Psalms 73 - Ohiatonhseratokénti

Áhsenton Kahiatonhserá Tkaroron Ne Teharihwaʼkwáhtha (Teharihwaʼkwáhtha 73—89) Ne Rawenni꞉io Ne Thóh Nihaiéra Nahó꞉ten Ne Tkarihwaʼiéri Akénhake

Né꞉ne Asaph raorénhna.

¹ Orihwiʼiohónwe ne Rawenni꞉io tsi torihwaʼiéri tsi nòkwah Nisraelró꞉nons né꞉ne tsi nihiákon nʼiakerhiaʼsí꞉io.

² Ók tsi nòkwah ní꞉i sehréh꞉ka ahonthonkwashitsiákon; sehré꞉ka ahonkewiskwentarehéskon.

³ Asèken khenósʼsaskwe ne rontatonkweʼtowaʼnátha; nó꞉nen sakatkátho tsi niʼioiánere ne raotirihwashónhas ne ronhnonkwetahét꞉kens.

⁴ Asèken kwáh iáh thahóten tehotironhiáken; ratisháststes tánon ronatakaríhte.

⁵ Iáh tehatironhiákens tsi ne ní꞉ioht notiakéshons; iáh othènen thatehonanikónhrahre tsi né natehiakonikónhrare notiakéshons.

⁶ Ne ká꞉ti aoríhwa tsi nihonthatón꞉ni thóh niwaʼtsésen nahiontkáto tsi ní꞉ioht ne ionhnitsiásthaʼ oronkwáhsa tánon tsi iahothènen tehonhnónhni ne kaianerénsera kwáh ne né꞉neʼe ahonatʼtseronhniáton.

⁷ Ne ratikará꞉keshons iohtón꞉nions tsi nihó꞉naresenhs; ne ronhnerhiá꞉nes ne titkáhere nononwaʼrohríhtas.

⁸ Thisakotiʼiéron tánon tsi rotí꞉thare kaserohentákon í꞉ken; ronhtatónhni tánon ronhtenikonhrónh꞉nis nasakotironhiákente nakorénhshons.

⁹ Ronhwaʼkenrenhserónhnis ne Rawenni꞉io ne karonhiáke thénteron, tánon rohnathateseʼnahkarónhni kwáh tsehionhóntsiokte nió꞉re.

¹⁰ Né ká꞉ti aoríhwa iekaníhare ne kwáh Rawenni꞉io rahonkwetaʼshónhas ronhnón꞉ha waʼhonwatiweienhnásehre tánon iáh kíʼ othènon tehotitsénhrion nahotiníkonh.

¹¹ Tánon rónhton, “Orihwiʼiohónwe né Rawenni꞉io iáh tahoteriéntaraʼne tsi niʼiawenhenhátse? Ne kwáh toshaststenhserowánen iáh taharihwatsénhri tsi nitewáʼtserah?”

¹² Thóh nihatihiatótens ne ionhkwetahét꞉kens; tiókonte tonaterákare, tahotiʼkwatsehonhá꞉tiek.

¹³ Iáh kíʼ othènon tehiorihontákwen, tsi nakatatiatanónsthate tánon wakatsióhare né nakéneste tsi iáh othènon tewakeníkon.

¹⁴ Asèken tiotkonhónwe tewakanikónhrare, tánon katkenrenhserónhnis iatehioronkhetseráke.

¹⁵ Tó꞉ka shí꞉ken ahónken, “Orihwiʼhiohónwe ne Rawenni꞉io iáh tehoteriéntare tsi nihiawenhenhátse,” ne kwáh toshaststenhserowánen iáh taharihwatʼtsénhri tsi nitewaʼtsérah.

¹⁶ Ók kíʼ nó꞉nen sakanonhthonniónhko onhní꞉ioht tsi ahonkenikonhraiéntaʼne kíʼ ken, sóh tsi kíʼ waterihwenhtó꞉re nakerihwáke,

¹⁷ Thóh né khók onhkenikonhraiéntaʼne tsík Sanonsatokentikówaʼne iakatáwehiaʼte; ethó꞉ne onhkenikonhraiéntaʼne tsi nenhotiʼiátawen ne ronhnonkwetaʼhétkens.

¹⁸ Thóh nón꞉we nenhsehiát꞉kaʼwe tsi nón꞉we natehiahahotsískwat; tánon ienhsehiaténieʼte niatahonotsínete niahatihiáthenhne tsi ionitsʼthenhrhiákon ne karihwaiesáhtshera.

¹⁹ Kwáh kénkʼnikaríwes enhatihiatháton, né iahakohiaténhaʼwe ne kwáh tehiotenonhianíton kenheiónsera!

²⁰ Né ronhnonkwetaʼhétkens thóh nihatihiathó꞉tens tsi ní꞉ioht ne kwáh kasehrenhtákʼsen éhʼren tsawé꞉ton nó꞉nen enhíe꞉ie nonhrón꞉keʼne, enkhenikónren nó꞉nen í꞉se Saiá꞉ner entèseh tánon nastsiatakèna.

²¹ Nó꞉nen sakát꞉thoke tsi nió꞉re tsi wakonkwetahetkénʼen, tánon ionkeniʼkonhrakahreʼwáʼton,

²² Tewaʼkatenonhwaʼrohríhtonte iáh othènon tewakenikonhraiéntas; thóh niwaʼkatatiéren tsi ní꞉ioht ne katʼtshénen tsi nòkwah ní꞉se.

²³ Ók kíʼ shé꞉kon tsatákʼta í꞉kes, tánon takenentʼtsawáʼkon.

²⁴ Sarihonhnienhnítshera waʼkenatónhnis tsi nihiohahóten akatʼthaʼhí꞉tha tánon ne tsi iehiotók꞉te kwáh í꞉se kaiataʼnerakwahtsherákon tsi enstiéna.

²⁵ Iáh ónhka nakó꞉ren tewáʼtsien ne karonhiáke kwáh nék ní꞉se? Tánon ká꞉ti kwáh iáh othènon teskaskáneks nonwenhtsáke kwáh nék ní꞉se.

²⁶ Nakenikónra tánon natierón꞉ta nontsérek enhiotsihióhaʼne, ók Rawenni꞉io kíʼ nakeshaststénhsera í꞉ken nakwerhiá꞉ne, tánon tsi natahonʼkatonhontsóniʼke tsi nénhwe enkénhake.

²⁷ Tsi nihiákon ne iesatewenhtéton kwáh kíʼ enhiehiatháton; kwáh kíʼ ensehiátonhte tsi nihiákon ne iáh tehiakorihwató꞉ken tsi nòkwah ní꞉se.

²⁸ Ók kíʼ ní꞉i tsi nihioiánere tsi tiatákʼta í꞉kes Sewenní꞉io; Né waʼkonhniáton ne Roiá꞉ner Rawenni꞉io rahonháke nón꞉we nenhkatekwáhsen, né nakatró꞉ri akwékon ne sahioténhseras.