Psalms 84 - Ohiatonhseratokénti

Ne Natonhnárat Naiesenhnaiéntakwe Nononsatokentiʼkowáhne

Ne Raterenhnathentsátha: tsi niorihwanonwéhon né Gittith. Né꞉ne Korahites raotirénhnas.

¹ Tsi niʼiohnonsáskats tsi nón꞉we nisí꞉teron, Ó Saiá꞉ner Sashaststenhserowanenkówa,

² Nakatónnhets wasʼkáneks, kwáh í꞉ken tsi wakaskanetʼthennis ne raononsaʼtokentiʼkówa ne Roiá꞉ner; kwáh akatonnhetʼtserakwékon tsi tenhirihwákwahse natʼtsenhnonhniátshera ne ronnhehónwe Rawenni꞉io.

³ Shé꞉kon kíʼ nón꞉neʼe notsitenhokónhas kontʼtsinakónhnis kí nenhné꞉e, tánon ne katarakonhá꞉ah waʼtatʼtsinakonhniénhnis, thóh nón꞉we niwaniʼnónhsos, nésatsienharákwahke, Ó Saiá꞉ner Sashaststenhserowaʼnenhkówa, nakenontí꞉io tánon ake ní꞉io í꞉ken.

⁴ Iakotaskáts tsi nihiákon ne iohriwaʼtóken sanonsatokentiʼkówaʼne nón꞉we niʼionhterénhnaiens, tsi naʼteiakorihwákwen ne sanonweratón꞉tsera. Selah

⁵ Iakotáskats tsi niʼiákon nakosasténhsera í꞉sehke nón꞉we nitewètha, né nonkweshón꞉has ne ionská꞉neks thaʼkéson niáhien tsi aiontʼthahí꞉tha niahiesahsénhnaien ne tsi tiohnón꞉te ne Zion.

⁶ Tsi niaʼhónʼne nahonrá꞉kwahkon nokaséhriʼne (Baca) né iahónton wakanekónʼnionhne; nenhtewaʼtsérenhte enhiokénhnore nes waʼkarohróks꞉te ne kaiataterítsera.

⁷ Waʼhontóhetste ne waʼthenhenraiéntons nosténhras; “Rahónha ne Rawenni꞉io kwáh tsesakowenní꞉io nakorénhshons niʼiohokónhas.”

⁸ Sathón꞉tet nakwaterénhnaient, Saiá꞉ner Sewenní꞉io Sashaststenhserowánen; satahónsatat, Ó tseNí꞉io ne Jacob! Selah

⁹ Tsiatatérist nonkwanontí꞉io, Ó Sewenní꞉io, né꞉ne ronhnontí꞉io í꞉se tsiatará꞉kwen.

¹⁰ Asèken sewenní꞉sera sanonsatokentiʼkówaʼne iakerihórhiaʼte sénha ne tsioiánere tsi ní꞉ioht ne énska niwenhnawehetserásen niwenhniseráke nakteʼnónhwe iakerihórhiaʼte. Sénha ne tkerákwas thóh aktáke tsi iehiontawehiatákwah ne raononsatokentikówaʼne nakeNí꞉io tsi ní꞉ioht thóh akiterónh꞉take tsi rotinón꞉shote ne ionhkwetahét꞉kens.

¹¹ Hen, ne Rawenni꞉io, né꞉ne Roiá꞉ner, rahónha ne karáhkwa í꞉ken, teshonkwáhwis ne kaswatʼthétshera tánon natónnhets. Rahónha teshonkwatiatáton, rahónha teshonkwáhnes. Teshonkwáhwis ne kanoronkwáhtshera tánon kakwenienstatserákon tsi shonkwaiénas, né꞉ne tsi niʼiákon ne iáh othènon teiakoníkon tsi iakónnhe né tesakówis ne kowánen í꞉ken ne ioiánere kaiataterítshera.

¹² Ó Saiá꞉ner Sashaststenhserowánen, tsi niʼiakoktsenhnónhni tsi niʼiákon ní꞉se tiesehtákwen.