Psalms 74 - Ohiatonhseratokénti

Ierihwanónhtha naiontatiénawase tsi nikaháwi ne ohontsakwékon naiekénron

Né꞉ne Asaph raorénhna (Maskil).

¹ Ó Sewenní꞉io nontséren tsi thóh kíʼ ní꞉ioht tsi waskwahkénron kwáh kén tsi nénhwe enkénhake? Kwáh kén tsi nénhwe ensehnhákwaʼse ne shonkwetaʼshónha?

² Sehiehiárak ne shonkwetaʼshón꞉ha, tsi nikáien ne satonkwetaʼráhkwen ne waʼhónhnise tkènhne, Né꞉ne kwáh í꞉se sehiataráhkwen ne shonkwetaʼshónha aʼhónton. Sasehiáran tsi iohnón꞉te ne Zion, tsi nón꞉we ieshiterónhtaʼkwe.

³ Tasatʼtsinakaratátʼton tsi nienhénse ne tsi nateʼkanonwenhskerotáro; ne ionhkhíshons akwékon rotirihwéntʼton ne kanónskon nononsatokentíke.

⁴ Né iesáshons wathotihénrete ne sanonsatokentiʼkówaʼne, kwáh sénh꞉nion; thóh kanónskon waʼhatiniatarakétsko ne raotiʼniataráha.

⁵ Waʼhatiroʼhókkon ne tsi iehiontawehiathákwa tánon waʼthatírihte ne óienhte kanikonharó꞉te notsítsa konhtiratʼthensthákwah.

⁶ Tánon ethó꞉ne ó꞉nen niwaʼtokenseráha tánon otsikwakówa wáhonste, waʼthatirihthánion akwékon ne waʼkarathakwahniónkwen ne tekaieronhnionháton rotisahá꞉nion.

⁷ Waʼhontenonkwa꞉htekʼthe ne Sanonsatokentiʼkówa; waʼthatítionste tsi nón꞉we niʼiesahsenhnaienthákwah, okenhráke wahonhnón꞉ni.

⁸ Né tehonatonhontsónine ne kwáh tahiontkinénhstsiaʼke; akwékon waʼhontsahathanion nahó꞉ten ne iotó꞉kenti í꞉ken ne tsi ionhontsaien.

⁹ Iáh teiakwatʼkáthos nonkwaniataráha; iáh ónen ónhka tesénhteron ne rotó꞉kenhse, tánon iáh ónhka tehioteriénhtare thóh kíʼ nenhkariwésonhke tsi thóh nenhiotónhake.

¹⁰ Thóh nikaríhwes, Ó Sewenní꞉io, ne ionkhíshons tahionkhiʼierónhake? Né ionkhíshons ensehríhon kén ne tsi nénhwe ahiesahnikonhraʼkarewáthaʼke?

¹¹ Nontiéren tsi tateskaneráhtse iáh othènen teshèhra? Nontséren tsi sáton iáh ó꞉nen thènen tatehionkwatonhontsóni naskwahiénawaʼse, tánon tesahnonkarénhron nonhtionháke?

¹² Ók í꞉se nonkwahnontí꞉io shí꞉ken ne kwáh shiʼtiotásahwe, Ó Sewenní꞉io; wé꞉so nʼioríhwake takwasniénon tsi iakhiʼsénhnion ne ionkhí꞉shons kén tsi nón꞉we nihiakwahnákere nontionhontsáke.

¹³ Né꞉ne sashaststenhserowaʼnenkówa sáston tsi tesahnekhakʼkháshion ne kaniatarakhekowánen; í꞉se tesehnontsistaríhton iononwarontiétha ne kaniatarakekowánen kanákere.

¹⁴ Í꞉se tesehnontsistarihtánion awenkéha katsinoniowánen; tánon ne rahoierónhta ne wasèhnonte ne kontírio ne iahonwenhtsiatténhake kontiná꞉kere.

¹⁵ Í꞉se thóh ná꞉tsa nahionaweró꞉taʼne tánon nakahionhatátseke; í꞉se iastéon ne watnekíne.

¹⁶ Í꞉se sáhshons ne tsi wénhtate ó꞉ni nasontʼthénhne; í꞉se sakwahtáko ne tsi karákwahre ó꞉ni nasontʼthenné꞉kha karákwah

¹⁷ í꞉se tisahnontónhon tsi náhonske ne tsi ionwenhtsáte; í꞉se sáhshon nakenhnáke tánon ne kosehráke.

¹⁸ Ók sehiárak, Ó Saiá꞉ner, ne iesáhshons tsi tihiesaiéron, né꞉ne iáh tehotirihwiʼiostonhtseráien tánon iesáshons.

¹⁹ Tó꞉sa sehiatewénhtet ne iahoténen tehatístas shonkwetaʼshón꞉has rononháke ne ratiniakáts꞉tes tehontátʼtions; tó꞉sa sehiatanikónhren ne tsi ronhnón꞉nhe ne rotíthen shonkwetaʼshónhas.

²⁰ Skwéʼniest naterihwaseronniátsera ne takwasenhénhni, asèken tsi nonwésons ne tetsiókaras ne tsi ionhontsáte thóh nón꞉we nihatinákere ne iáh othènen karíhwa tehonhnón꞉ni ne kaianerénhsera.

²¹ Tó꞉sa sehríhon ne iontateronhiakéntha nahonwaʼnatéhaʼte; Sehrihon thí꞉ken rotíten tánon ne tehontkárhias ne taiesanonweráton.

²² Tèstann, Ó Sewenní꞉io tánon tasahthátene; sasehiáranh ne iáh tehotirihwiʼiostonhtseráien tsi thiʼiesahierónhakwe niaʼtewenniʼsehráke.

²³ Tó꞉sa sahsanikónhren tsi nihotinakwénhʼen ne iesáshons, tsi niehotikonhtákwen rotiríhstare ne iesáshons.