Psalms 83 - Ohiatonhseratokénti

Né Naterénhnaient Nahonwatiriwénte Ne Ronhwaʼtíshons nʼIsraerʼró꞉nons

Né꞉ne Asaph raorénhna.

¹ Ó Sewenní꞉io, tó꞉sa sák tasatatónhni; tó꞉sa tatesató꞉tat, tó꞉sa sák tasatatónhni, Ó Sewenní꞉io!

² Asèken ne iesá꞉shons ó꞉nenh rotirístare; ók sénha isiʼnónhwe, nonkweʼshón꞉has ne iesáshons iesawenhnón꞉ties.

³ Kanikonhráton tsi nahó꞉ten ronhtenikonhrón꞉nis tsi nòkwah ne shonkwetaʼshón꞉ha; skát꞉ne tsi tehathithára tsi niháti ne sehiataséhtha.

⁴ Rón꞉ton, “Káts, ánion ietihiátont nʼIsraerʼró꞉nons; Né kasénhna Israel kwáh tó꞉sa nonwénhton ónhka ahionsaʼiakehiárake.”

⁵ Kwáh sahotinikónhra íe꞉kenk; tsi iesát꞉konte waʼhontsanerenhserón꞉ni tsi natehóntere—

⁶ né nonkweshón꞉hsas ne Edomró꞉nons tánon ne Ishmaelró꞉nons, Moabró꞉nons tánon ne Hagrites,

⁷ Gebalró꞉nons tánon Ammonró꞉nons tánon ne Amalekró꞉nons, Philistiaró꞉nons tánon ne skát꞉ne ratinákere ne Tyreró꞉nons;

⁸ Assyriaró꞉nons káti ó꞉ni waʼsakonatsátaraʼse; né꞉ne rotiʼtiokwashástste ne Lot nón꞉we nithonatwatsiríhnon. Selah

⁹ Thóh nasheiéras tsi kíʼ nisheiéraʼse ne Midianró꞉nons, ó꞉ni ne raterihioserakweʼní꞉io Sisera tánon ne ronnontí꞉io Jabin né Wadi Kishon tsik kaniataratátse nón꞉we,

¹⁰ né꞉ne En-dor nón꞉we nihonwaʼnathón꞉ton, tánon ne raotiʼierontashónhas thóh ohontsáke waʼhót꞉ken tsi nón꞉we nihotiʼiatsenénhon.

¹¹ Né sakotihéntenhse thóh nasehiéras tsi kíʼ nisheiéraʼse ne Oreb tánon ne Zeeb, ó꞉ni ratikwékon ne ronhtinontí꞉ios tsi sehsénhni tsi kíʼ niseieráse ne Zebah tánon ne Zalmunna,

¹² tsi nihó꞉nen, “Kwáh onhkwawenhkón꞉we enwáton né tsi ionhontsáien ne Rawenni꞉io rahohóntsa í꞉ken.”

¹³ Ó Sewenní꞉io, thóh nasheiéras tsi ní꞉ioht ne iothontakarateniáton, tsi ní꞉ioht ne kawá꞉he tsi natehiotíten nó꞉nen iahó꞉te.

¹⁴ Tsi ní꞉ioht nó꞉tsire tsi wateratʼtsahátha, tsi ní꞉ioht notónhkwah tsi watenontatékʼtha,

¹⁵ sehiatekwát né꞉ne sáwenk kawerashástste í꞉satst tánon né sehteronkwáhten ne tehiotenonhianíton sáwenk kawerashástsʼte.

¹⁶ Ne ratikonhsakéshons kwáh ne sehróhrok natehénsera, Ó Sewenní꞉io, tánon sehiónhnien nahatirihwanírate ne sashaststénhsera.

¹⁷ Aiáwenhs kwáh ahonwatisénhni tánon ahotiteronhníhake tsi nénhwe akénhake; tánon atehenserákon tsi kwáh ahatiʼiatáton.

¹⁸ Tánon sehtokáhten tsi kwáh séh shonháhak khók í꞉ken, né sasénhna né꞉ne Roiá꞉ner í꞉ken, né꞉ne kwáh ohontsakwékon tisaʼshaststenhserowánen.