Psalms 89 - Ohiatonhseratokénti

Rawení꞉io Raoteriwasheronhniá꞉tshera Sat꞉ne ne Táwit

Né꞉ne Ezraró꞉non Ethan raorénhna (Maskil).

¹ Kwáh thenkeríhwaʼkwe né tsi niwatróris tsi ní꞉ioht tsi tiókonte sehnorón꞉kwah ne shonkwetaʼshónhas; sénha kíʼ isiʼnónhwe níken; Kwáh tsi nénhwe enkatroríheʼke tsi nisarihwaʼtó꞉ken tsi nòkwah ne shonkwetaʼshónhas.

² “Asèken waʼkíron” né sanoronkwáhtshera tsi nikáshon né꞉ne tsi nénhwe enkénhake; né sarihwaʼtokentí꞉tshera thóh nihiorihwaʼníron tsi ní꞉ioht ne tsi karonhiáte.

³ Waʼshí꞉ron, “Wát꞉shon naterihwaʼseronniátshera skát꞉ne ne Táwit tsi rahónha rihiatará꞉kwen, tánon sénha ishiʼnónwe níken, waʼkerihwaniráton tsi enwaʼkerihwatókenhake ne rahonháke:

⁴ ‘Iáh nék khók takónhniate ne tsi nienhsatwatsiríhne ne tiókonhte ronónha ahoʼtinontí꞉ioke, kwáh kíʼ enkhehiónhnien nahontkóraste né꞉ne tsi nénhwe enkénhake né nó꞉nen níse ensenhéionke.’” Selah

⁵ Ratikwékon né ratironhiakeró꞉nons tehotirihwáʼkwen ne iorihwaʼnerakwahténions tsi niséhra, Ó Saiá꞉ner, né ratironhiakeró꞉nons rontʼró꞉ris tsi nihonatkenhníson ne karonhiáke tsi nió꞉re tsi sarihwaʼtó꞉ken.

⁶ Asèken ónhka ne karonhiáke naiekwéni tahontahonwaʼteniénthenste ne, Roiá꞉ner? Iáh ónhka ne ratironhiakeró꞉nons ne thatahontesewát꞉theke,

⁷ Né Rawenni꞉io ronwattsánis ne tsi ratiʼtsenhaienthákwa ne rotiʼiatatokentíshons, ratiʼkwékon rónhnete ne tsi niʼiesahiatanerakwáhtha.

⁸ Saiá꞉ner Sewenní꞉io Sashaststenhseroʼwanenhkówa, iáh ónhka né naʼiesahásteke tsi ní꞉se ní꞉ioht; sarihwaʼtokentítshera tesatsatáton.

⁹ Í꞉se tisaniaró꞉taron ne kaniatarakhekó꞉waʼne; nó꞉nen sóh꞉tsi enhionhnontaʼkwaronhtatséʼson tsi natehioweratáse, í꞉se éhʼtake nieséshas.

¹⁰ Í꞉se tesenenhstsiákon ne Rahab tsi ní꞉ioht nostsientóskon í꞉ken; waʼtesehiaréniaʼte ne ieshá꞉shons né waʼshaste ne senenhshá꞉saste.

¹¹ Né tsi karonhiáte í꞉se sáwenk, tsi ionhontsáte ó꞉ni; í꞉se shá꞉shon ne tsi ionwenhtsáte tánon akwékon tsi nahó꞉ten né thoʼíwa.

¹² Í꞉se sarihwaʼkanonhníhon tsi nihioterihwaʼtséren notoré꞉ke tánon nenhtié꞉neʼ né Tabor tánon ne Hermon atʼtsenhnonhniaʼtsherákon tsi tetsiatenonhweráton ne sasénhna.

¹³ Kwáh í꞉ken tsi senentʼtsashástste; tsi naʼtehiotenonhiaʼníton ne sashaststénhsera.

¹⁴ Karihwaʼkwarihshión꞉tsera tánon kaiáneren nón꞉we nikenskwáheʼre ne sanitskwáhra; né iorihwaʼtóken kanoronkwáhtshera tánon ne karihwaʼtokentítshera sahén꞉ton í꞉ken né iesarihwaʼkareniénhni.

