Psalms 68 - Ohiatonhseratokénti

Naionterénnaien ó꞉ni thaiontenonweráton

Ne Raterenhnathentsátha. Né꞉ne Táwit raorénhna.

¹ Ahioh thenháten ne Rawenni꞉io, ánion ne ronwáshons tesakoré꞉niat; ánion tsi nihiákon ne ronwakenhrónhni ronhtèko ne rahohénton.

² Tsi ní꞉ioht nó꞉ienkwahra tsi hiotsienkwahrenhawiton, ká꞉ti sehʼiatékwat; tsi ní꞉ioht ne otsinakontákwahne raotiʼtsikhéta tsi kawistanáwenhs ne otsenhát꞉tha, ánion ne ronhnonkwetahétkens ratihiatháton rahohénton ne Rawenni꞉io.

³ Ók ánion ne tionkwetaiéris ronatonhnárat; ánion ronatʼtsenhnonhníhak rahohénton ne Rawenni꞉io; ánion kwáh ratihiatanahnón꞉hak natonhnaráhtshera.

⁴ Tetsisewarihwá꞉kwas ne Rawenni꞉io, tesehwaríhwak ne kanonwerahtónhtshera ne raosénhnakon; tsi sewahasehrónhnien tsi nikáien ne tsi iohtsikerarónhnion nón꞉we nihathonhwisehréhtha né raosénhna né꞉ne Roiá꞉ner sewatsenhnonníhat ne raohénton.

⁵ Né Rawenni꞉io, ne rahónha thóh rénhteron ne raononsatokentiʼkówaʼne, tánon rahónha tesakorihwásniese ne tehontonnakárhias ratiksaokónhas tánon tesakohiatoré꞉tase ne ionateréhons,

⁶ Né rothinatenháwis Rawenni꞉io sakonatʼtasehronniénhnis né tahontsiásehte ne ratiwaʼtsíraiens; sehsakothatewenhniʼiohseráwis ne ratinhó꞉tons ne nahonsahontatonhnakéna, ók ne ronhnerhiasaníron tsi né nón꞉we nihiahontsiatʼthénʼen nenhathinákerehke.

⁷ Ó Sewenní꞉io, nó꞉nen shiaháse nasehenthénhse ne shonkwetaʼshónhas, tsi niahónhne ne iahonwenhtsiatʼthénhke. Selah

⁸ waʼtsiahontsíshonkwe, ne tsi karonhiáte tahiokénhnoʼre tsioríhwa tsi nontahawenonhátiene ne Rawenni꞉io ne Sinai nón꞉we, ne tsi nontahawenonhátieʼne ne Rawenni꞉io NIsraeronónke nón꞉we.

⁹ Taienakwahwé꞉ron tsi nahokénhnore, Ó Sewenní꞉io, í꞉se waskenhnó꞉rehthe ne kahiatateríhtshera natʼtenonhtionhontsaiénton; tánon shá꞉shonhontsiasehrónhni ne shonhóntsia ne ionhontsiakʼsénhen;

¹⁰ né shonkwetaʼshónhas thóh nón꞉we nahonthatíteron; né tsi nithisarihwaʼiérih, Ó Sewenní꞉io, í꞉se tasehiatʼkáwen ne tehiotonhnakárhias.

¹¹ Né Roiá꞉ner rahónha totʼkáwen noríhwa ne tahionterihwaʼré꞉niaʼte; tánon ionatsiokowánen ne tsonatʼtonhwísen watʼkonterihwaréniaʼte:

¹² “Né Rontinontí꞉ios tánon ne rahonhnonkwetashón꞉has ronhterí꞉ios, ronatèkwen, ronatèkwen!” Né konhnón꞉kwe ne tkonthíteron tsi iotinonshó꞉tons watkonthatsiakskónhaʼse tsi nahoténsons ne waʼtserón꞉kwen,

¹³ eʼthohʼsáne tsi éhthoh nón꞉we nikontiterónhtaʼkwe tsi nón꞉we nikonwathiteronhthákwah ne teiotinakarontónhas ó꞉nenh kíʼ né thiʼtsiotiróhron ne kawistaráken, tsi kíʼ ní꞉ioht ne oríte ne ioterohrók꞉ton nahonerahón꞉tsa.

¹⁴ Nó꞉nen ne Roshaststenhserowánen Rawenni꞉io wateshakoréniaʼte ne rontinontí꞉ios ne nón꞉we, thóh naháwenhne kwáh né꞉ne tehioniokwáhtase ne Zalmon.

¹⁵ Tsi natehiohnontanónhiani ne Bashan, Ó tsi niwé꞉so tiotenontatónhnions iononhtarónhnions, ne Bashan nón꞉we!

¹⁶ Nontséren kíʼ tiónkwe tsi nítion thóh nón꞉we nisewaterénhnaiens tsi Ionón꞉te ne Bashan, sewahnó꞉sen wáʼhi tsi nateietʼtsikánere tsi nihá꞉ti thóh nón꞉we nihonterénhnaiens, ne tsi ionón꞉te tsi nón꞉we ne Rawenni꞉io nihothaterakwénhni tsi nénhwe thóh enhenterón꞉take?

