Psalms 41 - Ohiatonhseratokénti

Kaniwanerat꞉tsera ne Rawenni꞉io Rahoienawashétsera tánon ne Anitentétshera Nahonsaiontkwatáko

Ne Raterenhnathentsátha. Né꞉ne Táwit raorénhna.

¹ Iakotáskats tsi nihiákon ronwenhnéiare ne rotíten; ne Roiá꞉ner ensakosniénon nó꞉nen thènen tehonanikónhrahre.

² Ne Roiá꞉ner tesahkó꞉nes tánon sakahonnhétie; ronatʼtsenhnónhni ne tsi iohontsáien. Iáh tsiasakót꞉kaʼwe thóh raotishaststenhserákon ne ronwaʼtíshons.

³ Né Roiá꞉ner ensakosniénon nó꞉nen rotinonwákʼtani; né tsi nihotinonwákʼtani akwé꞉kon niesehsetiéntha ne raotinraókons.

⁴ Ók kíʼ ní꞉i, waʼkí꞉ron, “Ó Saiá꞉ner, takiʼténhrak; saskhétient, asèken waʼkeriwáneren tsi nó꞉wa ní꞉se.”

⁵ Né iónkshons kaniakensténhsehra tsi nihiontiérase teonatonhontsóni nakíheie, tánon kwáh akattsenhnáton.

⁶ Tánon nó꞉nen entionhkehnathenhrénhsehra, iáh othènon tekarihwástha tsi nahoténshons ronthónhnions, né rotirihwaʼró꞉ron ne iáh tekarihwí꞉ios ní꞉i akerihwáke; nó꞉nen iensatihiákenʼne kariwaʼhét꞉ken tenhonterihwaʼréniate nakerihwáʼke.

⁷ Ratikwé꞉kon ne iónkswenhs skát꞉ne tsi tenhatitiénhon nakerihwáke; né꞉ne kwáh waʼhét꞉ken enhionkónhniaʼte.

⁸ Rón꞉ton, tsi niwaʼkenonwákʼtani né enwaʼkerió꞉te, iáh nonwénhton tahonsakatʼkétsko.

⁹ Iekaníhare ne kwáh waʼkateroserí꞉ios ne kheniahé꞉sen, né꞉ne skát꞉ne tehiakwáhtontskwe, waʼhonkatkónten.

¹⁰ Ók í꞉se, Ó Saiá꞉ner, takí꞉tenr, tánon sahsekʼkétsko, ne nahonsatkhekárhiase.

¹¹ Ók né kíʼ kí꞉ken waʼkateriénhtare tsi tkonhnikonhraʼieríton; tsioríhwa ne iónkswens tsi iáh tehionkhesénhnion.

¹² Ók í꞉se waskatiénawasthe tsioríhwa tsi niwaʼkerihwatóken, tánon sahénton waskát꞉kawe né꞉ne tsi nénhwe enkénhake.

¹³ Tehonwaʼnonweráton ne Roiá꞉ner, né꞉ne Raotiʼní꞉io í꞉ken NʼIsraerʼró꞉non, né꞉ne tsi nénhwe enkénhake. Éhʼtho Naʼiáwenhne.