¹⁵ Iakotáskats nonkweshón꞉ha tsi iakorenhnáhon ne taieríhwaʼkwe tsi ahiesahsénhnaien, tsi etʼthohʼnónwe nihonhnón꞉nhe kaswatʼthetsherákon tsi nisarihwaʼnonhwéhon;

¹⁶ Konhtatsésons sahsénhnakon nón꞉we nihonathonnáhere, tánon sarihwaʼkwahrihshiontsherákon nón꞉we nihonatʼtsenhnakaratáton.

¹⁷ Asèken í꞉se ne raotiʼshaststénhsera í꞉ken tsi thóh nón꞉we nihotiʼiatanerákwat; Né꞉ne sashaststenhseroʼwanenhkó꞉wa waʼhonkwasniénon tsi waʼhakʼkhisénhni ne hionkhíshons.

¹⁸ Roiá꞉ner, seh nonkwahnétsera í꞉ken, Nón꞉kwah nontí꞉io né seh ne Roiatatokénti í꞉ken Nisraeró꞉nonke.

¹⁹ Waʼsathotási tánon wahsehthá꞉rahse ne rotirihwaʼtó꞉kenʼne sanhátsheras ne waʼhónhnise tkènʼne, tánon waʼshí꞉ron: “Wahiʼiénawaseh ne rasenhnowá꞉nen raterí꞉ios; waʼhiʼianitskwahrá꞉tsheron tsi nikáien nónkwe ronwaʼiatará꞉kwen.

²⁰ Nakenhá꞉tshera Táwit waʼhinontí꞉iosʼte; né waʼhihiatókaʼwe ne iaweienatokénti;

²¹ Nakeshaststénhsera tiókonte ne enhnikwekónhake; nakeshaststénhsera né enhosasténhseron.

²² Ne ronhwáshons iáh thatahonwaʼnikonhrakénhni, ne ronhwaʼshóns né꞉ne ronhnonkwetahétken kwáh kíʼ iáh tahatikwéni nahonwasénhni.

²³ Tsi ká꞉ti nikaríhwes roteróhron kwáh kíʼ enkhehiátonte ne ronhwáshons tánon enkhenonwenhserá꞉rhio tsi niháti ne ronwáshons.

²⁴ Nakerihwatokentítsera tánon ne iorihwató꞉ken akenoronhkwáhtshera tsi ensenikwekónhake; tánon aksénhnakon tsi tsókonhte enisnienónsehke nashakosénhni ne ronhwáshons.

²⁵ Kwáh énkonste ne raonakerá꞉sehra né꞉ne Mediterranean entewaʼtáshawenh iénwahne ne Euphrates tkaniataratátse.

²⁶ Né Táwit kwáh enhorihwaʼníratʼtse ne Rawenni꞉io tsi, ‘Rahónha séh ne raʼkeníha í꞉ken, tánon akení꞉io í꞉ken, tánon í꞉se ne téskenes tánon takenónstats!’

²⁷ Kwáh rahónha ne enhiʼhiónhniaʼte ne thóh tserénhton rawenhnakeráton riʼiénha, né kwáh enthasenhnowàʼnenhke ne rotinontí꞉ios ne tsi ionhwenhtsáte.

²⁸ Kwáh enhinorónhkwahke tánon entewaʼkerihwaʼiérihke ne rahonháke né꞉ne tsi nénhwe enkénhake, tánon nakaterihwaʼseronhniátshera ne rahonháke kwáh enhiorihwaʼníronhke tsi enkátake né꞉ne tsi nénhwe enhkénhake.

²⁹ Né rahonhnontiʼiótshera kwáh kíʼ ienhiotʼkontákwenh enkenhake tsi kíʼ ní꞉ioht ne tsi karonhiáte, tsi nienhatwaʼtsiríhne tsókonhte kíʼ ronón꞉ha enhotinontí꞉ioʼke.

³⁰ Ók tó꞉ka ne sakohiohʼokónhas enhontewènhtethe natianerénhsera tánon ne tsi ronónnhe iáh thahatísehre tsi niwaʼkerihwaʼtháton,

³¹ Tó꞉ka iáh tahontewénhnaraʼkwe natianerénhseras tánon ahotirihwaʼnó꞉ron nahontsénawaste nakerihwaʼtátʼtseras,

³² eʼthóhʼne kíʼ kwáh enkhenonwenhserárhio tsi nihotiʼrihwáʼnerens tánon ne raotirihwaʼnerahát꞉tsheras kwáh enkhesokwahwiʼsónhnion;

³³ ók iáh kíʼ éhren tatʼkháwiʼte ne iorihwaʼtó꞉ken akenoronhkwáhtshera, khés nahonkerihwaʼnó꞉ron nakatiénawasthe tsi nihihiararatsthénhni.

