Psalms 71 - Ohiatonhseratokénti

Aterénnaient ne naiakonhnéshonke tanon kaienawasétshera

¹ Shonháke, Ó Saiá꞉ner, nón꞉we nikeniahésen; Tó꞉sa nonwénhton satthóntat nahionkatéhate

² Tsioríhwa tsi í꞉se ne sarihwakwaríh꞉shion, tatiénawas tánon saskeniákent; takatahónsatat tánon tatiatanónstat.

³ Thóh niʼiohtón꞉hak tsi tatiatanónstat tsi ní꞉ioht tsi iakohiatanónstats nostenráke nónhkak thóh nàkon iakotaséhton, né꞉ne iotenhenraníron tewaʼkènes, asèken í꞉seke nón꞉we nikatasehtákwa tánon teskènes.

⁴ Saskeniákent, Ó Sewenní꞉io, tsi nòkwa ne ronnonhkwetaʼhét꞉kens, tsi nitotiniaró꞉taron ne iatehotiʼiánere tánon ne ratiniakátsʼtes.

⁵ Asèken í꞉se Saiá꞉ner nakarahrátʼtsera í꞉ken, tkonhietákwen Ó Saiá꞉ner kwáh shiʼtewatiónha nióre ahonsakaʼkéte.

⁶ Shonháke nón꞉we siʼkeniahé꞉sen né꞉ne kwáh shontakenhnákerate; kwáh shontakenhnákerate í꞉se sistiatanonstháties. Kwáh káti tiókonte tsi thenkonhnonhweratón꞉sehke.

⁷ Iakotiokowáʼnen tetsionkatenienténstha, né karihónhnis tsi nikashástste tsi nitéskenes.

⁸ Nekʼsákon ne titkáhere ne sanonhweratón꞉tshera, tánon kontatséshons ne iakenikwékon ne sahiatanerakwáhtshera.

⁹ Tó꞉sa tatkénhron nó꞉nen enwaʼketsténhake; tó꞉sa takatewénhtet nó꞉nen iáh othènen tesétsta.

¹⁰ Né iónkshons akwékon karihwaʼhetkénsera í꞉ken tsi nihontʼtharáhkwen, tánon tsi nihonskáneks nahionkenonhwaʼrhiákon.

¹¹ Rónton, “Tsi sehwáʼser nètho rónhkwe tánon tsi sewaʼiéna tsitsénhak ne Rawenni꞉io tsi rotewenhtéton, iáh kíʼ ónhka tathahontahónwaʼne.”

¹² Ó Sewenní꞉io tó꞉sa kíʼ ahínon nió꞉re tásehset tsi nón꞉we níkes; Ó akeNí꞉io, tesasteríhen táskene!

¹³ Aiáwenhs tsi nihiákon ne tionkatsatón꞉tses ahonwaʼtisénhni tánon ronwanátont; aiáwenhs tsi nihiákon ne ronhteniéntʼtha nahiontkaréwaʼte né thotiróhrot natehénsehra tánon ronhwaʼtisenhnáksat.

¹⁴ Ók kíʼ ienwatkonhtákwen tsi enwakerahratʼtseraiéntake, tánon kíʼ sénha isiʼnónhwe tsi nathenkonhnonhweráton.

¹⁵ Né tsiksakáronte kwáh enwatróri ne sarihwakwahrihshón꞉tshera, tsi kwáh tiókonte ne sahióte ne kaiatakeʼnhátshera, eʼthohʼsáne sóh tsi iaweʼtowá꞉nen iáh tatkwéni nahonkenikonhraiéntahne.

¹⁶ Kwáh kíʼ éntke tsioríhwa tsi nisaʼshaststenhseroʼwánen Saiá꞉ner kwáh kíʼ thenkonhnonweráton, kwáh iáh ónhka nakòren thatatkenonhweráton.

¹⁷ Ó Sewenní꞉io kwáh siʼkeksʼsáha teskerihonhniénhni, tánon shé꞉kon nikherohrhiánions nonkweshón꞉ha ne iorihwanerakwaténions tsi nisatieránion.

¹⁸ Eʼthohʼsáne tsi ó꞉nen akekʼsténha tánon waʼkenontsistaráken, tó꞉sa kíʼ takatewénhtet, Ó Sewenní꞉io, tenikwekónhak tsi nikaríwes enkatró꞉ri ne sashaststénhsera tsi nihiokwénion ó꞉ni tsi nathenwaʼtereseranethárion. Né sashaststénhsera

¹⁹ tánon ne sarihwakwahrihshón꞉tsheras, Ó Sewenní꞉io, iéwas tsi nón꞉we ne kwáh tioteronhiátes. Í꞉se né iorihowá꞉nens tsi nisahtseránion, O Sewenní꞉io, ónhka nahonsaiesaiérenhke?

²⁰ Í꞉se tisatheniéton ne kanikonraronhiakénsehra tánon karonhiakénsera nakonháke kwáh kíʼ shé꞉kon thetéskon nakeshaststénhsera; iáh tesatthontáton nahonkiʼhéion.

²¹ Sénha ensehsetʼsenhnówaʼnate tsi nitiontónhne, tánon shé꞉kon ensehkenikonhraʼnírahte.

²² Né Rawenní꞉io tsi nihorihwaʼtó꞉ken tsi nòkwah ne rahonkwetaʼshón꞉ha, ká꞉ti kwáh thenkonrihwáʼkwahse karenhsóhtaron onó꞉wa enkaterénhnote tsi tenhkonhnonweráton, Né꞉ne Rawenni꞉io ne rotokénti tánon rahónha NIsraeró꞉non ronhwasénhnaiens.

²³ Né tsi kónnhe kwáh tewatkénhrete natsenhnonniátshera nó꞉nen thenkonrihwá꞉kwahse; tioríhwa tsi í꞉se sestsiatákwen.

²⁴ Kwáh kíʼ kontatsésons né entʼthárakwe ne sarihwakwarihshón꞉tshera, tsioríhwa tsi nihiákon ne ionteniéntʼtha nahiontkaréwaʼte kwáh kíʼ ronwaʼnatéhaton tánon ronhwatisenhnaksáton.