Revelation 1 - Ohiatonhseratokénti

Ne Tsiotewenhnatserénhtons Ne Kanonweratón꞉tshera

¹ Ne karihotáshion raonhà꞉ke ne Ié꞉sos Kerístos, né꞉ne tsi nahó꞉ten ne Ní꞉io thó꞉wi nashakahotáshiase ne raonhatsherahó꞉kons ne ne tsi nahò꞉tens kwáh iostó꞉re tsi thóh nenhiá꞉wenhne; raónha thóh nihawenéston tsi thoteniéton ne raoronhiakeró꞉non raonhà꞉ke ne raonhá꞉tshera Sawátis.

² Sawátis raónha roriwahní꞉raton ne raowenhnaó꞉kon ne Ní꞉io tánon ne raoriwaniráhtsera ne Ié꞉sos Kerístos, iekaní꞉hare akwé꞉kon tsi nihotkáton.

³ Iakotáʼskat nónhka iewenhnanhótha iowénhte nowenhnaó꞉kons ne iekariwáken, tánon iakotáskats tsi niiá꞉kon ne akaónha iakotón꞉te tánon enhionteweién꞉ton tsi nahó꞉ten kaiá꞉tonhkwe né꞉tho; asè꞉ken tsi nikawistáhets ákta í꞉wes.

⁴ Í꞉i Sawátis iakheiá꞉tonhse ne tsá꞉ta nikaʼnónhsakes ne ononsatokénhtis né꞉tho nón꞉we Asia: Ataniténron saién꞉tak shonhà꞉ke ó꞉ni skén꞉non tsi nénhtewe raonhake tsi niká꞉ien ne ronhneón꞉we tánon raónha kénhne tánon kwáh raónha téntʼre, tánon ne tsá꞉ta niwatonhnhetserá꞉ke raohén꞉ton rón꞉nete ne raonitskwáhrane,

⁵ tánon thóh nénhtewe raonhà꞉ke ne Ié꞉sos Kerístos, ne ne roriwahtó꞉ken rariwaní꞉rats, ne ne thotierénhton sawenhnakerá꞉ton tsi nokwáh ne kenheiátne, tánon raónha teshakoniarotá꞉ron ne rotinontí꞉ios ne tsi ionwenhtsá꞉te. Raónha ne shonkwahnorónhkwa tánon sheshonkwahiatotarí꞉shions tsi nokwáh ne onkwahriwaneraháktseras thóh nitsawé꞉non raonekwénhsake,

⁶ tánon shontionhnién꞉ni nahitionkwetaién꞉take, ratitsihéntatsis enhohiò꞉tenhse ne Raoní꞉io tánon ne Roʼní꞉ha, raonhà꞉ke ká꞉ien ne kaiatanerakwhtsera óni ne kashastenhsera tsi nénhwe tánon tsi nienhenwe enkeánhake. É꞉ʼtho naiá꞉wenhne.

⁷ Satkáto! Tahawenonhátie thóh otsikerakéhsons; kwáh niatekaká꞉rake tsi enhonwá꞉ken, iekaní꞉hare tsi nihá꞉ti ne ronwaháson; tánon raónha enharihón꞉ni akwé꞉kon ne iená꞉kere tsi ionwenhtsá꞉te kwáh enwaktsithó꞉ko. Káti kwáh thóh nenhiá꞉wenhne.

⁸ “Í꞉i ne tsi tiotáhsawe (Alpha) tánon ne tsi iehiotókte (Omega),” ráton ne Roiá꞉ner Ní꞉io, raónha se tánon raónha tsi nitsotónhne, ne ne Roshatstenhserowá꞉nen.

Tsi Wahaténeste Ne Kerístos

⁹ Í꞉i, Sawátis, tsatateʼkénha raónha ne thawetákwen raonhà꞉ke ne Ié꞉sos ne roronhiakén꞉en óni ne kanakeráhsera tánon roteʼnikonratstáton, thóh nón꞉we tsi kawenhó꞉te ne konwanaʼtónhkwa Patmos tiorì꞉wa ne raowén꞉na ne Ní꞉io tánon ne roriwanirá꞉ti ne Ié꞉sos.