³⁴ Kwáh iáh tathá꞉tiaʼke nakaterihwasehronʼniátshera, khés ne tahonsatʼténi tsowénhna tsi nitewaʼkewenhnanikéhen né ksáke.

³⁵ Énskat tsi ní꞉ioht tsi waʼkerihwaʼniráton nakerihwatoʼkentítshera; kwáh iáh tahiʼianowènhten ne Táwit.

³⁶ Kwáh tsiókonte tsi enhawaʼtsirahthátse, tánon kwáh enkathenhnikonhráren ne raonakerásehra tsi nikaríhwes enkarahkokʼthá꞉ke.

³⁷ Etʼnienhiotkontákwen tsi ní꞉ioht nasonhthenʼnékha karáhkwah, né꞉ne tekawisháste karihwaʼnírats ne tsi karonhiáte.” Selah

³⁸ Ók ó꞉nen watskénron; onhnnontséren tsi ní꞉ore tsi tsenákwase tsi nikáien tiatará꞉kwen nahonontí꞉ioke

³⁹ Thonthatsiatatihéntʼthoʼs ne saterihwasehronʼniátshera ne sanhá꞉tshera; waʼteshí꞉tionste ne raonónwaʼroʼre tsi okenhrá꞉ke waʼtesatesénhniaʼte.

⁴⁰ Sathenhenhrarihshón꞉kwen ne raonátakons né tsióneskwe; tánon waʼtesrihthánion nosthénhra waʼthenhenraiéntaʼkwe.

⁴¹ Tsi nihiákon né nón꞉we nihiontohétsthakwe ronwaʼnénhskwaksʼkwe; ratiʼkwékon ne tehonhnonsanekʼkhánions ronhwasterísta.

⁴² Waʼshesasthénhseron ne ronwáʼshons niahonwaʼtsatónhti; kwáh ratikwékon waʼsehiatʼtsenhnonhniáthen.

⁴³ Í꞉seh ó꞉ni nón꞉we, waʼteshiókete ne raosarehkówa, tánon iáh tethetsiatswanónhnen naʼteriʼiosehráke.

⁴⁴ Waʼtiékwah ne raonontiʼiótshera ahoshaststénhsera, tánon satienontiʼióko.

⁴⁵ Né waʼshón꞉niaʼte ne iostó꞉re ahosthénhaʼne; tánon né waʼtieró꞉rotʼte natehénhsera. Selah

⁴⁶ Saiá꞉ner tsi kén nénhwe ensataséhtonʼke? Thóh nikaríhwes enhiotékhake ne sanakwáhtshera

⁴⁷ Sehiárak tsi kenkʼnikonnhésa— sehiárak tsi í꞉se sehiatíshon nonkweshón꞉ha tsi nihonnónnhe tánon eʼthóhʼne enhonníheʼie!

⁴⁸ Ónhka aiekwéni naiakónnheke tánon iáh nonwénhton taiaiéheʼie? Ónhka aiekwéni nakonwaniákenhse ne kenhé꞉ion? Selah

⁴⁹ Saiá꞉ner, kahníwes ne iorihwató꞉ken sanoronhkwáhtshera ne waʼhónhnise siʼkáien, né꞉ne sarihwatokentí꞉tshera tierihwaniráti ne Táwit?

⁵⁰ Seiérak, Ó Saiá꞉ner ne sanhátshera tsi nihonwaʼnikonhrakʼsáton; tsi niwaʼkatatʼkáts꞉taton akwékon ne raotirewathátsheras ne iáh tehoneriása,

⁵¹ Né꞉ne iesáshons ronwaʼnikonraksáton ne tiatarákwen ronnonhtí꞉io, Kwáh ronwaʼnikonrakʼsátha ne kwáh tsit nón꞉we nenhénhre.

⁵² Tehonwaʼnonweráton ne Roiá꞉ner né꞉ne tsi nénhwe enkénhake. Eʼthohʼnenhiáwenhne eʼthohʼnenhiáwenhne.