Psalms 81 - Ohiatonhseratokénti

Rawenni꞉io Sashakokenheniónse ne Rotinonhtsistaní꞉ron Israel

Ne Raterenhnathentsátha: tsi niorihwanonwéhon né Gittith. Né꞉ne Asaph raorénhna.

¹ Iorakareníhak tsi tetsisewaʼrihwákwas ne Rawenni꞉io né onhkwashaststénhsera í꞉ken; tesewaʼhénret naʼtsenhnonhniátshera rahonháke ne Jacob Raoní꞉io í꞉ken.

² Tasewaʼrenhnakétsko, sehwaʼnakwáhet ne kenhnikanakwá꞉a, sewaʼterenhnó꞉ten ne karenní꞉io onowaʼkówa í꞉sewats né nó꞉ieri nikarenhsotáron.

³ Sewaʼhonráwat nó꞉nen enskarakwáraʼne, nó꞉nen ieiorakwaieríhon, né tsi nitewaʼtenikonhró꞉ris.

⁴ Asèken thóh nikaianerenhseró꞉te Nisraeronónke, Né kíʼ ken ne raohianerénhsera ne Jacob Raoní꞉io í꞉ken

⁵ Né꞉ne Só꞉se rahonháke nón꞉we nihoianerenhseríhshon, nó꞉nen thóh nón꞉we shaháre tsi tiohontsáien ne Egypt. Kewennarónhkas ne iáh tekewennaientéri:

⁶ “Watrákwen ne ioréniaksʼte ne seronkweʼnáke; tánon konwisarákwen ne iohiothenhseraníron.

⁷ Nó꞉nen satesanikónhrare iaskeʼnáton, tánon sakonhniákenʼte; Tsi nón꞉we nikatasehtákwa né꞉ne tsi tehioweratáse, watkonrihwasehrákwahseʼ thóh nón꞉we nakonhiateniénhten ne tsi tionáwerote ne Meribah. Selah

⁸ Sewaʼtahónsatat akonkwetashónhas, tsi nikaríhwes enkwaretsáron; Ó Israel, tó꞉ka nek khók naskatahonsathátonhke!

⁹ Iáh tehiówenk ne thiʼkaní꞉io sèrate akaiéntake ne sewenhtiókwahkon; í꞉shiʼó꞉ni nón꞉we, Kwáh iáh tehiówenk ne taisewatiákeʼte ne raotihénton.

¹⁰ Í꞉i ne Watiá꞉ner Sewaní꞉io í꞉ken, Í꞉i tekwahiatínekenʼen ne tsi tiohóntsaien ne Egypt. Tó꞉ka ká꞉ti ensewarihwaʼtokénhake, kwáh kíʼ enkwahiatatériste.

¹¹ “Ók nakonkwetaʼshón꞉has iáh tehonaʼtahonsatáton nakewénhna; nʼIsraerʼró꞉nons iáh tehionkewenhnarákwen.

¹² Ká꞉ti waʼkhehiatsakwarísi né tsi nihotinontsistaníron, tánon thóh nihatí꞉ier kwáh tsi nithonskáneks.

¹³ Ó tsi nikaská꞉neks nakonkwetaʼshón꞉has nahionkatahónsathaʼte, nètho nʼIsraerʼró꞉nons nahionkewénhnaraʼkwe!

¹⁴ Kwáh iostó꞉re tsi enkhesénhni ne tehontát꞉tsions, tánon enkheiatiatakweʼní꞉ioste ratikwékon ne tehontát꞉tions.

¹⁵ Tsi nihiákon ne iónkʼsons kwáh tehonʼnón꞉saien natʼkénton, tánon né꞉ne tsi nénhwe tsi enkheréwaʼte.

¹⁶ Ók kwáh kíʼ né enkwanón꞉te né kwáh tkanatsí꞉io, tánon né ensewaʼiatáheste ne otsinakontaʼkwáne raotiʼtsikhéta.”