Psalms 9 - Ohiatonhseratokénti

Rawenni꞉io Raoshaststensera tanon Kariwakwarishontsera

Ne Raterenhnathentsiátha: tsi niʼiotkwáton né Muth-labben. Né꞉ne Táwit raorénhna.

¹ Kwáh entíhion né kanonweratóntshera ne Roiá꞉ner kwáh akeriasakwékon; Kwáh enkatró꞉ri akwékon ne iorihwanerakwahténions tsi nisatiéren.

² Kwáh kíʼ enwakatʼtsenhnonhníhake tánon enwakatonhnárahke ne shonháke; Kwáh kíʼ tekeríhwakwe ne kanonwerathóntsera ne sasénhnakon, Ó né kwáh éhʼneken satohesthákwen.

³ Nó꞉nen ne iónkswenhs enshón꞉kete, wahatihiatiénenhne tánon wahatihiatháton ne sahénton.

⁴ Asèken í꞉se wahsaterihwathéntsate naʼkerihwakwahrihshióntsera tánon nakerihwáke tsi nikerihwanóntons; sanitskwáhrane nitewètha ne tkarihwaiéri karihwenhthátsera.

⁵ Wasehterónhkwen nonkweshón꞉ha né꞉ne tsi natisahénrethe nateriʼiósera, waʼsehiáthonte ne ionkwetatsensoʼkónha; kwáh iehiokontákwen tsi waʼsehrón꞉ko ne tsi ratisénhnarakwe né꞉ne tsi nènhwe enkénhake.

⁶ Ne ionkhíshons kwáh iahonatót꞉tase tsi niotirihwaiesháhon kwáh ienhiokontákwen enkénhake: sarihwatónhton né raotinatowánens; nahonwehnehiarasthákwahke ioʼtónhon.

⁷ Ók kí ne Roiá꞉ner rénskote ne raonitskwáhrahne né꞉ne tsi nènhwe enkénhake, rotenontiʼióston né꞉ne tkarihwaiéri í꞉ken.

⁸ Tsi tehahiatoréhtha ne tsi ionwenhtsáte né꞉ne tkarihwaiéri í꞉ken; sakokkoráston né ronhnonhontsakeró꞉nons né꞉ne tkarihwaiéri í꞉ken.

⁹ Né káti aoriwáke né Roiá꞉ner rahonháke nón꞉we nionthasehthákwah né tehiontonhnakárias, ne tatkáwas né skénhnon í꞉ken nó꞉nen thènen tekanikónhrahre.

¹⁰ Tánon tsi nihiákon ne ieshasenhnaientéri shonháke nón꞉we nitiakawetákwen, Asèken ní꞉se, Saiá꞉ner, iáh tesehiatewenhtétha tsi nihiákon ne iesaiatísaks.

¹¹ Thetserihwákwas ne kanonweratónhsera ne Roiá꞉ner, ne rotkoráston né Zion nón꞉we nihénteron. Satʼró꞉ri ne raohioténhsera nonhkwé꞉ne.

¹² Tsi nikáien né sakáriaks tsi nòkwah né shonaterihwatewáton wasakoiénterene né shakotironhiakéntha; iáh tehatarónhtsiens tsi natehonséntʼthos né kaienawaséhtshetra.

¹³ Takithénhrek, Ó Saiá꞉ner! Satkátho tsi nahóten waʼkeronhiáken tsi nòkwah ne iónkswens; í꞉se sestiathatákwen ne tsi tsiotenhenrakáronhte ne kenhéiatʼne,

¹⁴ Ne ká꞉ti nahónton nakatró꞉ri akwékon ne sanonweratónhsera, tánon, thóh tsi tiotenhenrakáronhte nakoiénha Zion, kwáh enkatonhnáren tsioríhwa tsi í꞉se sestiatákwen.

¹⁵ Nonkweshón꞉ha thóh iahonhtinonwírehte nosónhwakon ne roʼtishonhiónhni; ne tsi waʼterísthaien ne roʼnaséhton né꞉ne ronón꞉ha ronsitáke wahotiʼiéna nahá꞉re.

¹⁶ Ne Roiá꞉ner waʼhathaténeste, né waʼhaterihwathentsiáte karihwenhthátsera; ne ronhnonkwetahétkens né waʼhotiʼiéhna ne waʼterístaien ne ronnónha roʼnateristaienthákwen. Higgaion. Selah

¹⁷ Áhnion né ronhnonkwetahétken Sheol nón꞉we nienhónhne, ratikwékon nón꞉kwe ne ronhwahiatanikonhrénhen ne Rawenni꞉io.

¹⁸ Asèken ne iakonoronsténhnis iáh kíʼ tiókonte tahonwaʼtihiatanikonhrénhʼen, khés ne raonarahrát꞉tsera ne ionthateronhiakéntha tahatihiatháton tsi nènhwe akénhake.

¹⁹ Téstann, Ó Saiá꞉ner! Tó꞉sa tseríhon ne rónkwe nahatkwéni; sehríhon nonkweshón꞉ha nahonwatiríhwenhte sahénton.

²⁰ Shetherónkwen, Ó Saiá꞉ner; Sehríhon nonkweshón꞉ha nahonateriénhtarane tsi ónkwe khók í꞉ken. Selah