Psalms 97 - Ohiatonhseratokénti

Rawenni꞉io Ne Ohontsaʼkwékon Ronnontiʼiokówa

¹ Né Roiá꞉ner séh Ronnonhtʼi꞉io í꞉ken! Ánion ne tsi ionhontsáte waʼtonhnáren; iekaníhare nonkwershón꞉has ne ahí꞉non nió꞉re tkawenó꞉tons tsenakerénions iontsenhnónhni!

² Otsátas tánon ne kwáh tetiokaraskówa kwáh ne tehotsatátons; karihwakwarihshón꞉tsheras tánon kaiáneren né kenskwará꞉kwen ne raonitskwáhra.

³ Ótsire rahohénton í꞉wes, tánon ne iakotsatatʼtsáhatas ne ronhwáʼshons ne kwáh tsík nahontahiotserátonhke.

⁴ Né raówenk tewaʼninekaráwas tekaswatʼthétha nonwenhtsáke; nonwénhtsa watkáthos tánon waʼtsiahonʼontsísonhkwe.

⁵ Né tsi ionhnontarónhnions waʼkawistanáwenhne tsi ní꞉ioht notsikhéta aiewistanawénhte, raohénton ne Roiá꞉ner káien né tsi rahónha ohontsakwékon tesakoniarótaron nonhkweshónhas ne tsi ionhwenhtsáte.

⁶ Né tsi karonhiáte wenéstha ne Rawenni꞉io raorihwaʼkwarihshión꞉tsheras; tánon akahontsaʼkwékon nónkwe iontkáthos ne raoiatanerakwáhtshera.

⁷ Akwékon tsi nihatisénhnaiens ne kaiatonnishónhas waʼkonwanatéhaʼte, tsi niʼiákon né thóh nón꞉we nateierénhsarons ne iáh othènon tekarihwásthas kaiatonnishónhas; ratikwékon ne niʼiohokónhas tehontsátʼtons raohénton ne Roiá꞉ner.

⁸ Né Zion iotʼthónhte tánon iotsenhnónhni, tánon ne tsi kanataʼkérons ne Judah ionatonhná꞉here, né iorihonhníhon ne sarihwenhthátshera, Ó Sewenní꞉io.

⁹ Asèken í꞉se, O Saiá꞉ner, ne kwáh éhʼneken tisát꞉the nohontsaʼkwékon; í꞉se sénha sashaststenhserowánen tsi ní꞉ioht ne ó꞉ia niʼiohokónhas.

¹⁰ Né Roiá꞉ner sakonorónh꞉kwah tsi niʼiákon ierihwáshonhs ne karihwaʼhét꞉kens; ranikónhrare tsi ronhnonnhénions ne rotirihwaʼtóken rahonkwetaʼshón꞉has; shesakoniakéntha tsi nòkwah ne raotisasthenhserákon ne ronhnonkwetaʼhét꞉kens

¹¹ Né Rawenni꞉io ne tsi nithorihwaʼiéri teiakoswatʼthethénhnis kwáh tsi ní꞉ioht ne kahásehra ronónhake ne rahonkwetashón꞉has ne ronathonkwetaʼkwahríhshions, tánon né tsakohawithénhnis natsenhnonhniátsheras ne thotirihwaʼiéris.

¹² Sewaʼthonnárat rahonháke ne Roiá꞉ner, Ó í꞉se ne tionkwetaʼiéris, tánon thóh tesewaʼtenonhweráton raosenhnatokentíke!