Psalms 90 - Ohiatonhseratokénti

Kaieríhaton Kahiatónhsera Tkaroron Ne Teharihwaʼkwáhtha (Teharihwaʼkwáhtha 90—106) Rawenni꞉io ne Ronhnheón꞉we tánon Nónhkwe Akotsiiótshera

Né꞉ne Mahís raoterennaienthátsera, ne Rawenni꞉io rahonkwéta.

¹ Saiá꞉ner, í꞉seke nón꞉we nikáien ne skenenkówak thí꞉ken né꞉ne tsi nénhwe enkénhake.

² Nohénton sashónh꞉ni ne tsi ionhnontarónhnions, khés ne tsi ionhontsáte shontonhontiónhni, né꞉ne tsi iehiotót꞉te tánon ne tsi nénhwe enkénhake tsi í꞉se ne shonnhehónwe Sewenní꞉io í꞉ken.

³ Okenhrá꞉ke niesehsehiathénhas nónkwe, satón꞉nions, “Okenhráke nionhshá꞉sewe.”

⁴ Né énska tewenniawehetsherásen niwenniseráke né sarihwáʼke tsi né ní꞉ioht ne sewenhnísera khók í꞉ken; kwáh tsi ní꞉ioht ne theʼthènhre, ó꞉nenk khók iotohétston, kwáh thóh ní꞉ioht tsi shí꞉ken ní꞉ioht ne kénk nikaríhwes tsi nikawistáheks ne tsi niwaʼshón꞉tes.

⁵ Waʼsehiónheʼwe tsi éhren waʼsehiathenháwiʼte; kwáh thóh nihatihiathó꞉ten tsi ní꞉ioht natetsénhsehra kwáh iosthó꞉re katʼtsetsawénon, khés tsi ní꞉ioht nó꞉honte thontakánio noronhkéne,

⁶ thontehiáron tánon watkatsitsanékare, eʼthóhʼne onstátʼthen tánon waʼkénheʼie tsi iahokáraʼwe.

⁷ Asèken né ionkwaʼiataká꞉rhias ne sanakwáhtshera; né sanakwáhtshera ionkwaterónhkwenhnis.

⁸ Sahénton wáʼshien nonkwahrihwanerahák꞉tshera, Iáh nék khók tsi takwáhkens nó꞉nen enhiakwarihwánerake, kwáh kíʼ ó꞉ni takwáhkens nó꞉nen ne ioterihwaʼsétonʼke nón꞉we nenhiakwarihwáʼnerake.

⁹ Né norihwí꞉io í꞉ken, onhkwatonnhetseraʼkwékon iewaʼthót꞉tha né꞉ne sanakwáhtshera karihónhnis; né tsi iatiónnhe thóh niʼiostó꞉re tsi waʼtohéstha tsi ní꞉ioht nahontaiakahonhníserenhne.

¹⁰ Nónkwe tót꞉khok niʼiakónnhes tsáta niwáhʼsen niʼioseráke, khés tó꞉ka nón꞉wa satèkon niwaʼsenhniʼioseráke, tó꞉ka eniakwasháststeke; eʼthóhʼsáne, akwékon né kháhas ne tahionhnikonhrá꞉ren tánon kanikonhraksénhtshera; ne tsi iakónnhe iostó꞉re waʼtohétstha, tánon kák tsehionkwénon.

¹¹ Ónhka iakoteriéntare tsi nikashástste ne sanakwáhtshera? Nó꞉nen ne Rawenni꞉io ronakwénhen tsi nikarihwahét꞉kens nonkweshón꞉has tsi nihiontseránions.

¹² Tatsiónhnien nahionkwanikonhraiéntaʼne ne tsi nihionkwahtenhniserathénion tsi waʼséhton. Né ká꞉ti nahónton nahionkwaiéntaʼne ne Rawenni꞉io raothotʼkhátshera nonhkweriaʼnéshons.

¹³ Tohʼnikaríhwes, Saiá꞉ner, tsi ensanakwenhénhake? Sashatátiene, tánon takwénhtenr í꞉ih ne sanhatsheraókons í꞉ken!

¹⁴ Saskwahnikonrí꞉iost noronhkéne né í꞉satst ne iorihwatóken sanoronhkwáhtshera, né káti nahónton nahonsaiakwahtonnáren tánon tiókonhte ahionkwatʼtsenhnonhníhake ne tsi nenhionkwaʼthenhniseraʼténionʼke.

¹⁵ Tatsiónhnien nahonsahiakwatʼtsenhnónhni thóh nahonsakarihwéshonke tsi kíʼ nihniwenhniseráke waskwahrón꞉hiakente, tánon thóh nahonsakarihweshonhke tsi kíʼ nihiosehrake waʼhakwatkatósehron ne karihwaʼhetʼkénseras.

¹⁶ Takwahríhon í꞉ih ne sanhatsherahókons, tánon ne iakihiohʼokónha kwáh ó꞉ni iakwatkátho ne iorihowáʼnens tsi nisatieránion.

¹⁷ Saiá꞉ner, í꞉se ne Sewenní꞉io í꞉ken í꞉se kwahsénhnaiens, tasarihwaʼiérik nontionháke, né shónhniat tsi nitsionkwaʼnikonhrásahaton takawisátsteke.