Psalms 95 - Ohiatonhseratokénti

Iaʼkáhewe Naionterén꞉naien tánon Naiontewén꞉narakwe

¹ Ó ká꞉sewe, ánion tetsitewaʼnonweráton ne Roiá꞉ner! Ánion tethewaʼríwak natsenhnonhniátshera raohénton ne Rawenni꞉io, tsi rahónha teshonkwánes!

² Ánion ietewaʼtáweiat Nonʼnonsatokentiʼkówaʼne tánon tsitewaʼsénhnaien; tánon ne tethewaʼríwak natsenhnonniátsheras karenhnasónhas ne tehiotenonweratónhtha.

³ Asèken ne Roiá꞉ner tsi roshaststenhserowaʼkenkówa Rawenni꞉io í꞉ken, tánon rosasthenserowaʼnenhkówa tsi ronhnontí꞉io í꞉ken tsi nitesakoniaʼrotáron ne ronatsákes nʼiohokónhas.

⁴ Rahónha thoniaró꞉taron kwáh tsi naʼtehiahontsanó꞉tes ne tsi ionhontsáte; ne tsi nitiotenonthatónhnions rahónha nonhné꞉e raówenk.

⁵ Ne kaniatarakhekówa rahónha nonhné꞉e raówenk, asèken rahónha ró꞉son, ó꞉ni ne iahonwenhtsatʼthénke, né꞉ne ratsanáke ióshon.

⁶ Ó ká꞉sewe, ánion entsitewasénhnaien tánon tethewatʼtsáket raohénton, Ánion tethewathentʼtsóten rahohénton ne Roiá꞉ner, ne shonwahiatíson!

⁷ Asèken rahónha nonkwahʼNí꞉io í꞉ken, rahónha rahonkwetaʼshón꞉has ionkwahtón꞉on rahónha teshonkwahriwásnieʼse, tsi kíʼ natesakoriwásnieʼse ne teiotinakaronhtónha. Sewatahónsatat nón꞉wa wenhniseráte tsi nahoténsons ratónhnions!

⁸ Tó꞉sa sewathenontsistanírat, tsi né nihiawénhen ne Meribah nón꞉we, ne tewenniseráteʼkwe ne iahonwenhtsatʼthénke nón꞉we né Massah nón꞉we.

⁹ Nó꞉nen ne ietsisotʼthonkonkénʼen sahonkateniénhten, né nakheriwaʼníratʼtse, ethohʼsáne ronatkáton ne ioriwanerakwahténions tsi niwaʼtiothénʼen.

¹⁰ Asèken kaiéri niwáhsen niʼioseráke kenakwáhsene nètho onkweshón꞉has waʼkíron, “Né꞉ne onkweshón꞉has né iáh tehiakorihwaʼtóken, tánon iáh tehonthóntats nahontewénnahrakwe nakerihwatatʼtséras.”

¹¹ Wahkenakwénhenʼne ó꞉ni iorihwahníron wakarahrátsʼton: “Iáh nonwénton tiahatiráhtaʼne nonwentsáke tsi nónwe nikhehionhontsáwi nahonthoríhsen!”