Psalms 52 - Ohiatonhseratokénti

Raothirihwenhthátshera Ne Rathinikonhrá꞉tha

Ne Raterenhnathentsátha. Né꞉ne Táwit raorénhna (Maskil). Nó꞉nen ne Doeg né꞉ne Edomro꞉non tsi Rotkénseron ne Saul tánon Wahoro꞉ri, ne “Táwit iehawénon tsi thonónshote ne Ahimelech.”

¹ Nontsiéren tsi tesataterénhsaron, seniakátste shón꞉kwe, ne kariwahetkénseras tsi nisatserá꞉nion? Rawenni꞉io Tsi né nénhwe enhorihwatokénhake

² né satenikonronnihátse ne kakaronniátshera. Né senhnasáke kwáh né꞉ne kwáh iosarotíie iontkonsthonriát꞉tha í꞉ken, Tiotkonhónwe sahtsokentonhnihátses.

³ Sénha kariwahetkénsera senón꞉wes tsi ní꞉ioht ne ioiánere, tánon wé꞉so tsi nisanowenhthánions tsi ní꞉ioht norihwí꞉io ahisatharákwen. Selah

⁴ Seʼnón꞉wes né sawenhnaókons áʼshaste nasekaré꞉wate nónkwe, í꞉se ne sanó꞉wenhs!

⁵ Ók Rawenni꞉io kíʼ enhiakarón꞉ni tsi nénhwe enkénhake; kwáh ienhiaiéna tánon enthiaiatinekénsthakwe tsi sanón꞉sohte; kwáh éhʼren enhiaiatenháwite ne tsi ionhontsáien tsi ratíteron ne ronhnón꞉nhe. Selah

⁶ Ne tionkwetaiéris kwáh enhontkáto, tánon enhotiterón꞉ne, tánon ensakotistériste ne karihwahétken tsi nihontsiéra tánon ronhtónhnions,

⁷ “Tsi sewáʼken tsi nikáien ne iáh tehotekwáhsen rahonháke ne Rawenni꞉io, ók né raniahésenhne ne iawetowákenkwe kakwaséhtsheras, tánon ne rawesakonhátieskwe atʼtsokowatsherákon nón꞉we nahotasehtonhátseseske.”

⁸ Ók kíʼ ní꞉i kwáh ehʼnitiatóten tsi ní꞉ioht né nitsoronhtahiónha iakeniewátha kèrihte hiotehiarón꞉tse raonónskon ne Rawenni꞉io. Né ní꞉i tewaketákwen ne iorihwató꞉ken Rawenni꞉io raonoronhkwátshera né꞉ne tsi nénhwe enkénhake.

⁹ Kwáh tenhkonnonweratónhsehke tsi nénhwe enkénhake, ne tsioríhwa tsi nisahtsiéren. Akohénton ne tsakawetákwen Kwáh enkatróri ne sahsénhna, tsi nihioiáneren.