¹⁷ Né꞉ne sóh꞉tsi iawetowánen nahiónsehte nontsiónkwas kásehres, né꞉ne tó꞉ka natewenhniawehetserásens nikasehrétakes, ne Roiá꞉ner Sinai nón꞉we nontare tsi iahatáwehiaʼte ne Raononsatokentíke,

¹⁸ Onotoharakénhiaʼte niahá꞉re, ronatsokowánen sakohiatenháwi ne ratinótonkwe; waʼhaienásehron nathatawítseras tsi nahonwahwí꞉hon ne ronhnerhiasanírons, né nahónton nètho Roiá꞉ner Rawenni꞉io thóh nón꞉we nahenterónhtake.

¹⁹ Tehonwaʼnonweráton ne Roiá꞉ner, tsi rahónha ró꞉kete nonkwahríe꞉na niatewenhniseráke; Rawenni꞉io séh ne sonhkwahiatanónstats. Selah

²⁰ NonkwahʼNí꞉io né Ní꞉io í꞉ken ne shonkwahiatanónstats, tánon rahonháke ne Rawenni꞉io í꞉ken, né꞉ne Roiá꞉ner, né rahonkwéta í꞉ken tseniákens ne kenheiátʼne.

²¹ Ók Rawenni꞉io kíʼ kwáh thenhsakó꞉nontsistarihte ne ronhwashons, né rotinonkwí꞉seresons tsi niháti né nón꞉we nihonathahí꞉thake tsi nón꞉we nihotiní꞉kon.

²² Né Roiá꞉ner waʼhenron, “Kwáh kíʼ thentekhehiathénhawe ne Bashan nón꞉we, kwáh kíʼ ensehkheskó꞉ko tsi nihotiskóhon ne kaniatarakhekó꞉wa,

²³ Ká꞉ti né ní꞉se nahónton onekwénhsa asarasitohárete, tánon iekaníhare ne sewaʼtsenenhókonhs éʼrhar enhotihiatáheste.”

²⁴ Tsi nisanenhraseronnihátse waʼhéneʼne, tsi nihonenhraseronnihátse nakeNí꞉io, tsi niahatáwehiate Nononsatokentikówaʼne—

²⁵ Né tehatirihwáʼkwah ohénton rón꞉nete, ne ronhterenhnó꞉tha onàken tón꞉nete, tsi natehón꞉tere nitsiotihiónsas kontirenhnásehre ne niwáʼha ienahkwahétʼta konhtíhawe:

²⁶ “Tehonwanonweráton ne Rawenni꞉io thóh tsi nikentsiokowáʼnen iakoterénhnaien, tehonwaʼnonhweráton ne Roiá꞉ner, sewaʼkwékon ne Israeronónke nón꞉we nitisewatwatsiríhnon!”

²⁷ Benjamin thó꞉enton, né꞉ne kwáh ken nithó꞉tsiokwaha, né rahénte, eʼthóhʼne ó꞉nen né꞉ne sakotihéntenhse ne Judah sahotiríhwa í꞉ken ne raotitsiókwah, eʼthóhʼne ó꞉nen né thóh shón꞉nete ne sakotihéntenhse ne Zebulun tánon ne Naphtali.

²⁸ Shotási ne sashaststénhsera, Ó Sewenní꞉io; sénest ne sashaststénhsera, Ó Sewenní꞉io, kwáh kíʼ tsi niskwahnatónhni ne tiotserénhton.

²⁹ Né karihónhnis né Sanonsatokentiʼkówa ne Jerusalem né rontinontí꞉ios thatíhas nathatawítseras naiéshon.

³⁰ Sáhrist thí꞉ken Egypt kwáh né꞉ne ká꞉rhio ohʼhontókon nón꞉we níwes, nonkweshón꞉has kwáh né꞉ne tionhnóns꞉kwahron rathí꞉tsinn ratiʼkwekonhátses ne tionhnóns꞉kwahrons owirashónhas. Tsi nió꞉re kwáh ratiʼkwékon tenhontsákete tánon eniesatátʼtse ne raonáwenk kawistaráken. Tesehiatʼthókwat thí꞉ken nonkweshón꞉has ne ratinón꞉wes nahonteriʼioserónhni!

³¹ Né otsínekwar nikaristó꞉ten Egypt nikʼká꞉ha; ánion ne Ethiopia teiosteríhen waʼnentʼtsakétsko nahonterénhnaien rahonháke ne Rawenni꞉io.

³² Tetsisehwaʼrihwakwas ne Rawenni꞉io, ne tsi sewaʼnakeraserakerons ne tionhontsakeró꞉nons; tesehwaʼríhwak ne kanonweratónhtseras rahonháke ne Roiá꞉ner, Selah

³³ rahónha né꞉ne roʼthonwiserétha ne tsi iotsikerarónhnions, né꞉ne otsikerakáion. Tsi sewaʼtahónsatat tsi nihówenhte tehohenrétha.

³⁴ Sewatróriat ne Rawenni꞉io raosasthénsera, rahónha ronnontí꞉io í꞉ken tsi niwaʼtenáskwah ne Israeronónke; tánon ne raosasténhsera tsi iotsikerarónhnions nón꞉we níhwes.

³⁵ Tsi nihohiatanerá꞉kwat ne Rawenni꞉io tsi nontáre ne Raononsatokentikówaʼne, né Sakoní꞉io í꞉ken Nisraeronónke; tatkáwas ne kashasténhsera tánon sahkosastenhseráwis ne rahonkwetashón꞉has. Ronhwaʼsénhnaien ne Rawenni꞉io!