Psalms 58 - Ohiatonhseratokénti

Né꞉ne Rawenniʼióke Ieiakoterénhnaien Nasakoréwaʼte Ne Ionkwetaʼhétkens

Ne Raterenhnathentsatha: tsi niiotkwaton ne “Tosa Seriwatont” karénhna. Né꞉ne Táwit raorénhna (Miktam).

¹ Ní꞉se sewakoráshons nonwènhton kén ne tkarihwaiéri tsi ní꞉ioht tsi tahisewahiatoréton? Tsi ietsirihwénhtha nonkweshón꞉ha tkarihwaiéri kén?

² Iáh, ne sewerianéshon né wesewatenikonhrón꞉ni ne kariwaʼhét꞉ken; ne sewaʼtshanákes ne wesewaʼhióten ne iáh othènen takaianerenhseraiéntake tsi ionhwentsáte.

³ Né ronhnonkwetahétkens kwáh shontahonhnákerate shihonhnonkwetahétken; shontahonhnákerate satehonterientawénries, ronhnowenhthánions.

⁴ Kanonkwahtserák꞉sen ronanitskerón꞉tses tsi ní꞉ioht ne kaniarák꞉sen, tsi ní꞉ioht ne kaniaraseró꞉hen tewaʼthahonthakwéstha,

⁵ né ká꞉ti ne tó꞉sa ahiakowenhnáronhke ne tehonthaterenhnáhon nó꞉niare khés ne rorenhnáhon asakonikonró꞉ri.

⁶ Ó Sewenní꞉io, tesenawíriak kíʼken ratiseró꞉hens kénreks!

⁷ Aiáwenhs ahatihiatháton tsi ní꞉ioht nonékanos ne kakʼtsahawenonhátsie; aiáwenhs tahonwanaskwaserón꞉kwahte tsi ní꞉ioht ne óhonte tsi nón꞉we né iotkáte nihiontohesthákwah.

⁸ Ánion thóh nihatihiatoténhset tsi ní꞉ioht ne takwahré꞉reh ostarón꞉wa iewáʼtons iahokáhon; aiáwenhs èhtho nahatiiatothénset tsi ní꞉ioht nowiráha iakawenhéion tsi iakawenhnakeráton iáh nonwénhton teiakotkáton ne teioswát꞉te.

⁹ Nohénton nahonateriéntarane ronwatironhtsiákon tsi ní꞉ioht nóhonte; raonakwahtsherákon ne Rawenni꞉io kwáh tensakótehnste tsík sénhak shé꞉kon ronnónnhe.

¹⁰ Né tiokwetaiéris enhontonhnáren nó꞉nen enhontkátho skakarhiákon; kwáh thóh enhonrashitóhare raotinekwenhsáke ne hionkwetahét꞉kens.

¹¹ Nonkweshón꞉has enhiaiéron, “Oriwiʼiohónwe tsi teshonateriwasehrakwénhnis ne tionkwetaiéris; oriwiʼiohónwe tsi káien ne Rawenni꞉io tsi rahónha rarihwénhtha ne tsi ionwenhtsáte.”