Psalms 66 - Ohiatonhseratokénti

Tahonwanonweráton ne Rawenni꞉io tsi nithorihwaiéri tsi nokwáh ne Israel.

Ne Raterenhnathentsátha. Ne karénhna.

¹ Sewatʼtsarókwat nattsenhnonhniátshera rahohénton ne Rawenni꞉io, kwáh tionhontsakwékon ne tiónkwe;

² tesehwaʼríhwat ne kaiatanerakwáhtshera thóh raosénhnakon; tatsítion ne iorihwanerakwahténions kanonweratónhtshera.

³ Tsisehwaʼró꞉ri ne Rawenni꞉io, “Tsi niioriwanerakwaténion tsi nihaié꞉ra! Né aoríhwa tsi nisashaststenserowánen ne iesáhshons waʼhontʼtókerihke ne sahénton.

⁴ Akahontsakwékon nón꞉kwe tsi í꞉se iesasénhnaiens; teiesarihwáʼkwase ne kanonweratónhtshera, tehatirihwáʼkwah ne kanonweratónhtshera ne sahsénhnakon.” Selah

⁵ Káts tánon sewatkátho tsi nahoténsons ne Rawenni꞉io rohioténhen: tsi niʼiorihwaʼnerákwah tsi nisahkotseráse nonkweshón꞉ha.

⁶ Énska iokwénhrare tsi nón꞉we ne Rawenni꞉io nathanekatkhási ne kaniatarakhekó꞉waʼne tánon wahastátʼthate né nón꞉we nohóntsa tsi nón꞉we nikanekhó꞉kwe; tánon thóh nón꞉we nahontóhetste thakésont tsiahónʼne tsi waʼthatihiá꞉iake. Thóh nón꞉we nahakwahtonhnáren rahonháke ne waʼkarihónhni tsi nahá꞉iere,

⁷ né꞉ne raoshaststenhserákon tsi rahón꞉ha enhotkorástonhke né꞉ne tsi nénhwe enkénhake, tánon tesakokarenháwis ne kaiatón꞉ni ratisénhnaiens tó꞉sa sehríhon tsi nihiákon ne iesát꞉konhte nahonthatenontónhnionse ratishástsʼtese. Selah

⁸ Thetsisewaʼnonweráton nonkwahʼNí꞉io, Ó tiónkwe, né tiónhniat ne sewaʼnonweratónhtshera nahonatʼthónhtene nó꞉nen tetsisewaʼnonhwerátons ne Rawenni꞉io,

⁹ Iáh tehothontháton naʼitewénheie, tánon iáh tehothontháton nahionkhisénhni.

¹⁰ Asèken í꞉se, Ó Sewenní꞉io, waskwátkenhse; thóh ní꞉ioht tsi waskwát꞉kenhse tsi ní꞉ioht tsi ióntkenhse kawistaráhken.

¹¹ Thóh niaskwahiathénhawe ne tsi watahá꞉raien; waskwarieniástethe ne iakwaronhkweʼnáke;

¹² Í꞉se waʼsehríhon ne ionkhíswenhs ne tahionkhihiatorahrákkon; tehionkwahtohétston ne tsi iotétkha tánon nawénhke; eʼthóhʼsáne thóh nón꞉we nontaskwahiathénhawe tsi nón꞉we niwaʼtenatowáʼnenh.

¹³ Kwáh enthékhawe ne waʼkatéskonte ne Sanonsatokentiʼkówaʼne; Kwáh entʼkónhion tsi niwaʼkararátston,

¹⁴ nó꞉nen ne satewaʼkanikonhrá꞉ren konhiararatsténhni. Ónenh kíʼ éhʼtho nénhtiere tsi kíʼ niwaʼkararátston.

¹⁵ Kwáh né enkontátʼtse ne khehiatéskonte ne ronaréhsenhs, tánon ne tsi nenhkaienkwahró꞉ten ne teiotinakaronhtónha ratítsinn í꞉sehke nienhénwe; kwáh né entʼtiéste ne tionhnónskwahron ratítsinn tánon ne kaiatákeras. Selah

¹⁶ Káts tánon sewaʼtónhtek, sewaʼkwékon ne tsi sewatʼtsánis ne Rawenni꞉io, tánon kwáh enkatʼró꞉ri tsi ní꞉i nihakatierá꞉se.

¹⁷ Waʼkewénhte tsi watkaséntʼtho ne raohénton, Né waʼtinonwerahtónhkwahte ne karenhnasónhas.

¹⁸ Tó꞉ka iáh othènen kaʼríhwa tahonkónhnike nakeriwaʼnerahát꞉tsheras, ne Roiá꞉ner iáh kí othènen tahothahonsathátonhke.

¹⁹ Ók kíʼ kwáh oriwiʼiohónwe ne Roiá꞉ner tsi waʼhatahónsathate; kwáh kíʼ waʼhathahónsathate nakwaterénhnaien.

²⁰ Tehinonhwerátons ne Rawenni꞉io, tsioríhwa tsi iáh tehotharónhtion nakwahterénhnaien khés éhʼren ahonsahohawíton ne iorihwaʼtóken raononronhkwáhtshera nakonháke.