¹⁰ Í꞉i akatonhnatserá꞉kon kénhne thóh rawenhniserá꞉kon ne Roiá꞉ner, tánon onkatón꞉teʼne thók shón꞉ne ne ne iowenhnakaré꞉ni kwáh ne ne iehonrawátstha

¹¹ watón꞉nions, “Shiá꞉ton thóh kaiaʼtonhserá꞉kon tsi nahó꞉ten waʼsatkáto tánon iaseiateʼniénten ne tsá꞉ta nikanónhsake ionterenhnaientáhkwas, thóh nón꞉we Ephesus, Smyrna, Pergamum, Thyatira, Sardis, Philadelphia, tánon Laodicea.”

¹² Ethò꞉ne watkatkaraté꞉ni natkhéken ónhka né꞉tho akowén꞉na í꞉ken né꞉tho wahontháhrase, tánon tsi watkatkaraté꞉ni waʼkatkáto tsá꞉ta ní꞉kon owistanó꞉ron wathaseranihiontháhkwa,

¹³ tánon ashén꞉non nón꞉we kíʼ wathaseranihiontháhkwa waʼhí꞉ken saiá꞉ta kwáh tesiatié꞉ren nón꞉kwe roién꞉ha, ne rotieronhniáton ne waʼkó꞉ses tánon owistanó꞉ron niwashohkó꞉ten ská꞉ti nokwá꞉ti khók rotentskweʼnorónkton.

¹⁴ Ne ranontsí꞉ne tánon ne raonónhkwis thóh nikaráken tsi nikaráken nonón꞉weronh, kará꞉ken tsi ní꞉iot nonié꞉te; neh raká꞉rake kwáh ne ne otónhkwa ó꞉tsire,

¹⁵ ne rasitáke kwáh tsi ní꞉iot ne kwáh tekastarathéton kwé꞉nis, ne kawistanawénhton otsirá꞉ke, tánon ne tsi ró꞉thare kwáh ne teskaierón꞉tare wé꞉so tewasénhtha.

¹⁶ Ne saweiententhákwen ne rahá꞉we tsá꞉ta nikatsistóhkwake, tánon tsi rashakáronte takaiá꞉kenhne ne iohiotí꞉ie, tetsarónhkwen tsi iohiotí꞉ie, tánon ne rakónhsake kwáh né꞉ne karáhkwa teiostwáte kwáh kashatstenhseraná꞉non.

¹⁷ Nó꞉nen sahí꞉ken, watsiataién꞉taʼne rashitákʼtha tsi ní꞉iot nahonkihé꞉ionke. Ók wathakanisnónhsaren ne saweientenhthákwen, ratón꞉nions, “Tó꞉sa saterónh; Í꞉i ne tiotierenhthá꞉kwen tánon nonaʼkénkha í꞉ken,

¹⁸ tánon ne kónhne. Wakihé꞉ionhne, tánon satkáto, shón꞉nhe ne ne tsi nén꞉we enkénhake tánon tsi nienhénwe; tánon í꞉i ítkhawe nahonontónhkwa ne kenhé꞉ion tánon ne tsi tionhontsá꞉ien ne kenhé꞉ion.

¹⁹ Ó꞉nenh kíʼ shiá꞉ton tsi nahó꞉ten wasatkáto, tsi nahó꞉ten í꞉ken, tánon tsi nenhiáwenhne ne ken enhió꞉tsete.

²⁰ Ók tsi nihioteriwashé꞉ton ne tsá꞉ta nikatsistóhkwake né꞉tho wasatkáto ne skeweientetáhkwen, tánon ne tsá꞉ta ní꞉kons owistanó꞉rons wathaseranihiontháhkwas: ne tsá꞉ta nikatsistóhkwakes ne ne aotironhiakeró꞉nons í꞉ken ne tsá꞉ta nikanónsakes ionterenhnaientáhkwas, tánon ne tsá꞉ta ní꞉kons wathaseranihiontáhkwas né꞉ne tsá꞉ta nikanónhsakes ionterenhnaientáhkwas.