Psalms 75 - Ohiatonhseratokénti

Taiontenonwerathónkwa ne Rawenní꞉o iorihwanerákwat raoioténsehra

Ne Shakohenténhse tóhsa serihwéntonht. Né꞉ne Asaph raorénhna.

¹ Tekwahnonwerátons, Ó Sewenní꞉io; tehiakwahtenonwerátons; tsi ákta í꞉sehs. Nonkweshón꞉has iontroriáhions ne iorihwaʼnerakwahténions sahioténhseras.

² “Waʼkeráhkwen ne tsi nikaháwi enkeríhwenhte,” rá꞉ton ne Rawenni꞉io, tánon kwáh entkariwaʼiérihke tsi enkeríhwente.

³ Nó꞉nen ne tsi ionhontsáte enhiówaʼke, tsehatikwékon né thóh ienákere, kwáh séh Í꞉i enkerihwaʼnírate ne tsitʼkenskwáhere. Selah

^4-5 Kheró꞉ri ne tehontaterénhsarons nahóntkaʼwe tsi tehonathaterénhsaron, Kherihwatháti thí꞉ken ronhnonkwetaʼhétkens nahóntkaʼwe tsi nihonthatón꞉ni.

⁶ Ne karihwenhthátsera iáh tsitkarakwínekens khés ne tsi iatewatʼtsénhthos nón꞉we tethewètha iáh ó꞉ni ne iahonwenhtsiatʼténhake khés ne tsi ionontarónhnions;

⁷ ók kíʼ Rawenni꞉io séh rarihwénhtha í꞉ken, ótiakes sakorihwénhtha ótiakes iáh tesakonitsheráwis.

⁸ Asèken ne ratsaná꞉ke ne Roiá꞉ner tehiontnekonthákwah ráhawe, ne tekarihwaʼkentónhkwen tsi ensakoríhwenhte ne ionkwetahét꞉kens; ne tehiontʼnekonthákwah kwáh katsanánon notsítsia ienekiráhtha né꞉ne raonakwáhtshera í꞉ken. Tahanekáweron tánon ratikwékon ne ionkwetahét꞉kens wahatinekíra. Kwáh tsi nió꞉re nonàken tonhtakastárenhne tsi wahatinekíra.

⁹ Ók kwáh enkatonnáren tsi nénhwe enkénhake; Kwáh tenhirihwákwahse ne kanonweratónhtshera ne Jacob Raoní꞉io í꞉ken.

¹⁰ Kwáh kíʼ thensakoʼshaststenseriáke ne ionkwetahét꞉kens, ók ne raotiʼshaststénhseras ne tionkwetaiéris kwáh nené꞉e enwaʼtehiáron.