Psalms 55 - Ohiatonhseratokénti

Né Nateriénhnaien Ne Ónhkak Ionthatenhniʼkonraténhni Né Nakoteró꞉sehra Ehʼnihiakóiere

Ne Raterenhnathentsátha: né áhonste né karenshó꞉taron waterenhnót꞉tha. Né꞉ne Táwit raorénhna (Maskil).

¹ Satahónsatat nakwaterénhnaien, Ó Sewenní꞉io; tó꞉sa satsʼwathéni tsi nikerihwanónhtons.

² Takatahónsatat tánon tatiénawas; iáh othènen teséstha ne tsi natewakanikónhrare. Kwáh í꞉ken tsi wakateronienhténhni

³ né tsi nihonattsarokwáhton ne iónkʼshons, tsioríhwa tsi nihionkeronhiakéntha ne ionkwetahét꞉kens. Asèken ne thatíhas ne thènen tahonkenikonhrá꞉ren, né waʼhatirihwaʼkwénienste ne kaswénhtsera nahionkatkónten.

⁴ Tewaʼkerhiashisʼhónkwa, nahoteronhkwátsera ne kenhé꞉ion tewaʼtiatoraráhkon.

⁵ Wátterons tánon waʼtiatishón꞉kwa, tánon tsi nateiotenonhianíhton ne kariwahetkénhsera tewakatsatótses.

⁶ Tánon ká꞉ton, “Kaská꞉neks nahontónhseke shí꞉ken ne tátʼten! Kwáh kakʼnonhwekówa iatátʼten tánon enwaʼkorihsénhtaʼne;

⁷ oriwiʼiohónwe tsi í꞉non nón꞉we nienhkí꞉tse; tánon iahonwenhtsiatʼthénken nón꞉we ienskathenatónhni;

⁸ Kwáh tenhwasteríhen nakettsénhri kakʼnónhwe nahonskwakarénhreke nahónton ahonkenónsthate kwáh í꞉non nió꞉re akénhake kíʼ tsi natehioweráthase ne kaswénhtshera.” Selah

⁹ Tesehianitonhniáten tsi nihotítare ne iónkswenhs; katkáthos iáh thahóten teskaianerenhseráien tánon ratinathakáras.

¹⁰ Kontatséshons tánon ashontakwékʼkons tsi ronatkhakwénhtaien ne tsi watenhenraien, tánon né꞉ne sewaterihwatewá꞉ton tánon né꞉e tahionhnikonhráren ne titkáhere né nón꞉we;

¹¹ Aʼthataséhton tánon kanénhskwen kwáh tsík nón꞉we níken; katensthénhtshera tánon kanikonhráton iáh éhʼren tewètha ne tsi tehieiatorethákwah.

¹² Tó꞉ka shí꞉ken né꞉ne iónkswenhs thahiontserónhake— akʼkwéni nakatakáts꞉tate nètho; Iáh séh né꞉ne tehiakwahtátʼtions tehionkatatkowanathénhni nahionkenikonhrát꞉sate— Ahontʼkwénionhke nakhehiatasehthénhnike.

¹³ Ók kwáh kiʼ í꞉se, ne sahtetiónhtsatʼte, ne tiontsatenró꞉hon, né꞉ne kwáh ákta tsi í꞉ken nakateró꞉sera,

¹⁴ tsi nikáien ne ionwésenh tsi tiontsatenhró꞉honne; rahonóns꞉kon ne Rawenni꞉io ietsatawehiáthakwe sahonkeniríhwa tsi skát꞉ne í꞉teneskwe.

¹⁵ Aiáwenhs ne iónkʼshons ahonhníheie nohénton iahotihiátiwe; aiáwenhs tsiahonónhneke tsi iahónsnenhte ne tsi tsohontsáien ne kenhéion! Asèken ne karihwahét꞉ken tsi rotinonsóhtons kénteron tánon ne raoneriáne.

¹⁶ Ók iahináton ne Rawenni꞉io, tánon ne Roiá꞉ner kwáh kíʼ enhakenónsthate.

¹⁷ Okarasnéha tánon noronhkéne tánon nenhtieníkare nakerihwakathénhtseras tánon tsi niwakonhséhna rahonháke nón꞉we niewètha, tánon kwáh kíʼ enhakewenhnáronhke.

¹⁸ Kwáh kíʼ iáh othènen tahonkatkarewátonhke tsi nenhakenónsthate naʼteriʼioseráke tsi niwakaterí꞉io, asèken ronatsiokowánenh ionhkát꞉konhte.

¹⁹ Rawenni꞉io, rahónha toniarótaron né꞉ne tsi nénhwe enkénhake, Selah enhakatthónhtene, tánon ensakosénhni— tsioríhwa tsi iáh tatehonthonhnaténies, tánon iáh tehonwatsánis ne Rawenni꞉io.

²⁰ Né tiontsatenhró꞉honʼne iasakotsatónhti ne ronténros; wathaiáke tsi nihoraratsthánion.

²¹ Né tsi ró꞉thare thóh niwaʼtsésen tsi ní꞉ioht ne kawistoseró꞉kwen nahionhnékwane, ók ne rawerhiáne ateriʼiósera raská꞉neks ne raowenhnashónha iakonikonranetskhátha tsi ní꞉ioht nahionthateienároh iehiátake, ók thóh kíʼ nikaré꞉nas tsi ní꞉ioht ne iosarothí꞉ie.

²² Tsi natesahnikónhrare Roiá꞉ner hiatsiénhas; tánon rahónha kwáh entʼthiáne; kwáh iáh nonwénhton tahatʼtónhtate ne tionkwetaiéri iahionthatesénhni.

²³ Ók í꞉se, Ó Sewenní꞉io, iensehiáthente tsi nón꞉we ne kwáh tioshón꞉wes; né sakonaséhtha tánon natiokenthashónhas kénk nentontíhionke enhonnhíheie. Ók kwáh kíʼ shonháke nón꞉we nenhtewakethakwénhake.