó꞉nenh ne tsá꞉ta nihá꞉ti ratironhiakeró꞉nons enhonthatíste ne iehonrakwátsta, tsi nihoteʼnikonhrón꞉ni ne Ní꞉io kwáh kíʼ ienkanáhne, tsi nishakorihowanahténhni ne raonhatserashón꞉as rotitokénhse.”

⁸ Ethò꞉ne tsi niwakewenhnarónhken ne karonhiá꞉ke shé꞉kon sonkʼtháhrase, watón꞉nions, “Wáhs, iahá꞉saf ne kahorohtakwenónhni né꞉tho tekatakwahrí꞉ton thóh ratsá꞉nake ne raronhiakeró꞉non tsi niká꞉ien í꞉rate kaniatarakeʼkowáhne ó꞉ni nonhontsá꞉ke.”

⁹ Káti thóh niaháke raonhà꞉ke ne raronhiakeró꞉non tánon wahiró꞉ri nahontahákon ne kenkní꞉wa tsi kahiatonserakwenón꞉ni; tánon wahakwénhase, “Iahásaf, tánon ne í꞉sek; kwáh kíʼ enhiotskárake ne senekwentá꞉kon, ók tenhiotsikhetá꞉rake ne tsá꞉kon.”

¹⁰ Káti iaháko ne kenhní꞉wa kahiatonhserakwenhnón꞉ni ne ratsá꞉nake ne raronhiakeró꞉non tánon wáhkehke, thóh natehiotsikhè꞉tare ne tiá꞉kon tsi ní꞉iot ne otsinaʼkontaʼkwáhne otsikhè꞉ta ne tiá꞉kon, ók nó꞉nenh saʼké꞉ke, ne kenekwenhtá꞉kon wahotskárane.

¹¹ Ethò꞉ne wahonkénhase, “Ní꞉se kwáh ahó꞉wenk tsi ensheserihotáshien shé꞉kon iakotiohkowá꞉nen nonkwehó꞉kons ó꞉ni iakahontsakeró꞉nons tánon tsi niionhronkhatseró꞉tens ó꞉ni rotinontí꞉ios.”