Psalms 42 - Ohiatonhseratokénti

Tekahiatonserakéhaton Tkaroron Ne Teharihwaʼkwáhtha (Teharihwaʼkwáhtha 42—72) Ronwaskáneks ne Rawenni꞉io tánon me Raoienawashétsera tsi Iakonikonraronhiáken

Ne Raterenhnathentsatha. Né꞉ne Korahites raotirénhnas (Maskil).

¹ Tsi ní꞉ioht noskenón꞉ton tsi nihaskáneks nahanekíra tsi niwatneʼkíne ne ionékano, kwáh thóh ní꞉ioht nakatonhnetʼtserakwékon tsi nishaskáneks, Ó Ní꞉io.

² Kwáh tsi ní꞉ioht ne rónhkwe tsi nihoniatátʼtens nahanekíra nonékanos kwáh thóh natekonhiatonhontsóni Sewenní꞉io, né꞉ne ronnhehónwe Ní꞉io. Kátʼke ahontáke nakatkáto ne tsi rakonshón꞉te ne Rawenni꞉io?

³ Natkháseri thó꞉khok ní꞉ioht tsi waʼkeniatanawésthaʼkwe ne tsi niwenhnísehres tánon ne tsi niwasónhtes, thóh ná꞉he ne iónkswenhs ionkerihwanontónhnis, “Kaʼníres ne Saní꞉io?”

⁴ Tewaʼkerhiaskáriaks nó꞉nen enskatatehiaráhkwen, tsi nitsiotohesthánion, nes nó꞉nen eniakwahteró꞉sen nonkweshónhas tsi niahionkwanénhrihne, tánon enkhehéntenhse tsi nienhiákwe ne raononsatokentíke ne Rawenni꞉io ne Jerusalemke, atonhnaráhtshera hiotsarokwenhátsie, tehiakorihwahkwenhátsie, tánon tehiakohenré꞉tane tehonwanonwerónhnionhs Rawenni꞉io.

⁵ Tsi nió꞉re tsi waʼkenikonráksens, Ó akwahtón꞉nhets, tsi nió꞉re tsi tewaʼkanikónhrare? Kwáh rawenní꞉ioke nón꞉we nénhtsen nakwararát꞉tsera, asèken shé꞉kon kíʼ thenhshiʼnonhweráton, rahón꞉ha natienawaʼséhtsera í꞉ken

^6-7 tánon akeNí꞉io í꞉ken. Kénʼen tsi nón꞉we niwatwahéston tewaʼkerhiasarihonhátie, ká꞉ti rahonháke ne Rawenni꞉io nòkwah ionhsakanontón꞉nionhwe. Tsietsiononteráhtses takatheniethénhnis ne kanikonhratsénhtsera ne tsi kónnhe; tsik tsieiawénhon tsi ní꞉ioht tsi tewaʼkonhnarikʼkons kwáh tsi ní꞉ioht ne iohwehnó꞉tons. Kwáh ehʼní꞉ioht tsi iohrá꞉kare tsi ní꞉ioht ne tsi tewasénhʼtha waʼhonawakárehre ne tsik kaniatarathátsie ne Jordan; tsi nitsawé꞉non ne tsi tionón꞉te ne Hermon tánon ne Mizar, waʼkeskó꞉tha.

⁸ Aiáwenhs tsi niwenhnísehres ne Roiá꞉ner ahakeʼnatónhase ne iorihwaʼtó꞉ken raonoronkwáhtshera, tánon nokarasnéha thenhirihwáʼkwahse, ienkaterénhnaien rahonháke ne Rawenni꞉io rahónha takáwís tsi kónnhe.

⁹ Rahonháke ne Rawenni꞉io, né tkákenes, enkí꞉ron, “Onhnontiéren tsi tatiatanikonhrénhʼen? Nonhtiéren tsi tiókonhte ahonkeronhiákenʼke né tsi nihionkateniakatsthénhni ne iónkswens?”

¹⁰ Iekaníhare nastsienshón꞉has waʼkakararénhsehrons, né iónkswenhs tehionkaterienhtakariá꞉tha, iehothikonhtákwen ionkerihwaʼnonhtonniónhnis, “Kanón꞉we ní꞉res ne sahʼNí꞉io?”

¹¹ Tsi nió꞉re tsi waʼkenikonhrák꞉sens, Ó akwahtón꞉nhets, tsi nió꞉re tsi tewakanikónhrahre? Kwáh Rawenniʼióke nón꞉we nénhtsen nakwahrahrát꞉tsera, asèken shé꞉kon kíʼ thenshiʼnonhweráton, rahónha sahkeskonthákwen tánon akeʼNí꞉io í꞉ken.