Psalms 72 - Ohiatonhseratokénti

Aterénnaient ne iaiéshere tánon aontahonʼwatswanónhna ne Ronontí꞉io

Né꞉ne Solomon raorénhna.

¹ Tserihónhnien ne ronnontí꞉io tsi natehahiatorétha né í꞉ratste ne sarihwakwahrihshión꞉tsera, Ó Sewenní꞉io; thá꞉tion ne kwáh í꞉se sáwenk tkarihwaiéri í꞉ken,

² Waʼkaterénhnaien karihwaʼkwahrishontsherákon tsi ensakoríhwenhte ne shonkwetaʼshón꞉has, tánon ne iakóten tkarihwaʼiéri tsi ní꞉ioht tsi asakoríhwenhte.

³ Wakaterénhnaien ne tsi ionwénhtsaien ne ahontakáhawe nonkweshón꞉has akosniétsera. Aiáwenhs ne akarihontáko ne ioiánere akénhake.

⁴ Waʼkaterénhnaien nahontasakóne tsi natehiotonhontsóhon ne iakótens nonkweshón꞉ha, waʼkaterénhnaien nasakosniénon ne iakothenténion, tánon tesaʼkonénstsiat (éhʼren sakohiatenháwit) ne ronwaʼtitesténhnis.

⁵ Waʼkaterénhnaien nonkweshón꞉has aiesahsenhnaiénseke kwáh tsi nikaríwes nenhtsekhenékha entkarahkwinekénhseke, tsi nikaríhwes nasonttenhnékha kará꞉kwah entkarahkwinekénsehke, tewaterehseranethárion nió꞉re.

⁶ Waʼkaterénhnaien thóh nahahiatoténhake tsi ní꞉ioht ne iohkenhnó꞉ron tsi nón꞉we nikaientʼthóhseron, tsi ní꞉ioht tsi iohtsatará꞉ties tsi iokenhnó꞉res nonhwenhtsáke.

⁷ Waʼkaterénhnaien ne tsi rotenhniseraténions ne karihwakwahrihshón꞉tshera nahioianeréhake (ahiokwástonhke) tánon skénnonk thaʼkénhake, tsi nió꞉re iáh thatahonthakarakwinekénsehke.

⁸ Waʼkaterénhnaien ne rahónha ahahiatakwení꞉ioke kwáh iahónwe tsi nió꞉re ne kaniatarakhekówaʼne, Euphrates ahontonhtásawen kwáh iahionhontsókten.

⁹ Wakaterénhnaien ne ronwashóns tsi niháti ne iahonwenhtsiatʼthénke ratinákere rahohénton tahonttsákete, tánon ne ronwáshons tahonwanakenróhiente.

¹⁰ Wakaterénhnaien ne rotinontí꞉ios ne Tarshish tánon ne tsi kawehnó꞉tons ohwísta ronwaʼkarhiáksehek, Waʼkaterénhnaien ne rotinontí꞉ios ne Sheba tánon ne Seba thonwaʼhawíten nathatawí꞉tsheras.

¹¹ Waʼkaterénhnaien ratikwékon ne rontinontí꞉ios tahontsákete raohénton, tánon onhkwetaʼkwékon enhonwahiótenhse.

¹² Asèken sakoniakénhtha ne iakóten ne ienhonwaʼnáton, né rotíten tánon tsi nihiákon ne iáh tewaʼtettsénhries nónhka ahiontatsniénon.

¹³ Tesakoróh꞉tons ne iakotsihióha tánon ne tehiontkárhiaks, tánon sakonónstats tsi iakónnhe ne tehiontkárhiaks.

¹⁴ Sahniakéntha ne tsi iakónnhe tsi nòkwah ne karonhiakénhsera tánon ne kaniakatsténhsera tánon tsi nikanó꞉ron ne raotinekwénhsa ne raohénton.

¹⁵ Ahiónhnise arónnheke ne ronhnontí꞉io! Wakaterenhnaien nowís꞉tanoron ne Sheba nón꞉we ahónhion. Waʼkaterénhnaien iahiokonhtákwen tsi ahonwaʼterenhnaienhníheʼke, waʼkaterénhnaien ne Rawenni꞉io raohiathateríhtshera tiotkonhónwe rahonháke akaienhtáke.

¹⁶ Wakaterenhnaien ahiokwátstonhake nó꞉natsias ne tsi iohontsáien; waʼkaterenhnaien ne tsi ionhniarón꞉nions né tahontahioróh꞉ronhke ne kaientʼthó꞉tsheras; waʼkaterenhnaien ne kahiksonhas thóh nahiotahionhnihake tsi ní꞉ioht ne Lebanon nón꞉we; wakaterénhnaien ne tsi kanatowáʼnens kwáh tahontakanenhrá꞉rahke tsi ní꞉ioht tsi ionthontónhni ne kahentáke.

¹⁷ Wakaterénhnaien ne ronnonhtí꞉io raosénhna tsi nénhwe akátake, tsi nihasenhnowánen thóh nakarihwéshonke aʼkathátseke tsi kíʼ ní꞉ioht ne karákwah. Wakaterénhnaien akahontsakwékon ahonwarihwaʼnónhtonhse ne Rawenni꞉io nasakohiatatériste tsi kíʼ nihohiatateríston ne ronnonhtí꞉io; wakaterénhnaien onhkwetaʼkwékon ne ahiontrohriá꞉thake ne raotsenhnonhniátshera.

¹⁸ Tehonwaʼnonhweráton ne Roiá꞉ner, ne Sakoní꞉io í꞉ken NIsraeronónke! Rahonhatsíwa kíʼ tsi nihaieránions ne iorihwaʼnerakwahthénions.

¹⁹ Tehiontenonweráton tsi nihosenhnanerákwat né꞉ne tsi nénhwe enkénhake; wakaterénhnaien ne raohiatanerakwáhtshera ne akananón꞉hake nohontsakwékon. Éhʼtho naiáwenhne tánon éhʼtho naiáwenhne.

²⁰ Né raoterenhnaienthátshera ne Táwit né roiénha ne Jesse onhtók꞉ten.