Psalms 44 - Ohiatonhseratokénti

Nónen ne Kentsókwa Ionikonratʼsens tánon Wahonterén꞉naien Nahonwatiié꞉nawase

Né꞉ne Korahites raotirénhnas (Maskil).

¹ Kwáh í꞉i ionkwatthontéhon, Ó Sewenní꞉io, ionkhisotʼthonkonhkénʼen iontkhiró꞉ri, tsi nikahiothenhsehró꞉tens sahiothénhen ne shiʼhonathenhniseraténionskwe, né꞉ne waʼhónhnise tkènhne:

² Í꞉se kwáh sahtshanáke khók wásaste tsi waʼsehiatínekenhwe nonkweshón꞉has, ók í꞉se sheséhteron nonkweshón꞉has ne raʼononhontsáke; í꞉se waʼserihwahetkénten nonkweshónhas, í꞉se waʼsehiawí꞉hon ne ioiáneres athatahwí꞉tsheras ne shonkwetaʼshónhas;

³ Ne shonkwetaʼshónhas iáh teonathatsiatakweniʼióston nonhóntsa nasarekówa ahonáts꞉ton, iáh teonatkwénion ne raotishaststénhsera ahonáts꞉ton; né꞉ne sahshaststénhsera tánon tsi nisehshást꞉te waʼkarihónhni, né tsi ní꞉ioh rihwíʼiokwe tsi éhʼtho í꞉seskwe, né wahakonatónhase tsi nisehnorónkwa.

⁴ Í꞉se nakenontí꞉io tánon akeʼNí꞉io í꞉ken. Í꞉se tesehiáwi ne atesenhniétshera ne shonkwetaʼshónhas,

⁵ tánon né꞉ne sashaststénhsera waʼhotiʼsénhnieʼte ne ionkhíshons.

⁶ Asèken iáh akahénhna tekeniahésen, khés nakasaré꞉kowa nakakwéni ahonkenóns꞉thate.

⁷ Ók í꞉se waskwaʼnóns꞉thate tsi nòkwah ne ionkhíshons, tánon waʼtesehianitonniáten tsi niháti ne ionkhíshons.

⁸ Kwáh kíʼ tiókonte tsi enkwahnatón꞉sehke, tánon tenkwahnonweratónhsehke tsi nénhwe enkénhake. Selah

⁹ Eʼthohʼsáne waskwatswaténien tánon waskwahtéhate, tánon iáh ó꞉nen teseskwahtsiatará꞉nis nonhkwentiókwah ronhterí꞉ios.

¹⁰ Wastiónhnien nahonsahiakwákete tsi nón꞉we nihónhnes ne iontkhíshons, tánon ne ionkhíshons iahatihá꞉sehron ne iakwahteriʼiosthakwahsónhas.

¹¹ Thóh naskwahiatóthenhste tsi ní꞉ioht ne teiotinakaronhtónha konwanawentʼthósere, tánon iateskwaréniate natʼtéshon nón꞉we tionhontsaiénton.

¹² Waʼsehiathenhnínon ne shonkwetaʼshónhas skanóskwat tsi níkon iahát꞉kene, iáh tekakarhiakʼtserówane tesarihwaʼnónton.

¹³ Né wastiónhnien ne tehiakwanonsanekʼkhánion nahionkhistériste, tánon thahonkhiʼiéron ne skát꞉ne iákwes.

¹⁴ Kaierón꞉sehra wastiónhni tsi nòkwah nonkweshón꞉has, tehonahnonkarénhron tsi thiʼhiontkhiʼiéron nonkweshón꞉has.

¹⁵ Konthatiésons nakatehénsera akkénhton í꞉ken, tánon atehénsera watkonwaʼrorókston

¹⁶ Tiewakatʼthónte tsi thiʼhiontiéron tánon ionkenikonraksátha, né꞉ne iónkshons tánon tsi niháti ne hionkenenhró꞉tani.

¹⁷ Akwé꞉kon kí꞉ken waʼhonkwahiatórenhne, eʼthohʼsáne iáh kíʼ tekwanikonhrénhʼen, khés ne tahionkwahiákon naterihwaseronniátshera ne sáhshon tsi natethewáʼtere.

¹⁸ Iáh kʼiʼ tekwanikonhrathénhni, iáh tehionkwatenowénhton ne sarihwatátʼtseras.

¹⁹ Eʼthohʼsáne thóh nón꞉we naskwakát꞉we tsi rón꞉nes ne kariotátʼsens kwáh iáh othènen tetiakwakwéneskwe ne thènen nahonsahiakwáiere; thóh nón꞉we iaskwatewénhthete tsi nón꞉we ne kwáh tetiókaras tehiahontsakonhátsie ne kenhé꞉ion.

²⁰ Ní꞉io iáh tehionkwatkáwen tsi í꞉se kwasénhnaiens, iáh ó꞉ni tehiakhisénhnaien ne kahiatón꞉nis,

²¹ kwáh orihwiʼiohónwe tsi aʼhisatthókenh? Tsioríhwa tsi akwékon niesateriénhtare tsi nihiakwahrihwaséhtha nonkwanontonhnióntseras.

²² Ók í꞉se thesanónhtons tsi tiotʼkonhónwe ionkhinonwarhiákons, thóh nihionkhiʼiérase tsi ní꞉ioht ne teiotinakarontónha konwaʼnawent꞉tóhsere.

²³ ʼÍ꞉tie, Saiá꞉ner! Nontsiéren tsi sénhtas? Satorhianerónhko! Tó꞉sa takwatkénrat tsi nénhwe akénhake!

²⁴ Nontsiéren tsi takwatasehténhni? Tó꞉sa sanikónhren nonkwahronhiakénhsera tánon tsi natehionkwanikónhrare?

²⁵ Asèken hionkwakenrahéston; iáh tetiakwakwénies nahonsahiakwatátʼtaste.

²⁶ Téstann, táseh takwaiénawas. Saskwahiatanónstat né akarihónhni ne iorihwató꞉ken sanoronkwátshera.