Psalms 93 - Ohiatonhseratokénti

Rorakó꞉wa

¹ Né Roiá꞉ner rahónha seh ne ronhnontí꞉io í꞉ken, ne rotʼtseronhniáton ne kanonhtiʼiótshera aotserónhniat; ne Roiá꞉ner rotʼtserónhni, ne rotiatanát꞉ton ne kashaststénhsera. Iorihwaʼníronh tsi nisakwahthákwenh ne tsi ionhontsáte; kwáh kíʼ iáh nonwénhton tahó꞉then takakwéni nahioriáneron;

² ne sanitskwáhra né꞉ne kwáh waʼhónhnise tsi nahé꞉tkenhne tioterihonhníhon; í꞉se ne tiotʼkonhónhwe enshón꞉nheke.

³ Ne kaniatarakekówaʼne kwáh í꞉ken tsi ionótes, Ó Saiá꞉ner, ne kaniatarakhekówaʼne tsi nihionótes iorahkaré꞉ni tsi iononhtakwaronhtónhtses; tsi niwatwátsias natsátʼtha.

⁴ Né Roiá꞉ner roshaststenhserowá꞉nen tsi nithoniarótaron ne karonhiáke, sénha roshaststenhserowá꞉nen tsi natehioweratáse ne kaniatarakekówaʼne, sénha roshaststenhserowá꞉nen tsi niwatwátsias ne kaniatarakhekówaʼne!

⁵ Né saianerénhseras kwáh í꞉ken tsi iorihwí꞉io í꞉ken; né iotokéntis ne karasestákwah ne tsi sanónshote, Ó Saiá꞉ner, í꞉se ne tsi nénhwe enkénhake.